ໃນວັນທີ 28 ສິງຫາ 2023 ທີ່ສຳນັກງານຄະນະຈັດຕັ້ງສູນກາງພັກ ສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ຕ້ອນຮັບການເຂົ້າພົບປະ ແລະ ເຮັດວຽກຂອງຄະນະຜູ້ແທນຂອງ ສປ ຈີນ ຊຶ່ງນຳໂດຍສະຫາຍ ລີຈືຢົງ ປະທານສະພາຄົ້ນຄວ້າວຽກງານກໍ່ສ້າງພັກທົ່ວປະເທດຈີນ, ອະດີດຮອງເລຂາພັກຄະນະກຳມະການວຽກງານກໍ່ສ້າງພັກຂອງອົງການອ້ອມຂ້າງສູນກາງພັກ-ລັດ ສປ ຈີນ ພ້ອມດ້ວຍຄະນະ.
ຈຸດປະສົງການມາຢ້ຽມຢາມລາວໃນຄັ້ງນີ້ ຂອງຄະນະຜູ້ແທນ ສປ ຈີນ ແມ່ນເພື່ອຮັດແໜ້ນຄວາມສາມັກຄີ, ເສີມຂະຫຍາຍສາຍພົວພັນບ້ານໃກ້, ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ, ຄູ່ຮ່ວມມືທີ່ດີ ໃນຂົງເຂດວຽກງານກໍ່ສ້າງພັກຂອງສອງພັກ, ສອງຄະນະຈັດຕັ້ງສູນກາງພັກ ເພື່ອກ້າວໄປສູ່ການຮ່ວມມືກັນລະຫວ່າງສອງຄະນະຈັດຕັ້ງສູນກາງພັກເຂົ້າສູ່ລວງເລິກ.
ໃນໂອກາດການພົບປະ ແລະ ເຮັດວຽກຮ່ວມກັນທັງສອງຝ່າຍ ໄດ້ແຈ້ງສະພາບການທີ່ພົ້ນເດັ່ນຂອງສອງພັກ ໃນການຈັດຕັ້ງປະຕິບັດມະຕິກອງປະຊຸມໃຫຍ່ຂອງແຕ່ລະພັກໃຫ້ກັນຊາບ. ຈາກນັ້ນ, ໄດ້ປຶກສາຫາລື ແລະ ລົງເລິກແລກປ່ຽນກ່ຽວກັບວຽກງານກໍ່ສ້າງພັກ; ໃນບົດແຈ້ງສະພາບ, ພາຍຫຼັງໄດ້ຍົກໃຫ້ເຫັນສະພາບລວມການຜັນຂະຫຍາຍ, ຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ຕິດພັນກັບການປະຕິບັດແຜນພັດທະນາເສດຖະກິດ-ສັງຄົມ 5 ປີ ແຫ່ງລັດ ຄັ້ງທີ IX, ການຈັດຕັ້ງປະຕິບັດ 02 ວາລະແຫ່ງຊາດ; ສະຫາຍ ນາງ ບຸດສະດີ ທະນະເມືອງ ໄດ້ຍົກໃຫ້ເຫັນສະພາບການກໍ່ສ້າງພັກ ທາງດ້ານການຈັດຕັ້ງ, ວຽກງານປັບປຸງຮາກຖານພັກ, ວຽກງານຂະຫຍາຍພັກ, ວຽກງານກະກຽມ ແລະ ດຳເນີນກອງປະຊຸມໃຫຍ່ຂອງພັກ ໃຫ້ທາງຝ່າຍຈີນຊາບ. ເມື່ອຫວນຄືນສາຍພົວພັນ ແລະ ການຮ່ວມມືລະຫວ່າງສອງພັກ, ສອງລັດ ປະຊາຊົນສອງຊາດລາວ-ຈີນ, ຈີນ-ລາວ ໃນໄລຍະຜ່ານມາ, ໂດຍສະເພາະໃນໄລຍະທີ່ທັງສອງພັກ, ລັດຖະບານຂອງສອງປະເທດ ໄດ້ຕົກລົງເປັນເອກະພາບກັນຍົກລະດັບການພົວພັນລາວ-ຈີນ ຈາກ “ຄູ່ຮ່ວມມືຍຸດທະສາດຮອບດ້ານ” ມາເປັນ “ຄູ່ຮ່ວມຊະຕາກຳລາວ-ຈີນ”. ພັກປະຊາຊົນປະຕິວັດລາວ ຍາມໃດ ກໍ່ຈົດຈຳ ແລະ ຮູ້ບຸນຄຸນ ຕໍ່ການຊ່ວຍເຫຼືອອັນຈິງໃຈ ຈາກພັກ, ລັດຖະບານ ສປ ຈີນ ໃນການໃຫ້ທຶນກໍ່ສ້າງ-ບຳລຸງພະນັກງານນຳພາ-ຄຸ້ມຄອງຂອງລາວ ມາຕະຫຼອດ ບໍ່ວ່າແຕ່ໃນໄລຍະສົງຄາມ ກໍ່ຄືໃນປະຈຸບັນ; ໄລຍະປີ 2021-2025 ລັດຖະບານ ສປ ຈີນ ໃຫ້ທຶນກໍ່ສ້າງ-ບຳລຸງພະນັກງານຂອງລາວ ຈຳນວນ 1.200 ທຶນ, ສະເລ່ຍປີລະ 240 ທຶນ ເຊິ່ງທາງຝ່າຍລາວ ພວກເຮົາຈະໄດ້ສ້າງແຜນອົບຮົມ ແຕ່ລະເປົ້າໝາຍ ເພື່ອຈັດຕັ້ງປະຕິບັດໃຫ້ເປັນຮູບປະທຳ. .
ໂອກາດການມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ຄະນະຜູ້ແທນ ສປ ຈີນ ຍັງໄດ້ເຂົ້າຢ້ຽມຂ່ຳນັບສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະຈັດຕັ້ງສູນກາງພັກປະຊາຊົນປະຕິວັດລາວ; ລົງຢ້ຽມຢາມໜ່ວຍພັກບ້ານນາທອງ ເປັນໜ່ວຍພັກໜຶ່ງທີ່ຂຶ້ນກັບຄະນະພັກຮາກຖານກຸ່ມນາລ້ອງກວາງ ເມືອງວັງວຽງ ແຂວງວຽງຈັນ ໃນການນຳພາການພັດທະນາເສດຖະກິດ-ສັງຄົມ, ແກ້ໄຂຄວາມທຸກຍາກຂອງປະຊາຊົນ; ໄປທ່ຽວຊົມພະທາດຫຼວງວຽງຈັນ ປູຊະນີຍະສະຖານອັນງົດງາມ ທີ່ມີຄຸນຄ່າທາງປະຫວັດສາດ, ສີລະປະ ແລະ ວັດທະນະທຳຂອງລາວ. ນອກຈາກນີ້, ຍັງໄດ້ຢ້ຽມຢາມສະຖາບັນຂົງຈື ມະຫາວິທະຍາໄລແຫ່ງຊາດ ຊຶ່ງເປັນສະຖາບັນທີ່ໄດ້ຮັບການສ້າງຕັ້ງຂຶ້ນ ບົນພື້ນຖານການຮ່ວມມືຂອງສອງລັດຖະບານ ລາວ-ຈີນ ໂດຍຈຸດປະສົງແມ່ນເພື່ອສົ່ງເສີມການສຶກສາທາງດ້ານພາສາຈີນ ແລະ ສົ່ງເສີມແລກປ່ຽນວັດທະນະທຳອັນດີງາມຂອງສອງຊາດ ລາວ-ຈີນ ໃຫ້ນັບມື້ງອກງາມ ເກີດດອກອອກຜົນຍິ່ງຂຶ້ນ.
ພາບ;ຂ່າວ: ສ.ສົດໃສ
