ວັນທີ 28 ກັນຍາ 2022 ນີ້, ຄະນະນຳກອງບັນຊາການທະຫານແຂວງຫຼວງພະບາງ, ນໍາໂດຍ ພັນເອກ ສີວິໄຊ ເພັງສັນ ຕິສຸກ ຫົວໜ້າການເມືອງກອງບັນຊາການທະຫານແຂວງ, ໄດ້ເຂົ້າອວຍພອນ ຄະ ນະນຳ ແລະພະນັກງານກົງສູນໃຫຍ່ ສາ ທາລະນະລັດ ປະຊາຊົນຈີນ ປະຈໍາພາກເໜືອ ທີ່ແຂວງຫຼວງພະບາງ, ໂອກາດວັນຊາດຂອງ ສປ ຈີນ ຄົບຮອບ 73 ປີ, ມີ ທ່ານ ຫຼີ້ຈື້ກົ່ງ ຫົວໜ້າກົງສູນໃຫຍ່ ສປ ຈີນ ພ້ອມດ້ວຍຄະນະໄດ້ໃຫ້ການຕ້ອນຮັບຢ່າງອົບອຸ່ນ. ໂອກາດນີ້ ພັນເອກ ສີວິໄຊ ເພັງສັນຕິສຸກ ໄດ້ທົບທວນຫວນຄືນມູນເຊື້ອຄວາມສາມັກຄີຊ່ວຍເຫຼືອເຊິ່ງກັນ ແລະກັນ, ໂດຍສະເພາະ ໄລຍະການແຜ່ລະບາດຂອງພະຍາດໂຄວິດ 19 ກະຊວງປ້ອງກັນຊາດຂອງ ສປປ ລາວ ໄດ້ຮັບການຊ່ວຍເຫຼືອຈໍານວນຫຼາຍຈາກ ສປ ຈີນ, ພ້ອມນີ້ກອງບັນຊາການທະຫານແຂວງຫຼວງພະບາງ, ໄດ້ໃຫ້ການຊ່ວຍເຫຼືອ ແລະໄດ້ຮັບທຶນຊຸກຍູ້ວຽກງານຈໍານວນໜຶ່ງ ຈາກລັດຖະບານ ສປ ຈີນ, ຕອນທ້າຍ ທ່ານໄດ້ອວຍພອນສາຍພົວພັນຮ່ວມມືມິດຕະພາບ ອັນເປັນມູນເຊື້ອຄວາມສາມັກຄີ ລະຫ່ວາງ ສອງພັກ – ສອງລັດ, ປະຊາຊົນສອງຊາດລາວ – ຈີນ ຈົ່ງໝັ້ນຄົງທະນົງແກ່ນຕະຫຼອດໄປ.
ຂ່າວ-ພາບ: ບຸນເພັງ ວົງແກ້ວມະນີ.
