ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຄະນະນໍາກະຊວງປ້ອງກັນປະເທດຢ້ຽມຢາມ ແລະ ພົບປະໂອ້ລົມພະນັກງານ-ນັກຮົບ ຢູ່ໂຮງໝໍສູນກາງ 103 ກອງທັບ
ວັນທີ 16 ມັງກອນ 2024 ນີ້, ຄະນະນໍາກະຊວງປ້ອງກັນປະເທດ ຢ້ຽມຢາມ ແລະ ພົບປະໂອ້ລົມພະນັກງານ-ນັກຮົບ, ແພດໝໍໂຮງໝໍສູນກາງ 103 ກອງທັບ, ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20 ມັງກອນ 1949 – 20 ມັງກອນ 2024), ເຊິ່ງນໍາໂດຍ ສະຫາຍ ພົນຕີ ປະສິດ ທ່ຽງທໍາ ກໍາມະການຄະນະປະຈໍາພັກກະຊວງປ້ອງກັນປະເທດ ຫົວໜ້າກົມໃຫຍ່ເຕັກນິກກອງທັບ ພ້ອມດ້ວຍຜູ້ຕາງໜ້າບັນດາກົມໃຫຍ່, ຫ້ອງວ່າການກະຊວງປ້ອງກັນປະເທດ, ກົມ ແລະ ຫ້ອງການ. ໂດຍການຕ້ອນຮັບຂອງ ສະຫາຍ ພັນເອກ ສະແຫວງໄຊ ດາລາສາດ ຫົວໜ້າການທະຫານໂຮງໝໍສູນກາງ 103 ກອງທັບ ພ້ອມຄະນະ.
ສະຫາຍ ພົນຕີ ປະສິດ ທ່ຽງທໍາ ໄດ້ໂອ້ລົມຫຼາຍບັນຫາທີ່ສໍາຄັນເຊິ່ງບາງຕອນກ່າວວ່າ:“ກ່ອນໜ້ານີ້ 75 ປີ, ຄືວັນທີ 20 ມັງກອນ 1949 ກອງລາດຊະວົງ ໄດ້ຮັບການສ້າງຕັ້ງຂຶ້ນ, ເຊິ່ງເປັນຕົ້ນກຳເນີດຂອງກອງທັບປະຊາຊົນລາວ ໃນປັດຈຸບັນ, ໂດຍໄດ້ຮັບການສ້າງຕັ້ງຂຶ້ນ ຢູ່ເຂດທີ່ໝັ້ນຖ້ຳແມ, ເຂດລາວຮຸ່ງພຽງສາ, ເມືອງຊຽງຄໍ້, ແຂວງ ຫົວພັນ ໂດຍແມ່ນປະທານ ໄກສອນ ພົມວິຫານ ເປັນຜູ້ກໍ່ຕັ້ງ ແລະ ຊີ້ນໍາ-ບັນຊາໂດຍກົງ. ນັ້ນເປັນວັນແຫ່ງການເຕົ້າໂຮມບັນດາກອງກຳລັງປະກອບອາວຸດ ທີ່ໄດ້ສ້າງຕັ້ງຂຶ້ນໃນບໍລິເວນຕ່າງໆທົ່ວປະເທດ ເຂົ້າເປັນກອງທັບລາວອິດສະຫຼະ, ເຊິ່ງແມ່ນເຫດການທີ່ມີຄວາມໝາຍສຳຄັນຄັ້ງໃຫຍ່ຫຼວງທີ່ສຸດທາງດ້ານການເມືອງໃນປະຫວັດສາດຂອງຊາດລາວເຮົາ, ແມ່ນບາດລ້ຽວປະຫວັດສາດໜ້າໃໝ່ແຫ່ງການຕໍ່ສູ້ກູ້ຊາດ ໂດຍມີກອງທັບທີ່ເປັນກຳລັງຫຼັກແຫຼ່ງ, ເປັນທີ່ເພິ່ງອີງຂອງປະຊາຊົນລາວບັນດາເຜົ່າໃນການດໍາເນີນການຕໍ່ສູ້ຕີຕ້ານກັບຈັກກະພັດຕ່າງດ້າວຜູ້ຮຸກຮານ ແລະ ລູກແຫຼ້ງຕີນມືຂາຍຊາດ, ເຊິ່ງເປັນການຢັ້ງຢືນເຖິງການເຕີບໃຫຍ່ຂະຫຍາຍຕົວຂອງການປະຕິວັດລາວກ້າວສູ່ລະດັບສູງ.
