ຄະນະບໍລິຫານງານຄະນະກຳມະການພາຣາແລມປິກແຫ່ງຊາດລາວ ສະໄໝທີ IV ສະຫລຸບວຽກງານ ປະຈໍາປີ 2023

ກອງປະຊຸມຄະນະບໍລິຫານງານຄະນະກຳມະການພາຣາແລມປິກແຫ່ງຊາດລາວ (ຄພລ) ສະໄໝທີ IV ປະຈໍາປີ 2023 ຈັດຂຶ້ນໃນຕອນບ່າຍວັນທີ 1 ມີນາ 2023 ທີ່ຫ້ອງປະຊຸມຄະນະກຳມະການໂອແລມປິກແຫ່ງຊາດລາວ, ນະຄອນຫລວງວຽງຈັນ ໂດຍມີ ທ່ານ ພຸດ ສີມມາລາວົງ, ລັດຖະມົນຕີກະຊວງສຶກສາທິການ ແລະ ກິລາ, ປະທານຄະນະກຳມະການໂອແລມປິກແຫ່ງຊາດລາວ, ທ່ານ ນາງ ຂັນທະລີ ສິຣິພົງພັນ, ປະທານຄະນະກຳມະການພາຣາແລມປິກແຫ່ງຊາດລາວ, ພ້ອມດ້ວຍຄະນະບໍລິຫານງານຄະນະກຳມະການພາຣາແລມປິກແຫ່ງຊາດລາວ, ບັນດາປະທານ-ຮອງປະທານສະຫະພັນກິລາຄົນພິການແຫ່ງຊາດ ແລະ ແຂກຖືກເຊີນເຂົ້າຮ່ວມ.

ທ່ານ ວິລະວັນ ບຸນສຸກໄທ, ຮອງປະທານ ແລະ ເລຂາທິການ ຄພລ ໄດ້ຂຶ້ນຜ່ານບົດລາຍງານຕໍ່ກອງປະຊຸມ ໂດຍໄດ້ຍົກໃຫ້ເຫັນຜົນສຳເລັດຫລາຍດ້ານພົ້ນເດັ່ນທີ່ຄະນະບໍລິຫານງານ ຄພລ ປະຕິບັດໄດ້ໃນໄລຍະ 1 ປີ ຜ່ານມາ, ໃນນີ້ ສະເພາະການພັດທະ ນານັກກິລາ ກໍຄື ການເຂົ້າຮ່ວມແຂ່ງຂັນລະດັບສາກົນ ໄດ້ເຂົ້າຮ່ວມແຂ່ງຂັນຫລາຍລາຍການທີ່ປະເທດໄທ ເຊັ່ນ: ກິລາບານບ້ວງລໍ້ເລື່ອນຄົນພິການ ຊີງແຊັມອາຊີ-ປາຊີ ຟິກ, ແລ່ນ-ລານຄົນພິການ ຊີງແຊັມນາໆ ຊາດ ແລະ ກິລາໂກນບານຄົນພິການ ຊີງແຊັມອາຊີ-ປາຊີຟິກ ແລະ ຊີງແຊັມອາຊີ.

ນອກນີ້ ໄດ້ເຂົ້າຮ່ວມແຂ່ງຂັນກິລາອາຊຽນພາຣາເກມ ຄັ້ງທີ 12 ທີ່ ປະເທດ ກຳປູ ເຈຍ, ກິລາຍົກນ້ຳໜັກຄົນພິການ ຊີງແຊັມໂລກ ທີ່ ດູໃບ, ປະເທດສະຫະ ລັດອາຣັບເອມີເຣດ, ກິລາເອຊຽນພາຣາເກມ ຄັ້ງທີ 4 ທີ່ ຫາງໂຈ, ສປ ຈີນ, ກິລາປັ່ນລໍ້ເລື່ອນມາລາທອນນາໆ ຊາດ ຄັ້ງທີ 42 ແລະ ອື່ນໆ. ຄຽງຄູ່ກັນນີ້, ທ່ານຍັງໄດ້ຍົກໃຫ້ເຫັນດ້ານອ່ອນ ແລະ ຂໍ້ຄົງຄ້າງທີ່ຈະຕ້ອງໄດ້ສືບຕໍ່ປັບປຸງແກ້ໄຂ, ບົດຮຽນທີ່ຖອດຖອນໄດ້ ແລະ ທິດທາງແຜນການເຄື່ອນໄຫວວຽກງານ ປະຈຳປີ 2024 ຕື່ມອີກ.

