ຄະນະນໍາກະຊວງການຕ່າງປະເທດ ຕ້ອນຮັບການເຂົ້າຢ້ຽມອໍາລາຂອງອຸປະທູດກູເວດ ປະຈໍາ ສປປ ລາວ

ໃນຕອນເຊົ້າຂອງວັນທີ 28 ສິງຫາ 2024, ທີ່ ກະຊວງການຕ່າງປະເທດ, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມອໍາລາຂອງ ທ່ານ ອັບດຸນຣາສຊາ ອາລຄູລີຟາ (Abdulrazzaq Alkhuleefah), ອຸປະທູດ ແຫ່ງ ລັດກູເວດ ປະຈຳ ສປປ ລາວ, ໃນໂອກາດສໍາເລັດໜ້າທີ່ການທູດຂອງຕົນ ຢູ່ ສປປ ລາວ.

ໃນໂອກາດນີ້, ທ່ານ ຮອງລັດຖະມົນຕີ ໂພໄຊ ໄຂຄໍາພິທູນ ໄດ້ສະແດງຄວາມຂອບໃຈ ແລະ ຊົມເຊີຍຕໍ່ຜົນສໍາເລັດຂອງການເຄື່ອນໄຫວວຽກງານການທູດ ນັບແຕ່ມາດໍາລົງຕໍາແໜ່ງເປັນ ອຸປະທູດກູເວດ ປະຈໍາ ສປປ ລາວ ໃນປີ 2021 ເຖິງປັດຈຸ ບັນ, ເຊິ່ງໄດ້ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມ ຢູ່ ສປປ ລາວ ກໍຄື ການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດ ລາວ-ກູເວດ ໃຫ້ແໜ້ນແຟ້ນຍິ່ງຂຶ້ນ; ພ້ອມທັງໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຕໍ່ລັດຖະບານ ແລະ ປະຊາ ຊົນ ກູເວດ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນຕະຫຼອດໄລ ຍະຜ່ານມາ ແລະ ສະແດງຄວາມຫວັງວ່າ ລັດຖະບານ ກູເວດ ຈະສືບຕໍ່ໃຫ້ການສະໜັບສະໜູນ ສປປ ລາວ ໃນຕໍ່ໜ້າ.

ໃນຕອນທ້າຍ, ທ່ານ ຮອງລັດຖະມົນຕີ ໂພໄຊ ໄຂຄໍາພິທູນ ໄດ້ອວຍພອນໃຫ້ ທ່ານ ອັບດຸນຣາສຊາ ອາລຄູລີຟາ ຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ປະສົບຜົນສໍາເລັດໃນໜ້າທີ່ອັນໃໝ່ຍິ່ງໃຫຍ່ກວ່າເກົ່າ ພ້ອມທັງສືບຕໍ່ປະກອບສ່ວນຮັດແໜ້ນສາຍພົວພັນຮ່ວມມື ລາວ-ກູເວດ ໃນອະນາຄົດ.

ໃນຂະນະດຽວກັນ, ທ່ານ ອຸປະທູດ ອັບດຸນຣາສຊາ ອາລຄູລີຟາ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຄໍາອວຍພອນອັນປະເສີດ ພ້ອມທັງໄດ້ໃຫ້ຄໍາໝັ້ນສັນຍາວ່າ ຈະສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດ ຕະພາບ ແລະ ການຮ່ວມມືທີ່ດີ ລະຫວ່າງສອງປະເທດ ໃຫ້ມີຜົນສໍາເລັດອັນໃໝ່ ໃນອະນາຄົດ ເພື່ອນໍາເອົາຜົນປະໂຫຍດມາສູ່ປະຊາຊົນສອງຊາດ ລາວ-ກູເວດ.

ສປປ ລາວ ແລະ ລັດກູເວດ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 14 ກໍລະກົດ 2008, ເຊິ່ງໃນຕະຫຼອດ 16 ປີຜ່ານມາ, ການພົວພັນຮ່ວມມື ລະຫວ່າງສອງປະເທດ ລາວ-ກູເວດ ໄດ້ຮັບການພັດທະນາຢ່າງຕໍ່ເນື່ອງ ໂດຍເຫັນໄດ້ຈາກການພົວ ພັນດ້ານການທູດ ແລະ ການແລກປ່ຽນການຢ້ຽມຢາມຂອງການນໍາຂັ້ນສູງຂອງສອງປະ ເທດ ໃນໄລຍະຜ່ານມາຢ່າງເປັນປົກກະຕິ.

ທີ່ມາ: ກົມການຂ່າວ, ກະຊວງການຕ່າງປະເທດ