ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຄອບຄົວ ແລະ ບ້ານສາມັກຄີປອງດອງຈະຊ່ວຍໃຫ້ສັງຄົມມີຄວາມສະຫງົບແລະເປັນລະບຽບຮຽບຮ້ອຍຫລາຍຂຶ້ນ

ປະທານແນວລາວສ້າງຊາດບັນດາແຂວງໃຫ້ທັດສະນະວ່າ: ການສ້າງຄອບຄົວ ແລະ ບ້ານສາມັກຄີປອງດອງ ມີຄວາມສຳຄັນຫລາຍເພາະຈະເຮັດໃຫ້ຄອບຄົວມີຄວາມສາມັກຄີ, ມີຄວາມອົບອຸ່ນ, ບ້ານເມືອງມີຄວາມສະຫງົບ ແລະ ເປັນລະບຽບຮຽບຮ້ອຍ ເຊີ່ງຈະປະກອບສ່ວນສໍາຄັນໃຫ້ການພັດທະນາຊີວິດການເປັນຢູ່ຂອງປະຊາຊົນ ກໍຄື ການພັດທະນາປະເທດຊາດໃຫ້ນັບມື້ດີຂຶ້ນ.
ໃນໂອກາດເຂົ້າຮ່ວມກອງປະຊຸມສາມັນຄົບຄະນະກຳ ມະການສູນກາງແນວລາວສ້າງຊາດ ຄັ້ງທີ 5 ສະໄໝທີ X ທີ່ນະຄອນຫລວງວຽງຈັນ ຈັດຂຶ້ນຢູ່ນະຄອນຫລວງວຽງຈັນ ໃນວັນທີ 11-12 ສິງຫາ 2020. ທ່ານ ສົມເພັດ ອິນທາທິລາດ ປະທານແນວລາວສ້າງຊາດ ແຂວງສະຫວັນນະເຂດ ໃຫ້ສໍາພາດວ່າ: ກ່ອນບ້ານໜຶ່ງຈະປະກາດເປັນບ້ານພັດທະ ນາໄດ້ ຕ້ອງມີຄອບຄົວສາມັກຄີປອງດອງພາຍໃນບ້ານດັ່ງກ່າວ ຢ່າງໜ້ອຍ 80%. ຖ້າມີຄວາມສາມັກຄີພາຍໃນຄອບ ຄົວ ແລະ ພາຍໃນບ້ານແລ້ວ ການພັດທະນາກໍດີຂຶ້ນ ແລະ ມີການເຕີບໂຕທີ່ໄວ. ໃນຕໍ່ໜ້າ, ແນວລາວສ້າງຊາດ ນັບທັງສູນກາງ ແລະ ທ້ອງຖິ່ນ ຕ້ອງພ້ອມກັນສືບຕໍ່ເປັນເຈົ້າການໃນການສຶກສາອົບຮົມ, ເຕົ້າ ໂຮມ ແລະ ກໍ່ສ້າງກ້ອນກຳລັງສາມັກຄີປອງດອງ ທົ່ວວົງຄະນະຍາດແຫ່ງຊາດ, ພ້ອມທັງປຸກລະດົມປະຊາຊົນບັນດາເຜົ່າ ເຂົ້າຮ່ວມຂະບວນການຕ່າງໆຂອງພັກ-ລັດ ພ້ອມທັງສຶກສາອົບຮົມປະຊາຊົນບັນດາເຜົ່າ, ຊັ້ນຄົນ, ເພດໄວ ແລະ ສາສະໜາ ໃນແບບແຜນດຳລົງຊີວິດໃນເງື່ອນໄຂໃໝ່.

ທານ ສີທົນ ແກ້ວພູວົງ ປະທານແນວລາວສ້າງຊາດ ແຂວງຈຳປາກສັກ ກ່າວວ່າ: ຄອບຄົວ ແລະ ບ້ານ ທີ່ຖືກຮັບຮອງເປັນຄອບຄົວ ແລະ ບ້ານສາມັກຄີປອງດອງ ແມ່ນມີຄວາມສາມັກຄີກັນ, ມີຄວາມອົບອຸ່ນ ເນື່ອງຈາກປະຊາຊົນ ແລະ ລູກຫລານ ໄດ້ຖືກສຶກອົບຮົມແນວຄິດ ໃຫ້ເອົາ ໃຈໃສ່ພັດທະນາເສດຖະກິດຄອບຄົວ, ໃຫ້ເອົາໃຈໃສ່ໃນການສຶກສາຮ່ຳຮຽນ, ບໍ່ໄປເຮັດໃນທາງທີ່ບໍ່ດີ. ສຳລັບຄອບຄົວ ແລະ ບ້ານທີ່ບໍ່ທັນໄດ້ຖືກຮັບຮອງ ບໍ່ໄດ້ໝາຍຄວາມວ່າບໍ່ດີ ແຕ່ກໍມີບາງຢ່າງຈະຕ້ອງໄດ້ສືບຕໍ່ເອົາ ໃຈໃສ່ ໂດຍສະເພາະຄວາມຫຍຸ້ງໃນການດຳລົງຊີວິດ, ການທຳມາຫາກິນ ແມ່ນຍັງບໍ່ທັນສົມບູນແບບ.

ມາຮອດປັດຈຸບັນ, ທົ່ວປະເທດ ໄດ້ປະກາດຮັບຮອງຄອບຄົວສາມັກຄີປອງດອງແລ້ວ 745.760 ຄອບຄົວ, ບ້ານສາມັກຄີປອງດອງ 5.002 ບ້ານ ແລະ ເມືອງສາມັກ ຄີປອງດອງ 4 ເມືອງ ຄື: ເມືອງເງິນ, ເມືອງພຽງ ແລະ ເມືອງທົ່ງມີໄຊ, ແຂວງໄຊຍະບູລີ ແລະ ເມືອງທ່າພະບາດ, ແຂວງບໍລິຄໍາໄຊ.

ໂດຍ: ມົດແດງນ້ອຍ