ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຄະນະກຳມະການສະເພາະກິດຈັດກອງປະຊຸມ ຫາລືແກ້ໄຂຜົນກະທົບຕໍ່ເສດຖະກິດ ຈາກການລະບາດໂຄວິດ-19

ໃນວັນທີ 20 ເມສາ 2020 ທີ່ກະຊວງແຜນການ ແລະ ການລົງທຶນ ນະຄອນຫລວງວຽງຈັນ, ຄະນະສະເພາະກິດ ດ້ານເສດຖະກິດ ເພື່ອແກ້ໄຂຜົນກະທົບ ຈາກການລະບາດຂອງພະຍາດ ໂຄວິດ-19ໄດ້ຈັດກອງປະຊຸມ ຫາລືແກ້ໄຂຜົນກະທົບຕໍ່ເສດຖະກິດ ຈາກການລະບາດໂຄວິດ-19 ໂດຍການເປັນປະທານ ຂອງທ່ານ ສອນໄຊ ສີພັນດອນ ຮອງນາຍົກ ລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ, ກອງປະຊຸມໃນຄັ້ງນີ້ ໄດ້ປຶກສາຫາລື ການຈັດຕັ້ງຜັນຂະຫຍາຍ 10 ນະໂຍບາຍ ແລະ 9 ມາດຕະການ ທາງດ້ານເສດຖະ ກິດຂອງລັດຖະບານວາງອອກ. ໂອກາດນີ້, ທ່ານ ສອນໄຊ ສີພັນດອນ ໄດ້ກ່າວຕໍ່ກອງປະຊຸມວ່າ: ກອງປະຊຸມຄັ້ງນີ້ ຈະໄດ້ພ້ອມກັນ ຄົ້ນຄວ້າຕື່ມ ກ່ຽວກັບການແກ້ໄຂຜົນກະທົບ ແລະ ຜັນຂະຫຍາຍນະໂຍບາຍ, ມາດຕະການຕ່າງໆ ເພື່ອຫລຸດຜ່ອນຜົນກະທົບ ຂອງພະຍາດໂຄວິດ ຕໍ່ເສດຖະກິດຂອງລາວ ເພື່ອກະກຽມການລາຍງານຕໍ່ ກອງປະຊຸມລັດຖະບານ ໃນວັນທີ 23​ ເມສາ 2020 ທີ່ຈະມາເຖິງນີ້. ຜ່ານມາ, ພວກເຮົາກໍໄດ້ມີການ ປະກອບຄຳເຫັນເຂົ້າໃນ ວຽກງານດັ່ງກ່າວ ໃນກອງປະຊຸມທາງໄກໃນວັນ 14 ເມສາ 2020, ແຕ່ວ່າ ນາຍົກລັດຖະມົນຕີ ໄດ້ຊີ້ນຳ ແລະ ເນັ້ນໜັກຕື່ມ ໃຫ້ປັບປຸງໃຫ້ລະອຽດກວ່າເກົ່າ ກ່ຽວກັບຮ່າງບົດລາຍງານ ຂອງ ຄະນະສະເພາະກິດ ດ້ານເສດຖະກິດ ຕາມຂໍ້ຕົກລົງ 32/ນຍ.


ທ່ານ ສອນໄຊ ສີພັນດອນ ຍັງໄດ້ສະແດງຄວາມເປັນຫ່ວງເປັນໄຍ ຕໍ່ບັນຫາແຮງງານ ຊຶ່ງອາດຈະໄດ້ຮັບຜົນກະທົບ ທີ່ໜັກໜ່ວງສົມຄວນ ນັບທັງຢູ່ໃນລະບົບປະກັນສັງຄົມ, ນອກລະບົບປະກັນສັງຄົມ, ແຮງງານອາຊີບ ແລະ ແຮງງານອິດສະຫລະ ເນື່ອງຈາກວ່າ ບັນດາໂຮງຈັກໂຮງງານ ໄດ້ມີການປິດໂຕຊົ່ວຄາວ ອັນໄດ້ສົ່ງຜົນກະທົບໜັກ ຕໍ່ຜູ້ທີ່ຫາເຊົ້າກິນຄ່ຳ. ສະນັ້ນ, ໃນຖານະລັດຖະບານ ເປັນຜູ້ຮັບໃຊ້ບໍລິ ການປະຊາຊົນ ຕ້ອງພ້ອມກັນຊອກຫາວິທີ ການແກ້ໄຂບັນຫາດັ່ງກ່າວ ຢ່າງເລັ່ງດ່ວນ ເພາະມັນໄດ້ສົ່ງກະທົບ ເຖິງຊີວິດການເປັນຢູ່ ຂອງພໍ່ແມ່ປະຊາຊົນລາວບັນດາເຜົ່າ.

ກອງປະຊຸມ ຄັ້ງນີ້ ຍັງໄດ້ພ້ອມກັນຄົ້ນຄວ້າ ຕໍ່ບັນດາຂໍ້ສະເໜີ ຂອງພາກທຸລະກິດຕໍ່ ຜົນກະທົບຕ່າງໆ ເພື່ອນະໂຍບາຍແກ້ໄຂ ຄວາມຫຍຸ້ງຍາກ ແລະ ການຊ່ວຍເຫລືອຕໍ່ປະຊາຊົນ ແລະ ສັງຄົມ, ພ້ອມທັງຄົ້ນຄວ້າ ບັນດານະໂຍບາຍ ແລະ ມາດຕະການເພີ່ມຕື່ມ ເພື່ອຈັດຕັ້ງປະຕິບັດໃນຕໍ່ໜ້າ.