ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 19 ມີຖຸນາ 2024 ນີ້ ຄະນະຊາວໜຸ່ມອາສາສະໝັກລະດູແລ້ງສີແດງ ນະຄອນໂຮ່ຈິມິນ ສສ ຫວຽດນາມ ຮ່ວມກັບ ຄະນະຊາວໜຸ່ມ ປປລ ແຂວງ ອັດຕະປື ສປປ ລາວ ໄດ້ເຄື່ອນໄຫວຈັດກິດຈະກຳຊ່ວຍເຫຼືອ ປະຊາຊົນບັນດາເຜົ່າພາຍໃນ ເມືອງ ຊານໄຊ ແຂວງ ອັດຕະປື ເຊິ່ງນໍາພາໂດຍ ສະຫາຍ ນ. ທິຮ໊າຍເຊິນ ຮອງຫົວໜ້າຄະນະຊາວໜຸ່ມອາສາສະໝັກລະດູແລ້ງສີແດງ ນະຄອນໂຮ່ຈິມິນ, ມີສະຫາຍ ພູວັນ ພົມມະຈັນ ກໍາມະການພັກແຂວງ ກໍາມະການສູນກາງຊາວໜຸ່ມ ປປລາວ ເລຂາຄະນະບໍລິຫານງານຊາວໜຸ່ມແຂວງ ອັດຕະປື ພ້ອມດ້ວຍຄະນະ ໃຫ້ກຽດຕ້ອນຮັບໂດຍ ສະຫາຍ ບົວຄໍາ ຮຽງລາເຢ ຄະນະປະຈໍາພັກເມືອງ ຫົວໜ້າຄະນະໂຄສະນາອົບຮົມເມືອງພ້ອມຄະນະກ່ຽວຂ້ອງ ແລະ ພໍ່ແມ່ປະຊາຊົນພາຍໃນເມືອງ ຊານໄຊ ເຂົ້າຮ່ວມ.
ໃນໂອກາດດັ່ງກ່າວ ຄະນະຊາວໜຸ່ມອາສາສະໝັກລະດູແລ້ງສີແດງ ນະຄອນໂຮ່ຈິມິນ ສສ ຫວຽດນາມ ຮ່ວມກັບ ຄະນະຊາວໜຸ່ມ ປປລ ແຂວງ ອັດຕະປື ກໍໄດ້ນໍາພາຈັດກິດຈະກໍາ ແລະ ມອບເຄື່ອງຊ່ວຍເຫຼືອໃຫ້ບັນດາກຸ່ມເປົ້າໝາຍຕາມແຜນທີ່ລະບຸໄວ້ ເຊິ່ງບັນລຸໄດ້ 5 ກິດຈະກໍາຫຼັກຄື: ມອບເຄື່ອງບັນເທົາທຸກໃຫ້ຄອບຄົວທຸກຍາກ ຈໍານວນ 50 ຄອບຄົວ, ລົງຊຸກຍູ້ ແລະ ອົບຮົມວິທີການປູກພືດ-ຜັກ ໃຫ້ຄອບຄົວຕົວແບບກະສິກໍາ ຈໍານວນ 2 ຄອບຄົວ ຢູ່ບ້ານ ດາກຮຽດ ແລະ ບ້ານ ສົມບູນ ພ້ອມທັງສະໜອງແນວພັນພືດຈຳນວນໜຶ່ງ, ມອບປື້ມຂຽນຈໍານວນ 1000 ຫົວ ໃຫ້ຫ້ອງການສຶກສາທິການ ແລະ ກິລາເມືອງ ເພື່ອແຈກຢາຍໃຫ້ຄອບຄົວນັກຮຽນທີ່ທຸກຍາກ, ນໍາພານ້ອງນ້ອຍເຍົາວະຊົນເຕັ້ນແອໂຣບິກ, ແຕ້ມຮູບພາບພ້ອມແນະນໍາວິທີການລະບາຍສີ ໃນນັ້ນ ໄດ້ມອບອຸປະກອນການຮຽນ ຈໍານວນ 50 ນ້ອງ ແລະ ມອບເຄື່ອງຊ່ວຍເຫຼືອໃຫ້ໂຮງໝໍເມືອງ ປະກອບມີ: ລໍ້ຍູ້ຄົນເຈັບ 1 ຄັນ, ຜ້າອັດປາກ 2 ແກັດ, ພ້ອມກວດພະຍາດ ຈ່າຍຢາໂດຍບໍ່ເສຍຄ່າ ໃຫ້ພໍ່ແມ່ປະຊາຊົນທັງຜູ້ໃຫຍ່ ແລະເດັກນ້ອຍ ຕາມແຜນ 500 ຄົນ, ແຕ່ປະຕິບັດຕົວຈິງໄດ້ 700 ຄົນ, ຍິງ 372 ຄົນ, ເທົ່າກັບ 140 %, ປະຕິບັດໄດ້ລື່ນແຜນ, ລວມຜູ້ເຂົ້າຮ່ວມຂະບວນການທັງໝົດໃນຄັ້ງນີ້ 800 ຄົນ, ຍິງ 472ຄົນ.
ພາບ-ຂ່າວ: ອັດອີສານ ບຽດມະນີ