ທ່ານ ໂຮ່ ກີ ມິງ ຄະນະປະຈໍາພັກນະຄອນ ຮອງປະທານ ຜູ້ປະຈໍາການຄະນະກໍາມະການປະຊາຊົນນະຄອນດານັງ,ສສ ຫວຽດນາມ ໄດ້ມີຄຳເຫັນຕໍ່ກອງປະຊຸມເຊື່ອມໂຍງການຄ້າ ລະຫວ່າງຫົວໜ່ວຍທຸລະກິດນະຄອນດານັງ ແລະ ຫົວໜ່ວຍທຸລະກິດບັນດາແຂວງພາກກາງ, ພາກໃຕ້ ສປປ ລາວ.ໃນວັນທີ 5 ກໍລະກົດ 2022 ໂດຍກ່າວວ່າ: ຫວຽດນາມ ແລະ ລາວ ແມ່ນສອງຊາດທີ່ຢູ່ໃກ້ຄຽງກັນ ມີສາຍພົວພັນອັນພິເສດ ແລະ ສວຍງາມມາແຕ່ບູຮານນະການ, ມີຊາຍແດນຮ່ວມກັນຍາວ 2.000 ກວ່າ ກມ, ມີແລວສາຍພູຫຼວງ, ສາຍພູຕໍ່ສາຍພູ, ແມ່ນ້ຳເຊື່ອມຕໍ່ແມ່ນ້ຳ. ສອງຊາດພວກເຮົາໄດ້ມີສາຍພົວພັນອັນສະໜິດແໜ້ນກັນມາຕະຫຼອດໄລຍະຕໍ່ສູ້ກູ້ຊາດ ປົດປ່ອຍປະເທດຊາດ ກໍ່ຄືການສ້າງສາ ພັດທະນາປະເທດຊາດ ໃນໄລຍະປະຈຸບັນ. ດ້ວຍນ້ຳໃຈມິດຕະພາບດັ່ງກ່າວ ພັກ ແລະ ປະຊາຊົນສອງຊາດພວກເຮົາ ໄດ້ສືບຕໍ່ເສີມຂະຫຍາຍຄວາມສາມັກຄີ ທີ່ເປັນມູນເຊື້ອພິເສດ ຕະຫຼອດໄລຍະ 60 ປີ ຜ່ານມາ ແລະ ການເວລາຜ່ານໄປ ມິດຕະພາບແບບພິເສດຂອງພວກເຮົາຍິ່ງນັບມື້ເລິກເຊິ່ງ ແລະ ໜັກແໜ້ນ.
ປະຊາຊົນສອງຊາດ ຫວຽດນາມ-ລາວ ພວກເຮົາ ເວົ້າລວມ, ເວົ້າສະເພາະປະຊາຊົນນະຄອນດານັງ ແລະ ປະຊາຊັນບັນດາແຂວງຂອງ ສປປ ລາວ ຍາມໃດກໍ່ຄຽງບ່າຄຽງໄລ່ກັນ, ຮັກສາ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີ ແລະ ຮ່ວມມືຮອບດ້ານ. ພວກເຮົາບໍ່ພຽງແຕ່ຮັບຮູ້ໄດ້ຄວາມຮັກຄວາມແພງອັນສະໜິດສະໝົມ ແບບພິເສດ ທີ່ຮູ້ສຶກອອກມາຈາກໃຈຈິງ, ບັນດານ້ຳໃຈມິດຕະພາບອັນເລິກເຊີ່ງນັ້ນໄດ້ປະກົດຜົນເປັນຈິງ ແລະ ສະແດງອອກໂດຍຜ່ານ ບັນດານະໂຍບາຍ, ໂຄງການຮ່ວມມື, ການເດີນທາງຢ້ຽມຢາມ, ການເດີນທາງມາເຮັດວຽກ ລະຫວ່າງນະຄອນດານັງ ກັບ ບັນດາແຂວງຂອງ ສປປ ລາວ ທີ່ໄດ້ຈັດຕັ້ງປະຕິບັດຢ່າງເປັນປະຈຳ ໃນແຕ່ລະໄລຍະ.
