ເພື່ອເປັນການແບ່ງເບົາບັນເທົາທຸກ ແລະ ຊ່ວຍເຫຼືອໃຫ້ແກ່ພໍ່ແມ່ປະຊາຊົນ ທີ່ໄດ້ຮັບຜົນກະທົບຈາກໄພພິບັດ (ນໍ້າຖ້ວມ) ໃນໄລຍະຜ່ານມາ ເຊິ່ງເຮັດໃຫ້ຫຼາຍບ້ານ ຫຼາຍຄອບຄົວຢູ່ພາຍໃນເມືອງຫົງສາ ແຂວງໄຊຍະບູລີ ໄດ້ຮັບຜົນກະທົບເສຍຫາຍ ແລະ ຕໍ່ກັບສະພາບການດັ່ງກ່າວ ທາງຂັ້ນເທິງກໍ່ຄືແຂວງໄຊຍະບູລີ ໄດ້ຮັບຊາບຕໍ່ກັບຜົນເສຍຫາຍ.
ດັ່ງນັ້ນ ຄະນະກຳມະການຄຸ້ມຄອງໄພພິບັດຂັ້ນແຂວງ ຈຶ່ງໄດ້ລົງມາມອບເຄື່ອງຊ່ວຍເຫຼືອໃຫ້ແກ່ເມືອງຫົງສາ ເພື່ອມອບຕໍ່ໃຫ້ປະຊາຊົນຜູ້ໄດ້ຮັບຜົນກະທົບຈາກໄພພິບັດ ເພື່ອເຮັດໃຫ້ພໍ່ແມ່ປະຊາຊົນມີກຳລັງໃຈ ແລະ ສະແດງເຖິງຄວາມເປັນຫ່ວງເປັນໃຍຂອງພັກ-ລັດທີ່ມີຕໍ່ປະຊາຊົນ ທີ່ໄດ້ຮັບຜົນກະທົບຕົວຈິງ.
ສໍາລັບເຄື່ອງທີ່ໄດ້ນໍາມາມອບໃນຄັ້ງນີ້ປະກອບມີ ນ້ຳດື່ມ ຈຳນວນ 50 ແພັກ ເຂົ້າສານໜຽວ 648 ກິໂລ ຜ້າຫົ່ມ 3 ຜືນ ສາດ 3 ຜືນ ມຸ້ງ 3 ດາງ ເຄື່ອງໃຊ້ໃນຄົວເຮືອນ 3 ແກັດ ຕຽງນອນ 3 ໜ່ວຍ ສັງກະສີ 110 ແຜ່ນ ລວມມູນຄ່າ 40.932.000 ກີບ.
ພິທີມອບ-ຮັບເຄື່ອງຊ່ວຍເຫຼືອຄັ້ງນີ້ ຈັດຂຶ້ນວັນທີ 4 ກັນຍາ 2024 ຢູ່ທີ່ໜ້າຫ້ອງວ່າການເມືອງກ່າວມອບໂດຍທ່ານ ໜູເກນ ພັນລັກ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ໄຊຍະບູລີ ຕາງໜ້າໃຫ້ຄະນະພັກ-ອົງການປົກຄອງແຂວງ ນັກທຸລະກິດ ຜູ້ປະກອບການ ຫ້າງຮ້ານ ບໍລິສັດ ແລະ ກ່າວຮັບໂດຍທ່ານ ພອນສະຫວັນ ໄຊສົມພັນ ເຈົ້າເມືອງຫົງສາ ພ້ອມດ້ວຍການນຳຂອງເມືອງ ແລະ ຫ້ອງການທີ່ກ່ຽວຂ້ອງ ເຂົ້າຮ່ວມ.
ຂ່າວ-ພາບ: ກິດຕິສັກ ບົວໄລ
