ພາຍຫລັງເຄື່ອນໄຫວຢ້ຽມຢາມແລະເຮັດວຽກຢູ່3ເເຂວງເປັນຕົ້ນ:ນະຄອນຫລວງຮ່າໂນ້ຍ, ເເຂວງເງະອ່ານ ເເລະເເຂວງຮ່າຕີງສາທາລະນະລັດສັງຄົມນິຍົມຫວຽດນາມເປັນເວລາ6ວັນນັບເເຕ່ວັນທີ23ຫາວັນທີ28ຕຸລາ2022,ຄະນະນັກຂ່າວ3ຄົນຂອງວິທະຍຸກະຈາຍສຽງແຫ່ງຊາດລາວແລະຄະນະ ນັກຂ່າວຂອງວິທະຍຸກະຈາຍສຽງຫວຽດນາມຫລືVOV3ຄົນໄດ້ສືບຕໍ່ເດີນທາງມາເຄື່ອນໄຫວຢ້ຽມຢາມແລະສໍາພາດຂ່າວຢູ່ລາວນັບເເຕ່ວັນທີ29ຕຸລາຫາ3ພະຈິກ2022ເປັນຕົ້ນ:ຢູ່ເເຂວງບໍລິຄໍາໄຊ,ຄໍາມ່ວນ,ນະຄອນຫລວງວຽງຈັນເເລະເເຂວງວຽງຈັນເຊິ່ງຄະນະໄດ້ເດີນທາງມາເຖິງນະຄອນຫລວງວຽງຈັນຕອນແລງ ຂອງວັນທີ31ຕຸລາ2022ໂດຍການຕ້ອນຮັບຂອງທ່ານສັງຂານຈູມຄໍາພັນ ຮອງຜູ້ອໍານວຍການ ໃຫ່ຍວິທະຍຸກະຈາຍສຽງ ແຫ່ງຊາດລາວ.
ໂອກາດນີ້ ທ່ານສັງຂານ ຈູມຄໍາພັນ ຮອງຜູ້ອໍານວຍການໃຫ່ຍ ວິທະຍຸກະຈາຍສຽງແຫ່ງຊາດລາວ ໄດ້ສະເເດງຄວາມຕ້ອນຮັບເເລະຕີລາຄາສູງຕໍ່ການເດີນທາງມາເຄື່ອນໄຫວຢ້ຽມຢາມເເລະເຮັດວຽກຢູ່ ລາວຂອງຄະນະນັກຂ່າວວິທະຍຸກະຈາຍສຽງຫວຽດນາມຈໍານວນ3ຄົນເຊີ່ງຢູ່ໃນທ່າມກາງບັນຍາກາດທີ່ສອງພັກ,ສອງລັດເເລະປະຊາຊົນສອງຊາດຫວຽດນາມລາວໄດ້ມີກິດຈະກໍາສໍາຄັນຕ່າງໆໃນປີສາມັກຄີ ມິດຕະພາບລາວຫວຽດນາມປີ2022ເປັນການປະກອບສ່ວນເຂົ້າໃນການເພີ່ມພູມຄູນສ້າງສາຍພົວພັນມິດຕະພາບທີ່ຍີ່ງໃຫຍ່,ຄວາມສາມັກຄີເເບບພິເສດເເລະການຮ່ວມມືຮອບດ້ານລະຫວ່າງສອງພັກ,ສອງລັດ ເເລະປະຊາຊົນສອງຊາດຫວຽດນາມ-ລາວໃຫ້ນັບມື້ເເຕກດອກອອກຜົນຍີ່ງໆຂື້ນ.
ປົກກະຕິແລ້ວ ວິທະຍຸກະຈາຍສຽງແຫ່ງຊາດລາວ ແລະ ວິທະຍຸກະຈາຍສຽງຫວຽດນາມ ໄດ້ມີການພົວພັນຮ່ວມມືກັນໃນດ້ານຕ່າງໆ ໂດຍສະເພາະການເດີນທາງຢ້ຽມຢາມເຊີ່ງກັນເເລະກັນ ລະຫວ່າງການນໍາວິທະຍຸຂອງ2ປະເທດຍົກລະດັບຄວາມຮູ້ຄວາມສາມາດດ້ານບຸກຄະລາກອນ,ການປັບປຸງດ້ານເຕັກການກະຈາຍສຽງເເລະອື່ນໆເປັນລາດົນສົມຄວນແຕ່ຍ້ອນສະພາບການລະບາດຂອງພະ ຍາດໂຄວິດ19ໃນໄລຍະ3ປີຜ່ານມາພວກເຮົາຈຶ່ງບໍ່ໄດ້ໄປມາຫາສູ່ກັນໄລຍະໜຶ່ງແລະປີນີ້ເຊິ່ງປີທີ່ສອງປະເທດໄດ້ເປີດປະເທດຈຶ່ງໄດ້ຈັດກິດຈະກໍານີ້ຂຶ້ນ,ເພື່ອເເລກປ່ຽນຂໍ້ມູນຂ່າວສານຮ່ວມກັນເພື່ອໃຫ້ປະຊາຊົນສອງປະເທດໄດ້ຮັບຮູ້ເຖີງມູນເຊື້ອແຫ່ງການພົວພັນຮ່ວມມືໃນດ້ານຕ່າງໆລະຫວ່າງສອງພັກ, ສອງລັດ ລາວຫວຽດນາມ,ຫວຽດນາມລາວນັບເເຕ່ອະດີດຈົນເຖີງປັດຈຸບັນ ເຊີ່ງເປັນການພົວພັນ ທີ່ສະນິດສະຫນົມເເລະຫາຍາກທີ່ສຸດໃນໂລກ.
