ຄະນະນໍາ ອອປສ ຢ້ຽມຂໍ່ານັບນາຍົກລັດຖະມົນຕີແຫ່ງຣາຊະອານາຈັກກໍາປູເຈຍ

ທ່ານ ໄຊຊະນະ ໂຄດພູທອນ ກໍາມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ (ອອປສ) ພ້ອມຄະນະໄດ້ເຂົ້າຢ້ຽມຂໍ່ານັບທ່ານ ຮຸນ ມາເນັດ ນາຍົກລັດຖະມົນຕີແຫ່ງຣາຊະອານາຈັກກໍາປູເຈຍ ໃນວັນທີ 31 ກໍລະກົດ ຜ່ານມາ ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກຢູ່ຣາຊະອານາຈັກກຳປູເຈຍ.

ໂອກາດດັ່ງກ່າວ, ທ່ານ ໄຊຊະນະ ໂຄດພູທອນ ໄດ້ສະແດງຄວາມຂອບໃຈທີ່ທ່ານນາຍົກລັດຖະມົນຕີ ແຫ່ງຣາຊະອານາຈັກກໍາປູເຈຍໄດ້ໃຫ້ການຕ້ອນຮັບ ພ້ອມທັງໄດ້ນຳເອົາຄວາມຢື້ຢາມຖາມຂ່າວຂອງທ່ານປະທານປະເທດ, ທ່ານນາຍົົກລັດຖະມົນຕີແຫ່ງ ສປປ ລາວ ມາຍັງທ່ານນາຍົກລັດຖະມົນຕີແຫ່ງຣາຊະອານາຈັກກໍາປູເຈຍ ພ້ອມກັນນັ້ນ, ກໍໄດ້ສະແດງຄວາມຊົມເຊີຍເປັນຢ່າງສູງທີ່ ທ່ານ ຮຸນ ມາເນັດ ໄດ້ຮັບເລືອກຕັ້ງເປັນນາຍົກລັດຖະ ມົນຕີແຫ່ງຣາຊະອານາຈັກກໍາປູເຈຍ ແລະ ຜົນສໍາເລັດຂອງລັດຖະບານ ແລະ ປະຊາຊົນກໍາປູເຈຍທີ່ຍາດມາໄດ້ ໃນການສ້າງສາພັດທະນາປະເທດຊາດ ພາຍໃຕ້ການນໍາພາຂອງທ່ານຢ່າງມີປະສິດທິຜົນ.

ພ້ອມກັນນັ້ນ, ກໍໄດ້ແຈ້ງຈຸດປະສົງ ແລະ ລາຍງານຜົນຂອງການປຶກສາຫາລື ແລະ ການແລກປ່ຽນບົດຮຽນລະຫວ່າງຜູ້ແທນຂັ້ນສູງຂອງອົງການໄອຍະການປະຊາ ຊົນສູງສຸດແຫ່ງ ສປປ ລາວ ແລະ ຜູ້ແທນຂັ້ນສູງຂອງອົງການໄອຍະການສູງສຸດແຫ່ງ ຣາຊະອານາຈັກກໍາປູເຈຍ ພ້ອມທັງການລົງນາມໃນບົດບັນທຶກຊ່ວຍຈໍາ ທີ່ໄດ້ພ້ອມ ກັນລົງນາມໃນວັນທີ 31 ກໍລະກົດ 2024 ນີ້ທີ່ໄດ້ລະບຸວ່າ: ຈະສືບຕໍ່ແລກປ່ຽນການຢ້ຽມຢາມທາງການຂອງຄະນະຜູ້ແທນຂັ້ນສູງ ແລະ ການແລກປ່ຽນຂັ້ນວິຊາການ; ການຮ່ວມມືວຽກງານໄອຍະການ ໂດຍສະເພາະກ່ຽວກັບບັນຫາສົ່ງຜູ້ຮ້າຍຂ້າມແດນ, ການຮ່ວມມືທາງອາຍາ; ການຈັດກອງປະຊຸມສໍາມະນາວິທະຍາສາດ ກ່ຽວກັບວຽກ ງານໄອຍະການ ແລະ ການຈັດກອງປະຊຸມຊາຍແດນຂອງສອງປະເທດ.

ໂອກາດນີ້, ທ່ານ ຮຸນ ມາເນັດ ໄດ້ຍ້ອງຍໍຊົມເຊີຍຜົນສຳເລັດ ແລະ ຈະໃຫ້ການສະ ໜັບສະໜູນການຮ່ວມມືດັ່ງກ່າວເປັນຢ່າງດີ ພ້ອມທັງອວຍພອນໃຫ້ການເຮັດວຽກຂອງຄະນະຜູ້ແທນ ສປປ ລາວ ຢູ່ຣາຊະອານາຈັກກຳປູເຈຍໃນຄັ້ງນີ້ປະສົບຜົນສຳເລັດ ແລະ ເດີນທາງກັບປະເທດດ້ວຍຄວາມສະຫວັດດີພາບ.

ຂ່າວ-ພາບ: ອອປສ