ງານປະເພນີບຸນເກິຣຫ ຂອງເຜົ່າກຶມມຸ ຈັດຂຶ້ນໃນວັນທີ 4 ກຸມພາ 2023 ທີ່ບ້ານ ນາບຽນ ເມືອງໄຊເສດຖາ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ບຸນທອງ ຈິດມະນີ ຮອງປະທານປະເທດ, ການນຳພັກລັດ, ແຂກຖືກເຊີນ ແລະ ປະຊາຊົນເຜົ່າກຶມມຸພາຍໃນບ້ານນາບຽນເຂົ້າຮ່ວມ.
ທ່ານ ສົມຄິດ ຕານສະຫັວດ ປະທານບໍລິສັດກໍ່ສ້າງ ຈຳກັດ ກ່າວວ່າ ການຈັດງານໃນຄັ້ງນີ້ເພື່ອເປັນການສືບທອດຮີດຮອງປະເພນີອັນດີງາມຂອງເຜົ່າກຶມມຸ, ລະນຶກເຖິງເຈົ້າຖິ່ນເຈົ້າຖານ, ຜີສາງນາງໄມ້, ຄຸນເຂົ້າ ແລະ ເຄື່ອງປູກຂອງຝັງ, ເປັນການລະນືກເຖິງ ບຸນຄຸນເຄື່ອງມື ແລະ ອຸປະກອນທີ່ນຳໃຊ້ເຂົ້າໃນການຜະລິດ, ເປັນການສົມມາຄາລະວະ ແລະ ເຮັດບຸນເຮັດທານເຖິງບັນພະບູລຸດຜູ້ລ່ວງລັບໄປໃຫ້ມາຮັບເອົາ ພ້ອມທັງເປັນການຂໍບຸນບາລະມີສິ່ງສັກສິດເພື່ອຄຸ້ມຄອງ ແລະ ດົນບັນດານໃຫ້ຫາຍຈາກພະຍາດໂລຄາ, ປັດເປົ່າຄວາມຊົ່ວຮ້າຍໃຫ້ຫາຍໄປໃນປີເກົ່າ ປີໃໝ່ໃຫ້ມີແຕ່ຄວາມສຸກຄວາມຈະເລີນ ທັງເປັນການເຕົ້າໂຮມຄວາມສາມັກຄີລະຫວ່າງຄົນໃນຄອບຄົວ ແລະ ຍາດຕິພີ່ນ້ອງ ທີ່ໄດ້ມີໂອກາດມາຮ່ວມສະຫຼອງກັນຢ່າງມ່ວນຊື່ນໃນວັນສຳຄັນນີ້.
ບຸນເກິຣຫ ແມ່ນຈະຈັດຂຶ້ນໃນໄລຍະ ເດືອນຈຽງ ຫາເດືອນຍີ່ ພາຍຫຼັງທີ່ເກັບກູ້ຜົນຜະລິດ, ເຂົ້າຂຶ້ນເລົ້າຂຶ້ນເຍຍສຳເລັດແລ້ວ ປະຊາຊົນເຜົ່າກຶມມຸໃນຂອບເຂດທົ່ວປະເທດກໍ່ຈະພ້ອມກັນຈັດງານບຸນຂຶ້ນຕາມເງື່ອນໄຂ ແລະ ຄວາມສາມາດຂອງແຕ່ລະຄອບຄົວ ; ສໍາລັບກິດຈະກໍາພາຍໃນງານມີການ ໄຫວ້ຜີເຮືອນ, ແຫ່ເຫຼົ້າໄຫ, ຜູກຂໍ່ຕໍ່ແຂນ, ຂັບລໍາ, ສຽງເຕີມ, ສຽງຂຸ່ຍ, ສຽງປີ່, ສຽງແຄນ, ຄ້ອງບັ້ງ, ກອງ ແລະ ອື່ນໆ ພ້ອມທັງມີການສະແດງສິນລະປະວັນນະຄະດີ ຂອງເຜົ່າກຶມມຸຢ່າງເບີກບານມ່ວນຊື່ນ.
ຂ່າວ : ດວງສະຫວັນ ຂັນທະວົງສາ