ດ້ວຍທ່າແຮງ ແລະ ຄວາມໄດ້ປຽບທາງດ້ານທີ່ຕັ້ງ ແລະ ຊັບພະຍາກອນທຳມະຊາດ; ພື້ນຖານໂຄງລ່າງ ຖະໜົນຫົນທາງ, ທາງເດີນທະເລ, ທາງລົດໄຟ ແລະ ເສັ້ນທາງ ທາງອາກາດ ໄດ້ຮັບການລົງທຶນ, ເປັນລະບົບຄົບຊຸດ ແລະ ມີຄວາມພ້ອມພໍສົມຄວນ; ລະບົບພື້ນຖານໂຄງລ່າງທາງດ້ານການຄ້າທີ່ຫຼາກຫຼາຍ, ສະພາບການລົງທຶນທີ່ເອື້ອອຳນວຍ, ເໝາະສົມກັບນະໂຍບາຍສົ່ງເສີມການ ລົງທຶນ,… ນະຄອນດານັງ ໄຝກຳລັງສຸມໃສ່ການກໍ່ສ້າງ, ພັດທະນານະຄອນດານັງໃຫ້ກາຍເປັນສູນກາງທາງດ້ານເສດຖະ ກິດ- ສັງຄົມຂະໜາດໃຫຍ່ຂອງຫວຽດນາມ ແລະເຂດອາຊີຕາເວັນອອກສ່ຽງໃຕ້.; ສ້າງນະຄອນດານັງໃຫ້ກາຍເປັນສູນກາງທາງດ້ານເສດຖະກິດທາງທະເລ; ຕອບສະໜອງ ການບໍລິການດ້ານ ລະບົບ ໂລຈີສຕິກຢູ່ເຂດພາກກາງ ດ້ວຍບົດບາດເປັນປະຕູຄ່ຽນຖ່າຍ, ຂົນສົ່ງສິນຄ້າກັບບັນດາທ້ອງຖິ່ນ, ບັນດາປະເທດໃນຂົງເຂດອາຊີຕາເວັນອອກສ່ຽງໃຕ້ ແລະ ສາກົນ.
ໃນທ່າມກາງບັນຍາກາດການສະເຫຼີມສະຫຼອງ ສອງວັນປະຫວັດສາດ ສາມັກຄີ ມິດຕະພາບ ລາວ-ຫວຽດນາມ ຢ່າງເປັນຂະບວນການ, ໂດຍສະເພາະ ສະເຫຼີມສະຫຼອງວັນເຊັນສົນທິສັນຍາຮ່ວມມື ລາວ-ຫວຽດນາມ ຄົບຮອບ 45 ປີ ແລະວັນ ສ້າງຕັ້ງສາຍພົວພັນການທູດຂອງສອງປະເທດ ຄົບຮອບ 60 ປີ, ອຳນາດການປົກຄອງນະຄອນດານັງ ໄດ້ຈັດຕັ້ງນະຄະມາຢ້ຽມຢາມ ແລະ ເຮັດວຽກຢູ່ບັນດາແຂວງຂອງ ສປປ ລາວ ແນໃສ່ຮັດແໜ້ນສາຍພົວພັນມິດຕະພາບຂອງພວກເຮົາໃຫ້ ເລິກເຊິ່ງກວ່າເກົ່າ, ໜັກແໜ້ນກວ່າເກົ່າ ຜ່ານບັນດາກິດຈະກຳແຜນການຮ່ວມມືກັບບັນດາທ້ອງຖິ່ນ ຂອງ ສປປ ລາວ ແລະ ກອງປະຊຸມເຊື່ອມໂຍງການຄ້າຂອງພວກເຮົາໃນມື້ນີ້ ກໍ່ແມ່ນອັນຢັ້ງຢືນ ໝາກຜົນຂອງການຮ່ວມມືຂອງພວກເຮົາ.
