ພິທີຖະແຫຼງຂ່າວການກະກຽມສົ່ງຄະນະກິລາລາວເຂົ້າຮ່ວມງານມະຫາກໍກິລາເອຊຽນເກມຄັ້ງທີ 19 ແລະ ການເຂົ້າຮ່ວມງານແຂ່ງຂັນງານມະຫາກໍາກິລາເອຊຽນພາລາເກມ ຄັ້ງທີ 4 ທີ່ນະຄອນຫາງໂຈວ ຂອງຈີນໄດ້ຈັດຂຶ້ນໃນວັນທີ 19 ກັນຍານີ້ ທີ່ຄະນະກໍາມະການໂອແລມປິກແຫ່ງຊາດລາວ ນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ມີທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ, ປະທານຄະນະກໍາມະການໂອແລມປິກແຫ່ງຊາດລາວ,ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ, ຮອງປະທານ-ເລຂາທິການຄະນະກໍາມະການໂອແລມປິກແຫ່ງຊາດລາວ, ຫົວໜ້າກົມກິລາມວນຊົນ, ພະລະ ແລະ ສີລະປະສຶກສາ ຮອງປະທານ-ເລຂາທິການຄະນະກໍາມະການໂອແລມປິກແຫ່ງຊາດລາວ, ພ້ອມດ້ວຍພາກສ່ວນກ່ຽວ ຂ້ອງອ້ອມຂ້າງຄະນະກໍາມະການໂອແລມປິກແຫ່ງຊາດລາວ, ນັກກິລາທີ່ຈະເຂົ້າຮ່ວມງານດັ່ງກ່າວ ແລະ ແຂກຮັບເຊີນ
ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ, ຮອງປະທານ-ເລຂາທິການຄະນະກໍາມະການໂອແລມປິກແຫ່ງຊາດລາວໄດ້ມີຄໍາເຫັນວ່າ: ການກະກຽມຄວາມພ້ອມຂອງຄະນະກິລາລາວເຂົ້າຮ່ວມງານແຂ່ງຂັນກິລາເອຊຽນເກມຄັ້ງທີ 19 ທີ່ນະຄອນຫາງໂຈ ຂອງຈີນລະຫວ່າງວັນທີ 23 ກັນຍາ ຫາ 8 ຕຸລາ 2023 ວ່າ: ງານມະຫາກໍາກິລາເອຊຽນເກມ ແມ່ນງານແຂ່ງຂັນກິລາຂອງບັນດາປະເທດອາຊີມີ 45 ປະເທດເຂົ້າຮ່ວມ ເຊຶ່ງຈັດຂຶ້ນທຸກໆ ປີ ໄດ້ພັດປ່ຽນແຕ່ລະປະເທດເປັນເຈົ້າພາບຮ່ວມມືກັບຕ່າງປະເທດ, ທັງເປັນການສະໜັບສະໜູນປະເທດເຈົ້າພາບ, ສືບຕໍ່ປະຕິບັດພັນທະຕໍ່ການ ຈັດຕັ້ງກິລາສາກົນ ໃນນາມລາວເຮົາ ເປັນສະມາຊິກ, ສ້າງໂອກາດ ແລະ ເງື່ອນໄຂໃຫ້ຄູຝຶກ ແລະ ນັກກິລາ ໄດ້ທົດສອບປະສົບການ ຍົກສູງລະດັບຄວາມສາມາດໃຫ້ມີຄຸນນະພາບສູງເທົ່າທຽມກັບລະດັບອະນຸພາກພື້ນ, ພາກພື້ນ ແລະ ສາກົນ ເຂົ້າຮ່ວມ ເພື່ອສະແດງເຖິງຄວາມອາດສາມາດບົ່ມຊ້ອນ ຂອງນັກກິລາລາວ ໃນການສູ້ຊົນເປັນເຈົ້າການຍາດຊິງເອົາຫຼຽນຕ່າງໆ ເພື່ອສ້າງກຽດຊື່ສຽງມາສູ່ປະ ເທດຊາດ. ຈາກນັ້ນທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ, ຮອງປະທານ, ເລຂາທິການຄະນະກຳມະການພາຣາແລມປິກແຫ່ງຊາດລາວໄດ້ລາຍງານການກະກຽມຄວາມພ້ອມເຂົ້າຮ່ວມງານແຂ່ງຂັນງານມະຫາກໍາກິລາເອຊຽນພາລາເກມ ຄັ້ງທີ 4 ທີ່ນະຄອນຫາງໂຈວ ຂອງຈີນໃນລະຫວ່າງວັນທີ 22 ຫາ 28 ຕຸລາ 2023 ນີ້: ເຊຶ່ງານມະຫາກຳກິລາຄົນພິການເອຊຽນພາຣາເກມ ແມ່ນການແຂ່ງຂັນກິລາຄົນພິການຂອງບັນດາປະເທດສະມາຊິກໃນທະວີບອາຊີ ຊຶ່ງມີທັງໝົດ 45 ປະເທດເຂົ້າຮ່ວມການແຂ່ງຂັນ ແລະ ຈັດຂື້ນທຸກໆ 4 ປີ ພາຍຫລັງສຳເລັດການແຂ່ງຂັນກິລາເອຊຽນເກມ. ສຳລັບລາວເຮົາ ແມ່ນໜຶ່ງໃນບັນດາປະເທດ ທີ່ໄດ້ເຂົ້າເປັນສະມາຊິກກິລາຄົນພິການໃນທະວີບອາຊີ (APC) ໃນປີ 2010, ໄດ້ເຂົ້າຮ່ວມຂະບວນການ ເຄື່ອນໄຫວວຽກງານຕ່າງໆ ໃນນາມສະມາຊິກ ແລະ ນຳພານັກກິລາຄົນພິການລາວ ເຂົ້າຮ່ວມການເຄື່ອນໄຫວ ໃນເວທີການແຂ່ງຂັນກິລາ, ເຂົ້າຮ່ວມກອງປະຊຸມລະດັບຕ່າງໆ. ພິເສດໃນການເຂົ້າຮ່ວມງານແຂ່ງຂັນກິລາຄົນພິການເອຊຽນພາຣາເກມຄັ້ງທີຜ່ານມາ ໃນປິ 2018 ທີ່ປະເທດອິນໂດເນເຊຍ ນັກກິລາຍົກນ້ຳໜັກຄົນພິການລາວ ລຸ້ນ 49 ກິໂລ ສາມາດຍາດໄດ້ຫຼຽນຄຳ 1 ຫຼຽນ ຊຶ່ງເປັນຫຼຽນຄຳປະຫັວດສາດ ໃຫ້ແກ່ວົງການກິລາຄົນພິການລາວ.