ກອງປະຊຸມຄັ້ງນີ້, ຍັງໄດ້ຮັບຟັງບົດສະຫຼຸບວຽກງານການເງິນ ຂອງຄະນະກໍາມະການພາຣາແລມປິກແຫ່ງຊາດລາວ ປະຈໍາປີ 2023, ການປະກອບຄໍາເຫັນຂອງບັນ ດາສະຫະພັນກິລາຄົນພິການແຫ່ງຊາດ, ການສະເໜີປັບປຸງ ແລະ ຮັບຮອງທຳມະນູນ ຄະນະກຳມະການພາຣາແລມປິກແຫ່ງຊາດລາວ ສະໄໝທີ IV ແລະ ລາຍງານການກະກຽມເຂົ້າຮ່ວມແຂ່ງຂັນກິລາພາຣາແລມປິກເກມຄັ້ງທີ 17 ປີ 2024 ທີ່ປະເທດຝຣັ່ງ.

ນອກຈາກນີ້, ຍັງໄດ້ຮັບຟັງການໂອ້ລົມຈາກ ທ່ານ ພຸດ ສີມມາລາວົງ, ທ່ານໄດ້ເນັ້ນ ໜັກໃຫ້ຄະນະບໍລິຫານງານ ຄະນະກຳມະການພາຣາແລມປິກແຫ່ງຊາດລາວ ສືບຕໍ່ເອົາໃຈໃສ່ຫລາຍວຽກງານສໍາຄັນ ເຊັ່ນ: ໃຫ້ນໍາເອົາບົດຮຽນ ແລະ ທິດທາງແຜນການປະຈໍາປີ 2024 ໄປຈັດຕັ້ງປະຕິບັດໃຫ້ເກີດຜົນເປັນຈິງ, ໂດຍສະເພາະສະຫະພັນກິລາຄົນພິການແຫ່ງຊາດ ໃຫ້ສ້າງແຜນການເຄື່ອນໄຫວ, ຈັດຕັ້ງປະຕິບັດໃຫ້ເກີດຜົນຕົວຈິງ; ສືບຕໍ່ປັບປຸງກຳມະການຝ່າຍຕ່າງໆ ທີ່ຂຶ້ນກັບການຄຸ້ມຄອງຂອງຄະນະກຳມະ ການ ພາຣາແລມປິກແຫ່ງຊາດລາວ ໃຫ້ມີຄວາມໜັກແໜ້ນທາງດ້ານການຈັດຕັ້ງ ແລະ ເຂັ້ມແຂງໃນການເຄື່ອນໄຫວຕາມພາລະບົດບາດ, ໜ້າທີ່ທີ່ກຳນົດໄວ້ໃຫ້ສຳ ເລັດຜົນ.

ພ້ອມນີ້, ຕ້ອງສືບຕໍ່ຊຸກຍູ້ບັນດາສະຫະພັນກິລາຄົນພິການແຫ່ງຊາດ ໃນການຄົ້ນຄວ້າຊອກໃຫ້ເຫັນໄດ້ວິທີການພັດທະນານັກກິລາຄົນພິການແບບຍືນຍົງ, ໂດຍສະ ເພາະປະເພດກິລາ ທີ່ຈະເຂົ້າຮ່ວມການແຂ່ງຂັນໃນລະດັບພາຣາແລມປິກເກມ, ເອຊຽນພາຣາເກມ, ອາຊຽນພາຣາເກມ ແລະ ລາຍການແຂ່ງຂັນອື່ນໆ ໃຫ້ມີສະຖິຕິດີຂຶ້ນກວ່າເກົ່າ; ໂດຍການສົມທົບ ແລະ ປະສານງານຢ່າງສະໜິດແໜ້ນລະຫວ່າງພາກລັດ, ເອກະຊົນ ແລະ ອົງການຈັດຕັ້ງສັງຄົມເພື່ອນຳໃຊ້ກຳລັງແຮງສັງລວມທົ່ວສັງຄົມ ເພື່ອພັດທະນາວຽກງານກິລາ-ກາຍຍະກຳຄົນພິການ ໃຫ້ເປັນຂະບວນການຟົດຟື້ນ ແລະ ກວ້າງຂວາງກວ່າເກົ່າ, ສືບຕໍ່ເອົາໃຈໃສ່ພັດທະນາວຽກງານກິລາ-ກາຍຍະກຳຄົນພິການໃຫ້ແຂງແຮງກວ່າເກົ່າເປັນຕົ້ນ: ຜູ້ບໍລິຫານ, ວິຊາການ, ວິທະຍາສາດການກິລາ, ແພດຈັດລະດັບຄວາມເປັນພິການ, ກຳມະການຕັດສິນ, ຄູຝຶກ ແລະ ນັກກິລາຄົນພິການ. ສ້າງນັກກິລາຄົນພິການຮຸ່ນສືບທອດໃຫ້ໄດ້ຫຼາຍກວ່າເກົ່າ ໂດຍສະເພາະປະເພດກິລາທີ່ມີທ່າແຮງ ແລະ ປາຍແຫຼມໃຫ້ເປັນລະບົບ ແລະ ຕໍ່ເນື່ອງ ແລະ ອື່ນໆ.

ພາບ: ສົງການ ພັນແພງດີ