ເພື່ອສະເຫຼີມສະຫຼອງງານມະຫາກຳກິລາໂອແລມປິກເກມ ຄັ້ງທີ 33 ທີ່ນະຄອນ ຫຼວງປາຣີ ປະເທດຝຣັ່ງຮັບກຽດເປັນເຈົ້າພາບ ທີ່ໄດ້ຈັດຂຶ້ນຢ່າງເປັນທາງການ.
ກິດຈະກຳດັ່ງກ່າວ ໄດ້ຈັດຂຶ້ນໃນວັນທີ 25 ກໍລະກົດ 2024 ທີ່ສູນກິລາບູໂດເຊັນເຕີ ໃຫ້ກຽດເຂົ້າຮ່ວມຂອງ ທ່ານ ສຳລານ ພັນຄະວົງ ຮອງລັດຖະມົນຕີກະຊວງສຶກສາທິ ການ ແລະ ກິລາ (ສສກ), ທ່ານ ນາງ ຊີເລງ ຊົວ ເອກອັກຄະລັດຖະທູດຝຣັ່ງ ປະຈຳລາວ ແລະ ທ່ານ ສົມພູ ພົງສາ ຮອງປະທານຄະນະກຳມະການໂອແລມປິກແຫ່ງຊາດລາວ (ຄອລ), ມີຄະນະບໍລິຫານງານ ຄອລ, ຄະນະບໍລິຫານງານສະຫະພັນກິລາ, ພ້ອມດ້ວຍພະນັກງານທີ່ກ່ຽວຂ້ອງ, ຄູຝຶກ, ນັກກິລາ, ນັກຮຽນ-ນັກສຶກສາ ແລະ ມວນຊົນ ເຂົ້າຮ່ວມ.
ກິດຈະກຳກິລາທີ່ນຳມາສະແດງ ຫຼື ສາທິດ ໃຫ້ມວນຊົນຊາວລາວ ໄດ້ຊົມໃນງານຄັ້ງນີ້ ປະກອບມີທັງໝົດ 6 ສະຫະພັນກິລາ ຄື: ມວຍລາວ, ຢູໂດ, ເທຄວັນໂດ, ດຶງເຊືອກ, ຣັກບີ້, ແລະ ກິລາບານສົ່ງ.
ພ້ອມດຽວກັນນັ້ນ, ກໍເປີດກວ້າງໃຫ້ນັກກິລາ ແລະ ມວນຊົນທົ່ວໄປ ຜູ້ທີ່ສົນໃຈຝຶກແອບຝຶກຊ້ອມພື້ນຖານກິລາແຕ່ລະປະເພດມາແລກປ່ຽນບົດ ແລະ ຮຽນນຳທັກສະຂັ້ນພື້ນຖານພ້ອມກັນ ເຊິ່ງເຕັມໄປດ້ວຍບັນຍາກາດຄຶກຄື້ນມ່ວນຊື່ນ.
