ໃນວັນທີ 25 ກໍລະກົດ 2024 ທີ່ເຮືອນຮັບແຂກຫົວພັນ-ແທັງຮວ່າ ແຂວງຫົວພັນ, ຄະນະຄຸ້ມຄອງຊາວຫວຽດນາມຮ່ວມກັບ ການນໍາແຂວງຫົວພັນ, ເຊິ່ງນຳໂດຍ ສະຫາຍ ຄໍາແພງ ໄຊສົມແພງ ກຳມະການສູນກາງພັກ ເລຂາພັກແຂວງເຈົ້າແຂວງໆຫົວພັນ ໄດ້ເຂົ້າຮ່ວມໄວ້ອາໄລຕໍ່ການຈາກໄປຂອງສະຫາຍ ຫງວຽນ ຝູ໋ຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ.
ຄະນະບໍລິຫານງານພັກ ແຂວງຫົວພັນ ມີຄວາມໂສກເສົ້າສະຫລົດໃຈຢ່າງສຸດຊຶ້ງ ຕໍ່ການຈາກໄປບໍ່ມີວັນຫວນກັບຂອງ ສະຫາຍ ຫງວຽນ ຝູ໋ຈ້ອງ ອະດີດເລຂາທິການໃຫຍ່ຄະນະບໍລິຫານງານສູນກາງພັກ ແຫ່ງ ສສ ຫວຽດນາມ ຜູ້ທີ່ແສນເຄົາລົບຮັກ ຂອງປະຊາຊົນບັນດາເຜົ່າຊາວຫວຽດນາມ ໃນວັນທີ 19 ກໍລະກົດ 2024 ຜ່ານມາ.
ສະຫາຍ ຄໍາແພງ ໄຊສົມແພງ ໄດ້ກ່າວວ່າ: ຕາງໜ້າຄະນະບໍລິຫານງານພັກແຂວງ, ສະພາປະຊາຊົນແຂວງ, ແນວລາວສ້າງຊາດແຂວງ ແລະ ປະຊາຊົນບັນດາເຜົ່າແຂວງຫົວພັນ ຂໍສະແດງຄວາມເສົ້າສະຫລົດໃຈ, ອາໄລອາວອນມາຍັງ ພັກ-ລັດຖະບານ ແລະ ປະຊາຊົນບັນດາເຜົ່າຫວຽດນາມ, ຕະຫລອດຮອດຄອບຄົວ, ຍາດພີ່ນ້ອງຂອງ ສະຫາຍ ຫງວຽນ ຝູ໋ຈ້ອງ, ໃນຕະຫລອດຊີວິດຂອງ ສະຫາຍໄດ້ອຸທິດແກ່ການເຄື່ອນໄຫວປະຕິວັດ ແລະ ພາລະກິດປ່ຽນແປງໃໝ່, ໄດ້ປະກອບສ່ວນອັນສຳຄັນເຂົ້າໃນການເພີ່ມພູນຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ- ຫວຽດນາມ, ຫວຽດນາມ-ລາວ ຕະຫລອດໄປ.
ຂ່າວ: ສົມໝາຍ, ພາບ: ສີອຳພອນ
