ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຄະນະນຳກະຊວງສາທາລະນະສຸກ ເຄື່ອນໄຫວຊຸກຍູ້ວຽກງານສາທາລະນະສຸກຢູ່ແຂວງຫຼວງພະບາງ

ວັນທີ່ 16 ກໍລະກົດ 2020 ນີ້ ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະ ໄດ້ເຄື່ອນໄຫວຊຸກຍູ້ວຽກງານສາທາລະນະສຸກ ຢູ່ແຂວງຫຼວງພະບາງ ໂດຍໄດ້ຮັບການຕ້ອນຮັບຈາກ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ ພ້ອມດ້ວຍຄະນະນຳ ແລະວິຊາການຂອງພະແນກສາທາລະນະສຸກແຂວງ,

ໂອກາດນີ້ ທ່ານ ຄຳສອນ ພົງສະຫວັດດີ ຫົວໜ້າພະແນກສາທາລະນະສຸກແຂວງ ໄດ້ລາຍງານສະພາບການປະຕິບັດວຽກງານຜ່ານມາ ເປັນຕົ້ນ ການເຄື່ອນໄຫວວຽກ​ງານຄວບຄຸມ ສະກັດກັ້ນ ແລະແກ້ໄຂການລະບາດຂອງພະຍາດໂຄວິດ 19 ຢູ່ແຂວງຫຼວງພະບາງ ລວມທັງວຽກງານປີ່ນອ້ອມ ທ່ານກ່າວວ່າ: ນັບແຕ່ໄດ້ຮັບຂໍ້ມູນການລະບາດຂອງພະຍາດໂຄວິດ 19 ຢູ່ປະເທດໃກ້ຄຽງ ແລະ​ໄດ້ຮັບການຊີ້ນຳຈາກລັດຖະບານ ກໍ່ຄືອົງການປົກຄອງແຂວງ ຄະນະສະເພາະກິດຂັ້ນແຂວງ ໄດ້ເອົາໃຈໃສ່ເຄື່ອນໄຫວວຽກງານຢ່າງຕັ້ງໜ້າ ເພື່ອປຸກລະດົມໃຫ້ທຸກຄົນໃນທົ່ວສັງຄົມ ພ້ອມກັນປະຕິບັດມາດຕະການທີ່ລັດຖະ​ບານ ກໍ່ຄືອົງການປົກຄອງແຂວງ ໄດ້ອອກແຈ້ງການມາເປັນແຕ່ລະໄລຍະ ຜ່ານການປະຕິບັດວຽກງານເຫັນວ່າ ປະຊາ​ຊົນ ແລະທຸກພາກສ່ວນໃນສັງຄົມ ໄດ້ໃຫ້ການຮ່ວມມືເປັນຢ່າງດີ, ສ່ວນການກວດວິເຄາະ ແມ່ນໄດ້ມີຄົນເຂົ້າກວດສຸຂະພາບກ່ຽວກັບລະບົບທາງເດີນຫາຍໃຈ ໃນໄລຍະການລະບາດຂອງພະຍາດໂຄວິດ 19 ມີທັງໝົດ 860 ກໍລະນີ, ໃນນັ້ນ ເຂົ້າຂ່າຍສົງໄສ 76 ກໍລະນີ, ພົບຜູ້ຕິດເຊື້ອ 3 ຄົນ ໄດ້ປີ່ນປົວຢູ່ໂຮງໝໍແຂວງຫຼວງພະບາງ ປະຈຸບັນແມ່ນປີ່ນ​ປົວດີໝົດແລ້ວ.

ນອກຈາກນັ້ນ ຫົວໜ້າພະແນກສາທາລະນະສຸກແຂວງ ໄດ້ລາຍງານສະພາບການລະບາດຂອງພະຍາດໄຂ້ຍຸງ ແລະພະຍາດລະບາດຕາມລະດູການ ລວມທັງການປະຕິບັດ 10 ຕົວຊີ້ວັດທີ່ສະພາໄດ້ຮັບຮອງຕື່ມອີກ.

ໂອກາດນີ້ ລັດຖະມົນຕີກະຊວງສາທາ​ລະນະສຸກ ໄດ້ມີຄຳເຫັນຊີ້ນຳໃຫ້ຄະນະພະແນກ ແລະບັນດາເມືອງ-ນະຄອນ ຫຼວງພະບາງ ພ້ອມກັນຄົ້ນຄ້ວາຊອກຫາສີ່ງທີ່ຄົງຄ້າງ ແລະແຜນການສືບຕໍ່ປະຕິບັດວຽກງານ ໃນຂົງເຂດສາທາລະນະສຸກ ຮ່ວມກັບຂະແໜງການກ່ຽວຂ້ອງ ເພື່ອໃຫ້ວຽກງານແຕ່ລະດ້ານ ປະສົບຜົນສຳເລັດຕາມຄາດໝາຍ.

ພາຍຫຼັງສຳເລັດການເຮັດວຽກ ຢູ່ພະແນກສາທາລະສຸກແຂວງແລ້ວ ລັດຖະມົນຕີກະຊວງສາທາລະນະສຸກ  ພ້ອມດ້ວຍຄະນະ ໄດ້ລົງຢ້ຽມຢາມສະຖານທີ່ຮອງຮັບຄົນເຈັບ ຢູ່ໂຮງໝໍແຂວງຫຼວງພະບາງ ແລະພົບປະໂອ້ລົມ ໃຫ້ກຳລັງໃຈພະນັກງານແພດໝໍ ທີ່ປະຕິບັດໜ້າທີ່ຢູ່ໂຮງໝໍແຂວງຫຼວງພະບາງ ຕື່ມອີກ.