ການຈັດຕັ້ງ, ເຊື່ອມໂຍງລະຫວ່າງຫົວໜ່ວຍທຸລະກິດຂອງນະຄອນດານັງ ກັບ ຫົວໜ່ວຍທຸລະກິດຂອງບັນດາແຂວງພາກກາງ, ພາກໃຕ້ ຂອງ ສປປ ລາວ ຂອງພວກເຮົາ ສຸດທີ່ມີຄວາມໝາຍ ສຳຄັນ ຕໍ່ກັບສະພາບການໂລກ, ຫຼາຍປະເທດຢູ່ໃນໂລກກຳລັງປະເຊີນໜ້າກັບຫຼາຍບັນຫາ, ສິ່ງທ້າທາຍທີ່ກຳລັງເກີດຂຶ້ນ, ໂດຍສະເພາະຫຼັງຈາກສະພາບວິກິດການ ການແຜ່ລະບາດຂອງພະຍາດໂຄວິດ – 19. ຂ້າພະເຈົ້າເຊື່ອໝັ້ນວ່າ ການເດີນທາງມາແຂວງຈຳປາສັກຂອງພວກເຮົາໃນຄັ້ງນີ້ ຈະເປັນການສ້າງໂອກາດ, ເປີດກ້ວາງໂອກາດ ຊຸກຍູ້ໃຫ້ສາຍພົວພັນ ການຮ່ວມມື ມິດຕະພາບ ລະຫວ່າງອຳນາດການປົກຄອງ, ຂະແໜງການ ຂອງນະຄອນດານັງ, ບັນດາແຂວງພາກກາງ, ພາກໃຕ້ ແລະ ຫົວໜ່ວຍທຸລະກິດ ຂອງແຕ່ລະຝ່າຍ ຈະໄດ້ຮັບການສືບຕໍ່ຈັດຕັ້ງຜັນຂະຫຍາຍຢ່າງມີບາດກ້າວ ໃນແຕ່ລະໄລຍະ.
ຂ້າພະເຈົ້າກໍ່ຍັງເຊື່ອໝັ້ນວ່າ ປະຊາຊົນສອງຊາດ ຫວຽດນາມ – ລາວ ຈະໄດ້ສືບຕໍ່ຮັກສາມູນເຊື້ອ ແລະ ເສີມຂະຫຍາຍນ້ຳໃຈ ຄວາມສາມັກຄີແບບພິເສດ ແລະ ດີງາມ ທີ່ບັນພະບູລຸດຂອງພວກເຮົາໄດ້ສ້າງມາໃຫ້ຍືນຍົງຕະຫຼອດໄປ. ດັ່ງທີ່ປະທານ ໂຮ ຈິ ມິນ ໄດ້ສັ່ງສອນໄວ້ວ່າ: “ສອງຊາດ ຫວຽດ – ລາວ ໄດ້ຝັງຄວາມຮັກຢູ່ໃນດວງໃຈ ຮົງຮາ ທັງແມ່ນ້່ຳຂອງ ບໍ່ເລິກປຸນປານໄດ້. ” ແລະ ປະທານ ໄກສອນ ພົມວິຫານ ກໍ່ໄດ້ຢັ້ງຢືນຊ້ຳອີກວ່າ: “ພູຜາກໍ່ຍັງເຈື່ອນ, ແມ່ນ້ຳກໍ່ຍັງມີບົກແຫ້ງ, ນ້ຳໃຈມິດຕະພາບສອງຊາດ ລາວ-ຫວຽດນາມ ຍືນຍົງ ແລະ ສວຍງາມຕະຫຼອດໄປ”
ອີກເທື່ອໜື່ງ, ຂ້າພະເຈົ້າຂໍອວຍພອນໃຫ້ກອງປະຊຸມຂອງພວກເຮົາໃນຄັ້ງນີ້ໃຫ້ໄດ້ຮັບຜົນສຳເລັດຢ່າງສວຍງາມ ແລະ ພິເສດ ຂໍອ່ວຍພອນໃຫ້ບັນດາຫົວໜ່ວຍທຸລະກິດຂອງນະຄອນດານັງ, ຫົວໜ່ວຍທຸລະກິດບັນດາແຂວງພາກກາງ, ພາກໃຕ້ ສປປ ລາວ ຍາດໄດ້ຜົນສຳເລັດ, ເປີດກວ້າງການຮ່ວມມື ແລະ ສືບຕໍ່ພັດທະນາໃນອະນາຄົດ.
ເກດສະໜາ ແກ້ວສຸວັນນະແສງ
