ໃນວັນທີ 29 ມິຖຸນາ 2024 ທີ່ແຂວງອັດຕະປື, ຄະນະຊາວໜຸ່ມ ແຂວງອັດຕະປື ແລະ ຂະບວນອາສາສະໝັກ ຄະນະຊາວໜຸ່ມລະດູແລ້ງສີແດງ ນະຄອນໂຮ່ຈີ່ມິງ ສສ ຫວຽດນາມ ສະຫລຸບຜົນສໍາເລັດ ການເຄື່ອນໄຫວຂະບວນການຈັດກິດຈະກຳຕ່າງໆ ທີ່ລົງຊ່ວຍເຫລືອດ້ານສັງຄົມ ຢູ່ແຂວງອັດຕະປື ໃນລະຫວ່າງວັນທີ 16-22 ມິຖຸນາ 2024 ຜ່ານມາ ໂດຍການເຂົ້າຮ່ວມຂອງທ່ານ ບຸນໂຮມ ພົມມະສານ ປະທານແນວລາວສ້າງຊາດ ແຂວງອັດຕະປື, ທ່ານ ເຈືອງເຕີນຫງຽບ ຫົວໜ້າຄະນະຊາວໜຸ່ມ ອາສາສະໝັກ ລະດູແລ້ງສີແດງ ນະຄອນໂຮ່ຈີ່ມິງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ບັນດາກິດຈະກຳຕ່າງໆ ທີ່ໄດ້ລົງເຄື່ອນໄຫວ ຢູ່ບັນດາໂຮງຮຽນ 5 ຕົວເມືອງ ແລະ ອ້ອມຂ້າງແຂວງອັດຕະປື ປະກອບມີ ກິດຈະກຳການກວດພະຍາດ ແລະ ຈ່າຍຢາໂດຍບໍ່ເສຍຄ່າ, ຈັດຝຶກອົບຮົມວຽກງານກະສິກຳ, ກິດຈະກຳສ້າງເຮືອນມິດຕະພາບ ໃຫ້ຄອບຄົວຜູ້ທຸກຍາກ, ກິດຈະກຳມອບເຄື່ອງຊ່ວຍເຫລືອໃຫ້ປະຊາຊົນ ແລະ ນ້ອງນ້ອຍເຍົາວະຊົນ ແລະ ກິດຈະກຳອື່ນໆ ລວມມູນຄ່າຊ່ວຍເຫລືອທັງໝົດ 2 ຕື້ກວ່າກີບ, ເຊິ່ງມີຜູ້ເຂົ້າຮ່ວມກິດຈະກໍາຫລາຍກວ່າ 3.000 ຄົນ, ໃນການເຄື່ອນໄຫວກິດຈະກຳໃນຄັ້ງນີ້ ເປັນເຫດການ ທີ່ມີຄວາມໝາຍຄວາມສໍາຄັນອີກເຫດການໜຶ່ງ, ເຊິ່ງເວລາໃດການພົວພັນຮ່ວມມືຮອບດ້ານ ຂອງສອງພັກ, ສອງລັດ, ປະຊາຊົນສອງຊາດ ໂດຍສະເພາະ ການຮ່ວມມືລະຫວ່າງ ຊາວໜຸ່ມ 2 ຊາດ ລາວ-ຫວຽດນາມ ໄດ້ພ້ອມກັນເສີມຂະຫຍາຍມູນເຊື້ອອັນດີງາມ ແລະ ເສີມສ້າງສາຍພົວພັນການຮ່ວມມື ໃຫ້ຈະເລີນງອກງາມຕະຫລອດໄປ, ການພົວພັນຮ່ວມມື ຂອງຄະນະຊາວໜຸ່ມປະຊາຊົນປະຕິວັດລາວ ແຂວງອັດຕະປື ກັບຄະນະຊາວໜຸ່ມ ນະຄອນໂຮ່ຈີ່ມິງ ໃນໄລຍະຜ່ານມາ ທີ່ໄດ້ຊ່ວຍເຫລືອເຊິ່ງກັນ ແລະ ກັນ ບົນຈິດໃຈໄມຕີຈິດ ມິດຕະພາບ ຄວາມສາມັກຄີແບບພິເສດ ການຮ່ວມມືຮອບດ້ານ, ຮັກແພງອຸ້ມຊູຊ່ວຍເຫລືອເຊິ່ງກັນ ແລະ ກັນ.
ໂອກາດດຽວກັນນີ້, ຂະບວນຊາວໜຸ່ມອາສາສະໝັກ ໃນຄັ້ງນີ້ ຍັງໄດ້ຮັບໃບຍ້ອງຍໍ ຈາກເຈົ້າແຂວງອັດຕະປືຕື່ມອີກ ເນື່ອງຈາກມີຜົນງານດີເດັ່ນ ໃນການປະກອບສ່ວນອັນສຳຄັນ ເຂົ້າໃນການຊ່ວຍເຫລືອສັງຄົມ ໃນແຂວງອັດຕະປື.
ຂ່າວ: ໄພບູນ
