ຄະນະຜູ້ແທນການທະຫານຂັ້ນສູງ ກອງທັບປະຊາຊົນລາວ, ນໍາໂດຍ ທ່ານ ພົນໂທ ຄໍາລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບປະຊາຊົນລາວ ພ້ອມດ້ວຍຄະນະ ໄດ້ເດີນທາງຢ້ຽມຢາມ ແລະ ເຮັດວຽກຢູ່ຣາຊະອານາຈັກກໍາປູເຈຍ ຢ່າງເປັນທາງການ ໃນລະຫວ່າງວັນທີ 29-31 ກໍລະກົດ 2024 ໂດຍການຕ້ອນຮັບຂອງ ທ່ານ ພົນເອກ ວົງ ປີເຊັນ ຜູ້ບັນຊາການທະຫານສູງສຸດ ກອງທັບ ແຫ່ງຣາຊະອານາຈັກກໍາປູເຈຍ ພ້ອມຄະນະ.
ການພົບປະຄັ້ງນີ້, ສອງຝ່າຍໄດ້ຕີລາຄາສູງຕໍ່ຜົນສໍາເລັດຫລາຍດ້ານ ໃນການຮ່ວມມືຊ່ວຍເຫລືອເຊີ່ງກັນ ແລະ ກັນໃນໄລຍະຜ່ານມາ ເຊິ່ງນອນຢູ່ໃນທ່າມກາງບັນຍາກາດທີ່ສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືລະຫວ່າງສອງພັກ-ສອງລັດ ແລະ ສອງກອງທັບ ໂດຍສະເພາະແມ່ນ ກົມໃຫຍ່ເສນາທິການກອງທັບປະຊາຊົນລາວ ກັບ ກອງບັນຊາການທະຫານສູງສຸດ ແຫ່ງ ຣາຊະອານາ ຈັກກໍາປູເຈຍ ພວມໄດ້ຮັບການເສີມຂະຫຍາຍນັບມື້ນັບແໜ້ນແຟ້ນ, ເຂົ້າສູ່ລວງເລິກ ແລະ ຈະເລີນງອກງາມຍິ່ງຂຶ້ນ, ສະແດງອອກໃນການແລກປ່ຽນຢ້ຽມຢາມເຊິ່ງກັນ ແລະ ກັນ ຂອງການນໍາຂັ້ນສູງພັກ-ລັດ ແລະ ການນໍາກະຊວງປ້ອງກັນປະເທດ ລາວ-ກໍາປູເຈຍ ໄດ້ໄປມາຫາສູ່ກັນຢ່າງເປັນປົກກະຕິ ເປັນການຢັ້ງຢືນເຖິງມິດຕະພາບອັນເປັນມູນເຊື້ອ ແລະ ເສີມຂະຫຍາຍການເປັນຄູ່ຮ່ວມມືຍຸດທະສາດຮອບດ້ານ, ໝັ້ນຄົງຍາວນານ, ມີປະສິດຕິຜົນຍິ່ງໆຂຶ້ນ; ສອງຝ່າຍເຫັນດີເປັນເອກະພາບໃນການຮ່ວມມືໃນຕໍ່ໜ້າ ໂດຍສະເພາະແມ່ນສອງກອງທັບ ຕ້ອງໄດ້ຊີ້ນໍາບັນດາກົມກອງ, ທ້ອງຖິ່ນ ທີ່ເຮັດໜ້າທີ່ຢູ່ລຽບຕາມຊາຍແດນ ລາວ-ກໍາປູເຈຍ ສືບຕໍ່ແລກປ່ຽນຂໍ້ມູນຂ່າວສານ ແລະ ສະກັດກັ້ນການສ້າງຄວາມບໍ່ສະຫງົບ ຢູ່ຂອບເຂດບໍລິເວນຊາຍແດນຂອງສອງປະເທດ, ພ້ອມທັງສະກັດກັ້ນປະກົດການຫຍໍ້ທໍ້ຕ່າງໆທີ່ເກີດຂຶ້ນຕາມບໍລິເວນຊາຍແດນ ເຊັ່ນ: ການລັກລອບເຂົ້າເມືອງຜິດກົດໝາຍ, ອາຊະຍາກໍາຂ້າມຊາດ, ການຄ້າຢາເສບຕິດ, ການຄ້າມະນຸດ, ການຄ້າຂາຍເຖື່ອນ, ການຄ້າອາວຸດ ແລະ ການກໍ່ອາຊະຍາຕ່າງໆ ທີ່ຜິດກົດໝາຍ, ຊຸກຍູ້ໃຫ້ຄະນະປະສານງານຂອງສູນປະສານງານລາວ-ກໍາປູເຈຍ, ກໍາປູເຈຍ-ລາວ ໄດ້ປະຕິບັດໜ້າທີ່ຕາມການຕົກລົງເຫັນດີຂອງ ສອງລັດຖະມົນກະຊວງປ້ອງກັນປະເທດ.
ໃນວັນດຽວກັນ, ທ່ານ ພົນໂທ ຄໍາລຽງ ອຸທະໄກສອນ ພ້ອມດ້ວຍຄະນະ ກໍໄດ້ເດີນທາງໄປຢ້ຽມຢາມກອງພົນນ້ອຍ 70 ແລະ ໄດ້ຖືກຕ້ອນຮັບໂດຍ ທ່ານ ພົນເອກ ເມົາ ໂສະພັນ ຮອງຜູ້ບັນຊາການທະຫານສູງສຸດ, ຜູ້ບັນຊາການທະຫານບົກ ແຫ່ງ ຣາຊະອານາຈັກກໍາປູເຈຍ ແລະ ຫົວໜ້າກອງພົນນ້ອຍ 70, ພ້ອມໄດ້ຮັບຊົມການສະແດງສິລະປະການປ້ອງກັນຕົວ, ການສະແດງຊ່ວຍເຫລືອ ແລະ ດັບມອດອັກຄີໄພ, ຊົມເຄື່ອງຈັກ, ອາຄານ, ຫໍມູນເຊື້ອ, ວິດີໂອສັ້ນ ແລະ ໂຮງໝໍຂອງກອງພົນນ້ອຍ 70.
ຈາກນັ້ນ, ທ່ານ ພົນໂທ ຄໍາລຽງ ອຸທະໄກສອນ ພ້ອມດ້ວຍຄະນະ ໄດ້ເດີນທາງໄປ ກະຊວງປ້ອງກັນປະເທດ ແລະ ເຂົ້າຢ້ຽມຂໍ່ານັບ ທ່ານ ພົນເອກ ເຕຍ ໄຊຫາ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ຣາຊະອານາຈັກກໍາປູເຈຍ ໂດຍໄດ້ແຈ້ງໃຫ້ຊາບເຖິງຈຸດປະສົງໃນການເດີນທາງມາຢ້ຽມຢາມ ແລະ ເຮັດວຽກໃນຄັ້ງນີ້. ພ້ອມນີ້, ທ່ານ ພົນເອກ ເຕຍ ໄຊຫາ ໄດ້ສະແດງຄວາມຕ້ອນຮັບຢ່າງອົບອຸນ ດ້ວຍໄມຕີຈິດມິດຕະ ພາບ ແລະ ໄດ້ຕີລາຄາສູງຕໍ່ການມາຢ້ຽມຢາມ ເຮັດວຽກ ຢູ່ຣາຊະອານາຈັກກໍາປູເຈຍ ຂອງຄະນະຜູ້ແທນລາວໃນຄັ້ງນີ້.
ຂ່າວ-ພາບ: ພັນຕີ ສີປະພັນ ແກ້ວມະນີວົງ
