ກອງປະຊຸມ ປຶກສາຫາລື ເພື່ອວາງແຜນການເຄື່ອນໄຫວວຽກງານ ຂອງຄະນະກຳມະການຄຸ້ມຄອງເຄມີ ແຂວງໄຊສົມບູນ ຈັດຂຶ້ນໃນວັນທີ 15 ສິງຫາ 2024 ທີ່ຫ້ອງວ່າການແຂວງໄຊສົມບູນ ໂດຍການເປັນປະທານຂອງທ່ານ ສຸກສະຫວາດ ວົງພູມເຫລັກ ຮອງເຈົ້າແຂວງໆໄຊສົມບູນ ພ້ອມດ້ວຍພະແນກການ, ກົມກອງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ກອງປະຊຸມ ຜູ້ເຂົ້າຮ່ວມ ໄດ້ຮັບຟັງລາຍງານ ກ່ຽວກັບການເຄື່ອນໄຫວວຽກງານເຄມີ ຢູ່ແຂວງໄຊສົມບູນ ໃນໄລຍະຜ່ານມາ ພ້ອມທັງເຜີຍແຜ່ບັນດານິຕິກຳ ທີ່ຕິດພັນກັບການຄຸ້ມຄອງເຄມີ ແລະ ຂໍ້ຕົກລົງ ຂອງເຈົ້າແຂວງ ວ່າດ້ວຍການແຕ່ງຕັ້ງຄະນະກຳມະການຄຸ້ມຄອງເຄມີ ແຂວງໄຊສົມບູນ, ຊຶ່ງວຽກງານຄຸ້ມຄອງເຄມີ ແມ່ນການຈັດຕັ້ງປະຕິບັດມາດຕະການ ກ່ຽວກັບການດໍາເນີນທຸລະກິດເຄມີ ເປັນຕົ້ນ ການຕິດຕາມ, ກວດກາ ການນໍາເຂົ້າ, ສົ່ງອອກ ແລະ ນໍາໃຊ້ເຄມີ ຂອງບັນດາບໍລິສັດ ໃຫ້ຖືກຕ້ອງຕາມເຕັກນິກວິຊາການ ແລະ ສອດຄ່ອງກັບລະບຽບ, ກົດໝາຍ ເພື່ອຮັບປະກັນຄວາມປອດໄພຕໍ່ສຸຂະພາບ, ຊີວິດ, ຊັບສິນ, ສິ່ງແວດລ້ອມ ແລະ ສັງຄົມ. ໃນກອງປະຊຸມ, ຄະນະກຳມະການ ໄດ້ພ້ອມກັນປະກອບຄໍາຄິດຄໍາເຫັນ ເພື່ອປຶກສາຫາລືວາງແຜນການເຄື່ອນໄຫວວຽກງານຄຸ້ມຄອງເຄມີ ໃນຕໍ່ໜ້າ ເປັນຕົ້ນ ການຕິດຕາມ, ກວດກາ ແລະ ຊຸກຍູ້ ບັນດາບໍລິສັດທີ່ນໍາໃຊ້ເຄມີ ຢູ່ພາຍໃນແຂວງ, ຂອດການປະສານງານ ລະຫວ່າງພາກສ່ວນທີ່ກ່ຽວຂ້ອງ ແລະ ແຜນງົບປະມານຕ່າງໆ ທັງນີ້ກໍເພື່ອຮັບປະກັນໃຫ້ການຈັດຕັ້ງປະຕິບັດວຽກງານ ໃນຕໍ່ໜ້າ ມີຄວາມເຫັນດີເປັນເອກະພາບ, ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ.
ຂ່າວ-ພາບ: ພາພອນ ນະວົງໄຊ