ຕະຫຼອດໄລຍະ 75 ປີ ແຫ່ງການຕໍ່ສູ້ ແລະ ເຄື່ອນໄຫວຢ່າງລຽນຕິດໃນເງື່ອນໄຂທີ່ຫຍຸ້ງຍາກລຳບາກ ແລະ ທຸລະກັນດານທີ່ສຸດນັ້ນ, ພາຍໃຕ້ການນຳພາຂອງພັກ, ບັນດາກຳລັງປະກອບອາວຸດປະຊາຊົນລາວ ໄດ້ເຮັດສໍາເລັດພາລະກິດປະຕິວັດອັນຍິ່ງໃຫຍ່ ແລະ ໜັກໜ່ວງທີ່ພັກມອບໝາຍໃຫ້ຢ່າງສະຫງ່າງາມ, ສ້າງຜົນງານອັນດີເດັ່ນ, ວິລະກຳອັນລ້ຳເລີດປະດັບໄວ້ໃນໜ້າປະຫວັດສາດຂອງຊາດຢ່າງສົມກຽດ, ສ້າງມູນເຊື້ອອັນດີງາມຫຼາຍປະການໄວ້ໃຫ້ແກ່ກໍາລັງປະກອບອາວຸດປະຕິວັດ. ສົມແລ້ວທີ່ເປັນກອງທັບວິລະຊົນຂອງຊາດລາວວິລະຊົນ, ຊຶ່ງໄດ້ຮັບຄໍາສັນລະເສີນຈາກພັກ ແລະ ລັດ ວ່າ: “ກອງທັບຍາມໃດກໍ່ນຳໜ້າໃນທຸກວຽກງານ, ເດັດດ່ຽວຜ່ານຜ່າທຸກອຸປະສັກ, ຕີເອົາຊະນະສັດຕູທຸກໂຕ, ສຳເລັດທຸກໜ້າທີ່, ສົມເປັນກໍາລັງແກ່ນສານທີ່ເຂັ້ມແຂງຂອງການປະຕິວັດ, ເປັນເຄື່ອງມືອັນແຫຼມຄົມຂອງພັກ”.
ໂອກາດນີ້, ສະຫາຍ ພົນຕີ ປະສິດ ທ່ຽງທໍາ ຍັງໄດ້ເນັ້ນໜັກໃຫ້ຄະນະພັກ-ຄະນະອຳນວຍການໂຮງໝໍສູນກາງ 103 ກອງທັບ ພ້ອມກັນສຸມໃສ່ປັບປຸງກໍ່ສ້າງກຳລັງໃນທຸກດ້ານໃຫ້ມີຄຸນນະພາບ ແລະ ມີການຫັນປ່ຽນຢ່າງເດັ່ນຊັດ, ສຶກສາອົບຮົມການເມືອງ-ແນວຄິດເຮັດໃຫ້ສະມາຊິກພັກ, ພະນັກງານ, ນັກຮົບ, ແພດໝໍທຸກຄົນເຊື່ອມຊຶມ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກ ກໍ່ຄືມະຕິກອງປະຊຸມໃຫຍ່ຄັ້ງທີ 5 ຂອງອົງຄະນະພັກກະຊວງປ້ອງກັນປະເທດວາງອອກໃຫ້ປະກົດເປັນຈິງ; ເອົາໃຈໃສ່ສຶກສາອົບຮົມໃຫ້ທຸກຄົນເສີມຂະຫຍາຍທາດແທ້ມູນເຊື້ອຂອງພັກ, ຂອງຊາດ, ຂອງກອງທັບ (ເປັນຕົ້ນ 8 ມູນເຊື້ອຂອງກອງທັບ) ແລະ ມູນເຊື້ອຂອງເຫຼົ່າຮົບ, ຂອງກົມກອງໃຫ້ເລິກເຊິ່ງຕົວຈິງ; ສ້າງກົມກອງໃຫ້ມີແນວຄິດການເມືອງໜັກແໜ້ນ, ມີນໍ້າໃຈເສຍສະຫຼະອັນສູງສົ່ງເພື່ອປະເທດຊາດ, ເພື່ອປະຊາຊົນ ແລະ ພ້ອມກັນເຮັດສໍາເລັດໜ້າທີ່ຢ່າງຈົບງາມ.
ພ້ອມກັນນັ້ນ, ສະຫາຍ ພົນຕີ ປະສິດ ທ່ຽງທໍາ ພ້ອມຄະນະ ຍັງໄດ້ລົງຢ້ຽມຢາມ ແລະ ມອບວັດຖຸປັດໃຈຈໍານວນໜຶ່ງໃຫ້ພະນັກງານທະຫານທີ່ນອນປີ່ນປົວຢູ່ໂຮງໝໍສູນກາງ 103 ກອງທັບ ແລະ ມອບໃຫ້ໂຮງໝໍສູນກາງ 103 ກອງທັບຕື່ມອີກ.