ຄະນະນໍາ ຄອສພ ເຂົ້າອວຍພອນວັນຊາດ ສສ ຫວຽດນາມ

ຄະນະນໍາ ຄອສພ ເຂົ້າອວຍພອນວັນຊາດ ສສ ຫວຽດນາມ

ເນື່ອງໃນໂອກາດສະເຫຼີມສະຫຼອງວັນຊາດ ສສ ຫວຽດນາມ ຄົບຮອບ 79 ປີ (2/9/1945-2/9/2024), ຄະນະນໍາຂອງ ຄະນະໂຄສະນາອົບຮົມສູນກາງພັກ (ຄອສພ) ນໍາໂດຍ ສະຫາຍ ລາວປາວຊົ່ງ ນະວົງໄຊ ກຳມະການສູນກາງພັກ ຮອງຫົວໜ້າ ຄອສພ ພ້ອມດ້ວຍຄະນະ ໄດ້ເຂົ້າອວຍພອນວັນຊາດ ສສ ຫວຽດນາມ ແກ່ສະຖານເອກອັກຄະລັດຖະທູດ ສສ ຫວຽດນາມ ປະຈໍາ ສປປ ລາວ ໃນວັນທີ 28 ສິງຫານີ້ ໂດຍໄດ້ຮັບການຕ້ອນຮັບຂອງ ສະຫາຍ ຟານ ມິງ ຈ໋ຽນ ອຸປະທູດຊົ່ວຄາວ ສະຖານທູດແຫ່ງ ສສ ຫວຽດນາມ ປະຈໍາລາວ ພ້ອມຄະນະ.

ສະຫາຍ ລາວປາວຊົ່ງ ນະວົງໄຊ ໄດ້ກ່າວອວຍພອນວັນຊາດ ສສ ຫວຽດນາມ ຄົບຮອບ 79 ປີ ແລະ ຕີລາຄາສູງຕໍ່ການປົກປັກຮັກສາ ແລະ ສ້າງສາພັດທະນາ ສສ ຫວຽດນາມ ໃນຕະຫຼອດໄລຍະຜ່ານມາ, ພ້ອມທັງໄດ້ລາຍງານໃຫ້ຊາບ ກ່ຽວກັບບາງວຽກງານທີ່ສຳຄັນ ເພື່ອສືບຕໍ່ການຮ່ວມມືກັນ ລະຫວ່າງ ສປປ ລາວ ແລະ ສສ ຫວຽດນາມ ເວົ້າລວມ, ເວົ້າສະເພາະ ກໍແມ່ນສະຖານເອກອັກຄະລັດຖະທູດ ຫວຽດນາມ ທີ່ຊຸກຍູ້ຊ່ວຍໃຫ້ ຄອສພ ແລະ ຄະນະໂຄສະນາສຶກສາສູນກາງພັກກອມມູນິດຫວຽດນາມ ໄດ້ສືບຕໍ່ແລກປ່ຽນບົດຮຽນຊຶ່ງກັນ ແລະ ກັນ ໃນຕະຫຼອດໄລຍະຜ່ານມາ. ພ້ອມນີ້, ກໍໄດ້ໃຫ້ຊາບກ່ຽວກັບບາງວຽກງານຂອງພັກ-ລັດ ຂອງ ສປປ ລາວ ເປັນຕົ້ນ ຂະບວນການກະກຽມສະເຫຼີມສະຫຼອງ 3 ວັນປະຫວັດສາດ, ກອງປະຊຸມໃຫຍ່ 3 ຂັ້ນຂອງພັກ ແລະ ກອງປະຊຸມໃຫຍ່ຄັ້ງທີ XII ຂອງພັກປະຊາຊົນປະຕິວັດລາວ ຊຶ່ງ ຄອສພ ກໍກຳລັງດຳເນີນ ແລະ ກໍຈະຂໍການແລກປ່ຽນກັບບັນດາສະຫາຍຫວຽດນາມ. ໃນໂອກາດດຽວກັນ, ກໍໄດ້ກ່າວອວຍພອນ ສະຫາຍ ຟານມິງຈ໋ຽນ ພ້ອມດ້ວຍຄະນະ ແລະ ພະນັກງານທີ່ປະຈໍາຢູ່ ສະຖານທູດ ຈົ່ງມີສຸຂະພາບແຂງແຮງ, ສຳເລັດໜ້າທີ່ຂອງຕົນ ແລະ ອວຍພອນແກ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດ, ຫວຽດນາມ – ລາວ ໃຫ້ໝັ້ນຄົງທະນົງແກ່ນ ຕະຫຼອດກາລະນານ.

ສະຫາຍ ຟານມິງຈ໋ຽນ ກໍໄດ້ກ່າວສະແດງຄວາມຂອບໃຈ ແລະ ຕີລາຄາສູງຕໍ່ຄະນະນໍາຂອງ ຄອສພ ທີ່ນໍາໂດຍສະຫາຍ ລາວປາວຊົ່ງ ນະວົງໄຊ ທີ່ໄດ້ນໍາພາຄະນະເຂົ້າມາອວຍພອນວັນຊາດ ສສ ຫວຽດນາມ ຄົບຮອບ 79 ປີ ໃນຄັ້ງນີ້ ແລະ ທີ່ໄດ້ສົ່ງມອບກະຕ່າດອກໄມ້, ກະຕ່າຂອງຂວັນ. ພ້ອມດຽວກັນ, ກໍໄດ້ສົ່ງຄໍາຂອບໃຈໄປຍັງ ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າ ຄອສພ ປະທານສະພາທິດສະດີສູນກາງພັກ ທີ່ໄດ້ເອົາໃຈໃສ່ແຕ່ງຕັ້ງຄະນະນໍາຂອງ ຄອສພ ມາອວຍພອນຄັ້ງນີ້. ພ້ອມດຽວກັນນີ້, ກໍໄດ້ລາຍງານໃຫ້ຊາບ ກ່ຽວກັບຫຼາຍຜົນງານທີ່ພົ້ນເດັ່ນ ພາຍໃຕ້ການນໍາພາ-ຊີ້ນໍາຂອງພັກກອມມູນິດຫວຽດນາມ ຊຶ່ງພັກ-ລັດ ແລະ ປະຊາຊົນຫວຽດນາມ ກໍໄດ້ຮັບຮູ້ຢ່າງເລິກເຊິ່ງວ່າ ໄດ້ຜົນງານພົ້ນເດັ່ນຄືດັ່ງກ່າວນັ້ນ ແມ່ນປາສະຈາກບໍ່ໄດ້ ຈາກການຮ່ວມມືຊ່ວຍເຫຼືອຈາກເພື່ອນມິດສາກົນ ແລະ ໂດຍສະເພາະ ແມ່ນການຮ່ວມມືຊ່ວຍເຫຼືອໝົດຈິດໝົດໃຈຂອງພັກ-ລັດ ແລະ ປະຊາຊົນລາວອ້າຍນ້ອງ ໃນຕະຫຼອດໄລຍະຜ່ານມາ. ໃນໂອກາດນີ້, ກໍໄດ້ກ່າວສະແດງຄວາມຂອບໃຈຢ່າງສຸດ ມາຍັງພັກ-ລັດ ແລະ ປະຊາຊົນລາວບັນດາເຜົ່າ.