ການເຄື່ອນໄຫວຢ້ຽມຢາມເເລະເຮັດວຽກຮ່ວມກັນຂອງຄະນະນັກຂ່າວວິທະຍຸກະຈາຍສຽງ ຫວຽດນາມແລະຄະນະນັກຂ່າວຂອງວິທະຍຸກະຈາຍສຽງເເຫ່ງຊາດລາວໃນຄັ້ງນີ້ຖືເປັນຄັ້ງທໍາອິດ ເເລະ ເປັນຄັ້ງປະຫວັດສາດ ທີ່ສອງວິທະຍຸລາວ-ຫວຽດນາມ ຮ່ວມກັນຈັດຂື້ນ ໂດຍອີງໃສ່ທິດໂຄສະນາຂອງ ກະຊວງຖະແຫລງຂ່າວ,ວັດທະນະທຳແລະທ່ອງທ່ຽວຂອງລາວ,ອີງໃສ່ການພົວພັນຮ່ວມມືລະຫວ່າງ ວິທະຍຸກະຈາຍເເຫ່ງຊາດລາວເເລະວິທະຍຸກະຈາຍສຽງຫວຽດນາມໃນການເເລກປ່ຽນຂໍ້ມູນຂ່າວສານ ຮ່ວມກັນເພື່ອໂຄສະນາໃຫ້ແກ່ການສະເຫລີມສະຫລອງປີສາມັກຄີກໍ່ຄື2ວັນປະຫວັດສາດລະຫວ່າງ ລາວ-ຫວຽດນາມ, ຫວຽດນາມ-ລາວ 2022,ໃຫ້ມີບັນຍາກາດຟົດຟື້ນ.
ສໍາລັບກ່ອນຫນ້າທີ່ຄະນະນັກຂ່າວວິທະຍຸກະຈາຍສຽງເເຫ່ງຊາດລາວ3ຄົນເເລະຄະນະນັກຂ່າວຂອງວິທະຍຸກະຈາຍສຽງຫວຽດນາມຈໍານວນ3ຄົນຈະເດີນທາງມາເຖີງນະຄອນຫລວງວຽງຈັນຄະນະ ໄດ້ເຄື່ອນໄຫວສໍາພາດຄວາມຮູ້ສຶກຂອງ ບັນດາຊ່ຽວຊານ ເເລະ ທະຫານອາສາສະຫມັກຫວຽດນາມ ທີ່ເຄີຍໄປເຄື່ອນໄຫວຮ່ວມສໍາພັນສູ້ຮົບຊ່ວຍຜູ້ນໍາການປະຕິວັດຢູ່ລາວໃນເມື່ອກ່ອນຢູ່ນະຄອນຫລວງ ຮ່າໂນ້ຍ,ຈາກນັ້ນໄດ້ສືບຕໍ່ເຄື່ອນໄຫວສໍາພາດອະທິການບໍດີມະຫາວິທະຍາໄລວິ້ງກ່ຽວກັບການບໍາລຸງສ້າງນັກສຶກສາລາວ,ສໍາພາດຄະນະນໍາຄະນະໂຄສະນາສຶກສາເເລະເຮັດວຽກຮ່ວມກັບຄະນະບໍລິຫານງານ ຊາວຫນຸ່ມເເຂວງເງະອານນອກຈາກນີ້ໄດ້ເດີນທາງໄປເເຂວງຮ່າຕີງເພື່ອເຮັດວຽກຮ່ວມກັບຄະນະນໍາບໍລິສັດຊີພິທ່າເຮືອສາກົນລາວ-ຫວຽດນາມ(ທ່າເຮືອຫວຸງອ່າງ),ສໍາພາດຄວາມຮູ້ສຶກນ້ອງຊາຍຂອງທ່ານ ເລທ້ຽວຮຸຍ ຮອງຫົວຫນ້າກອງບັນຊາການ ຫົວຫນ້າເສນາທິການກອງທະຫານພັນທະມິດລາວ-ຫວຽດນາມຜູ້ທີ່ເຄີຍຊ່ວຍເຫລືອຜູ້ນໍາການປະຕິວັດລາວໃນການຕໍ່ສູ້ຕ້ານກັບຈັກກະພັດຜູ້ຮຸກຮານ,ສໍາພາດການນໍາເເຂວງຮ່າຕີງ ກ່ຽວກັບການພົວພັນຮ່ວມມືກັບລາວໂດຍສະເພາະບັນດາເເຂວງເເຮກສ່ຽວ ເເລະບັນດາເເຂວງລຽບຕາມຊາຍເເດນ,ຢ້ຽມຢາມບ້ານຊົນເຜົ່າກຶມມຸ,ເຮັດວຽກຮ່ວມກັບຄະນະນໍາກອງບັນຊາການທະຫານປ້ອງກັນຊາຍເເດນດ່ານສາກົນເກົ່າເເຈ່ວຮ່າຕີງ,ນອກຈາກນີ້ຄະນະນັກຂ່າວວິທະຍຸ ກະຈາຍສຽງເເຫ່ງຊາດລາວຈໍານວນ3ຄົນ ເເລະ ຄະນະ ນັກຂ່າວວິທະຍຸກະຈາຍສຽງຫວຽດນາມຫລື VOV ຈໍານວນ3ຄົນ ໄດ້ສືບຕໍ່ເຮັດວຽກຢູ່ເເຂວງບໍລີຄໍາໄຊ,ຄໍາມ່ວນ,ວຽງຈັນ ເເລະ ນະຄອນຫລວງວຽງຈັນ ຂອງລາວຕື່ມອີກໂດຍນໍາໃຊ້ເວລາທັງຫມົດ12ວັນນັບເເຕ່ວັນທີ23ຕຸລາ2022 ຫາ 3 ພະຈິກ 2022.