ໃນໂອກາດນີ້ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີໄດ້ມີຄໍາເຫັນວ່າ: ພັກ ແລະ ລັດຖະບານຍາມໃດກໍ່ໃຫ້ຄວາມສໍາຄັນແກ່ການກິລາກາຍຍະກໍາ ເຊິ່ງເປັນການສ້າງໃຫ້ຄົນເຮົາມີຄວາມແຂງແຮງທາງດ້ານຮ່າງກາຍ, ແຂງແກ່ນດ້ານຈິດໃຈ, ທັງຍັງສາມາດເຕົ້າໂຮມຄວາມສາມັກຄີຮັກແພງ, ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ທັງພາຍໃນ ແລະ ຕ່າງປະເທດ ທັງສ້າງເງື່ອນເພື່ອພັດທະນາເສດຖະກິດ-ສັງຄົມແຫ່ງຊາດ. ສິ່ງສຳຄັນທີ່ສຸດ ກິລາກາຍະກຳແມ່ນການຝຶກໃຫ້ຄົນມີລະບຽບວິໄນທີ່ເຂັ້ມງວດ ເຊິ່ງເປັນຄຸນລັກຊະນະສຳຄັນຂອງຊັບພະຍາກອນມະນຸດ ຂອງສ່ວນລວມເຮົາໂດຍສະເພາະຄົນຮຸ່ນໜຸ່ມ ທີ່ເປັນອານາຄົດຂອງປະເທດຊາດ. ສະນັ້ນ ໃນໄລຍະຜ່ານມາພັກ ແລະ ລັດຈິ່ງໄດ້ພະຍາຍາມສ້າງໂອກາດ ແລະ ເງື່ອນໄຂ ໃຫ້ຊາວໜຸ່ມເຍົາວະຊົນ ໄດ້ເຂົ້າຮ່ວມໃນວຽກງານກິລາກາຍຍະກໍາ ກໍ່ຄືເຂົ້າຮ່ວມການແຂ່ງຂັນລະດັບນາໆຊາດ ເພື່ອພັດທະນາກິລາຂອງລາວໃຫ້ສູງຂຶ້ນເທື່ອລະກ້າວ.
ສຳລັບການກະກຽມເຂົ້າຮ່ວມແຂ່ງຂັນງານມະຫາກຳກິລາເອຊຽນເກມຄັ້ງທີ 19 ທີ່ຫາງໂຈຂອງຄັ້ງນີ້ ອີງໃສ່ເງື່ອນໄຂ ແລະ ສະພາບຕົວຈິງໃນປະຈຸບັນກົມກິລາລະດັບສູງສົມທົບກັບ ຄະນະກຳມະການໂອແລມປິກແຫ່ງຊາດລາວ ແລະ ສະຫະພັນກິລາແຫ່ງຊາດ ໄດ້ຕົກລົງເປັນເອກະພາບສົ່ງ 15 ປະເພດກິລາເຂົ້າຮ່ວມ, ຈຳນວນພົນທັງໝົດ 152 ຄົນ, ມີ 11 ປະເພດຄື: ວູຊູ,ກະຕໍ້, ລົດຖີບ, ເທຄວັນໂດ, ມວຍສາກົນ, ຢູໂດ,ແລ່ນ-ລານ, ລອຍນໍ້າ, ກາຣາເຕ,ມວຍປໍ້າ ແລະ ຈຸຈິດສູ; ນອກນີ້ຍັງມີ ປະເພດກິລາທີ່ມອບໃຫ້ກຸ້ມຕົນເອງດ້ານງົບປະມານຮັບໃຊ້ ມີ 05 ປະເພດຄື: ກອ໊ຟ, ອີສະປອດ, ຢິມນາສະຕິກ, ເບສະບອນ ແລະ ຍິງປືນ.ສ່ວນງານແຂ່ງຂັນກິລາເອຊຽນພາຣາເກມ ຄັ້ງທີ IV ລາວເຮົາໄດ້ສົ່ງນັກກິລາເຂົ້າຮ່ວມທັງໝົດ 05 ປະເພດກິລາ ຄື: ກິລາແລ່ນ-ລານ, ກິລາລອຍນ້ຳ, ກິລາຍົກນ້ຳໜັກ, ກິລາລົດຖີບ ແລະ ກິລາບານບ້ວງລໍ້ເລື່ອນ ທີມຍິງ ແລະ ຕອນທ້າຍຂອງພິທີຍັງໄດ້ມີພິທີມອບຮັບເງິນ ແລະ ວັດຖຸ ເພື່ອສະໜັບສະໜູນນັກກິລາຄັ້ງນີ້ຈາກບັນດາບໍລິສັດລວມມູນຄ່າທັງໝົດຫລາຍກວ່າ 667.000 000 ກີບ.%
ຂຽນໂດຍ: ບຸນຍັງ ພຸດສະຫວັດ
