ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 1 ກຸມພາ 2024 ນີ້ ຄະນະນໍາ ແຂວງອັດຕະປື ນຳໂດຍ ສະຫາຍ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊົນແຂວງອັດຕະປື ພ້ອມດ້ວຍຄະນະນຳຂອງແຂວງໄດ້ເຄື່ອນໄຫວຢ້ຽມຢາມ ແລະ ອວຍພອນຄະນະພັກ ຄະນະນຳ ກໍ່ຄືພໍ່ແມ່ປະຊາຊົນບັນດາເຜົ່າແຂວງກອນຕູມ ໂອກາດສະຫຼອງ ປີໃຫມ່ ຂອງ ປະເທດ ສສ ຫວຽດນາມ ປະຈຳປີ 2024, ພິທີຕ້ອນຮັບໄດ້ຈັດຂື້ນ ທີ່ຫ້ອງວ່າການຄະນະພັກແຂວງ ກອນຕູມ ສສ ຫວຽດນາມ ໂດຍໃຫ້ກຽດຕ້ອນຮັບຢ່າງອົບອຸ່ນຂອງ ສະຫາຍ ອາເປີ໊ດ , ຮອງເລຂາ ຜູ້ປະຈຳການຄະນະພັກ ແຂວງກອນຕູມ ພ້ອມດ້ວຍຄະນະນຳແຂວງ.
ໃນພິທີສອງຝ່າຍ ໄດ້ລາຍງານ ສະພາບການພັດທະນາເສດຖະກິດ – ສັງຄົມໃນປີຜ່ານມາ ໃຫ້ແຕ່ລະຝ່າຍຮັບຊາບ, ເຖິງວ່າໄລຍະຜ່ານມາ ສະພາບການພັດທະນາເສດຖະກິດ-ສັງຄົມຈະພົບພໍ້ກັບບັນຫາ ແລະ ສິ່ງທ້າທາຍ ແຕ່ສອງພັກ – ສອງລັດ ກໍ່ຄືປະຊາຊົນສອງຊາດເວົ້າລວມ, ເວົ້າສະເພາະກໍ່ຄືແຂວງອັດຕະປື ກັບແຂວງກອນຕູມກໍໄດ້ມີການພົວພັນ ແລກປ່ຽນບົດຮຽນເຊິ່ງກັນແລະກັນຕະຫຼອດມາ ເຫັນວ່າການພົວພັນລະຫວ່າງສອງແຂວງ ສືບຕໍ່ເສີມຂະຫຍາຍ, ພັດທະນາ, ບັນດາການເຄື່ອນໄຫວວຽກງານການຕ່າງປະເທດໄດ້ຮັບການຮ່ວມມືຊຸກຍູ້ເປັນຢ່າງດີ, ການພົວພັນນັບມື້ກ້າວເຂົ້້າສູ່ລວງເລິກ ແລະ ພັດທະນາໃນທຸກຂົງເຂດ. ໃນໄລຍະຕໍ່ໜ້າ, ໃນໂອກາດວາລະປີໃໝ່ 2024 ຂອງ ປະເທດ ສສ ຫວຽດນາມ ເຊີ່ງຖືວ່າເປັນວັນອັນສຳຄັນຢ່າງຍິ່ງ ຂອງປະຊາຊົນບັນດາເຜົ່າ ຊາວຫວຽດນາມ ແລະ ເຫັນໄດ້ຄວາມສໍາຄັນ ສາຍພົວພັນ, ຄວາມສາມັກຄີພິເສດ ຮ່ວມມືຮອບດ້ານຢ່າງເລິກເຊິ່ງ ແລະ ໜັກແໜ້ນ ລະຫວ່າງ ສອງຊາດລາວ-ຫວຽດນາມ ຕະຫລອດໄລຍະຜ່ານມາ, ເວົ້າສະເພາະ ລະຫວ່າງ ແຂວງ ອັດຕະປື ກັບ ແຂວງ ກອນຕູມ ໃນການຮ່ວມມືດ້ານຕ່າງໆ ໃນທຸກຂົງເຂດວຽກງານ.
ໂອກາດດຽວກັນນີ້ ສະຫາຍນາງມີນາພອນ ໄຊສົມພູ ກໍ່ໄດ້ສະແດງຄວາມຂອບໃຈ ໃນການຕ້ອນຮັບຢ່າງອົບອຸ່ນ ຂອງສະຫາຍ ອາ ເປີ໊ດ ຮອງເລຂາຜູ້ປະຈຳການຄະນະພັກແຂວງກອນຕູມແຂວງ ກອນຕູມ ພ້ອມຄະນະ ແລະ ເນື່ອງໃນໂອກາດປີໃໝ່ຫວຽດນາມ 2024 ທີ່ຈະມາຮອດອີກບໍ່ພໍເທົ່າໃດມື້ ສະຫາຍ ນາງ ມີນາພອນ ໄຊສົມພູ ຕາງໜ້າໃຫ້ຄະນະນຳກໍ່ຄືພໍ່ແມ່ປະຊາຊົນບັນດາເຜົ່າແຂວງ ອັດຕະປື ໄດ້ອ່ວຍພອນໄຊອັນປະເສີດແກ່ ສະຫາຍ ອາເປີ໊ດ , ຮອງເລຂາຜູ້ປະຈຳການຄະນະພັກແຂວງກອນຕູມ ພ້ອມດ້ວຍການນໍາທຸກຂັ້ນ, ພະນັກງານ-ລັດຖະກອນ, ກຳລັງ ປກຊ-ປກສ ຕະຫຼອດຮອດ ປະຊາຊົນຊາວແຂວງກອນຕູມ ຈົ່ງຕ້ອນຮັບປີໃໝ່ດ້ວຍຄວາມເບີກບານມ່ວນຊື່ນ, ມີສຸຂະພາບເຂັ້ມແຂງ-ແຂງແຮງ, ມີຄວາມສຸກໃນຊີວິດສ່ວນຕົວ ແລະ ຄອບຄົວ, ປະສົບຜົນສໍາເລັດທຸກປະການ, ພ້ອມກັນສະເຫຼີມສະຫຼອງຕ້ອນຮັບບຸນປີໃໝ່ດ້ວຍຄວາມເບີກບານມ່ວນຊື່ນ ແລະ ອ່ວຍພອນສາຍພົວພັນ ແລະ ການຮ່ວມມືລະຫວ່າງສອງແຂວງ ກ້າວເຂົ້້າສູ່ລວງເລິກ, ພ້ອມທັງມອບຂອງຂວັນປີໃໝ່ ໃຫ້ຄະນະພັກ, ຄະນະນຳແຂວງກອນຕູມອີກດ້ວຍ.
ໂດຍ: ວິໄລສັກ ແກ້ວຫຼວງໂຄດ