ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຄະນະຜູ້ແທນທູດຕານຸທູດຕ່າງປະເທດປະຈຳລາວ ເຄື່ອນໄຫວຢ້ຽມຢາມແຂວງ ອັດຕະປື
ໃນລະຫວ່າງວັນທີ 18 ຫາ 19 ພຶດສະພາ 2024, ຄະນະຜູ້ແທນ ທູດຕານຸທູດຕ່າງປະເທດ ປະຈຳລາວ ນໍາໂດຍທ່ານ ໂອຣັນ ອິຊີກ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສາທາລະນະລັດ ຕວກກີ ປະຈຳ ລາວ, ພ້ອມດ້ວຍບັນດາຄະນະທູດຕານຸທູດປະເທດເພື່ອນມິດ ປະຈຳລາວ ໄດ້ເຄື່ອນໄຫວຢ້ຽມຢາມແຂວງ ອັດຕະປື, ພິທີຕ້ອນຮັບໄດ້ຈັດຂື້ນທີ່ຫ້ອງວ່າການແຂວງ ໃຫ້ກຽດຕ້ອນຮັບໂດຍທ່ານ ທະນຸໄຊ ບັນຊາລິດ ຮອງເຈົ້າແຂວງ ອັດຕະປື ພ້ອມດ້ວຍຄະນະນຳ ແລະ ວິຊາການທັງສອງຝ່າຍເຂົ້າຮ່ວມ.
ໂອກາດດັ່ງກ່າວ ທ່ານຮອງເຈົ້າແຂວງອັດຕະປື ໄດ້ກ່າວສະແດງຄວາມຕ້ອນຮັບຄະນະຜູ້ແທນທູດຕານຸທູດປະເທດເພື່ອນມິດ ປະຈຳລາວ, ພ້ອມທັງໄດ້ລາຍງານກ່ຽວກັບຜົນສຳເລັດການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ, ເຊິ່ງການຢ້ຽມຢາມແຂວງ ອັດຕະປື ຂອງຄະນທູດຕານຸທູດຕ່າງປະເທດປະຈໍາລາວ ຄັ້ງນີ້ ເປັນອີກບາດກ້າວໜຶ່ງສໍາຄັນຂອງການເສີມຂະຫຍາຍສາຍພົວພັນ ແລະ ການຮ່ວມມືໃນດ້ານຕ່າງໆ ລະຫວ່າງແຂວງ ອັດຕະປື ກັບບັນດາປະເທດເພື່ອນມິດສາກົນ, ທັງເປັນການກະຕຸ້ນການລົງທຶນຈາກຕ່າງປະເທດ ໃຫ້ເຂົ້າມາລົງທຶນຢູ່ແຂວງ ອັດຕະປື ຫຼາຍຂື້ນ, ເປັນຕົ້ນ ການພັດທະນາດ້ານພະລັງງານ, ດ້ານເສດຖະກິດ-ສັງຄົມ ແລະ ບັນຫາອື່ນໆ ຢູ່ໃນສະພາບແວດລ້ອມທີ່ທ້າທາຍໃໝ່ ເພື່ອເຮັດໃຫ້ການພັດທະນາເສດຖະກິດ-ສັງຄົມຂອງແຂວງ ຂະຫຍາຍຕົວ.
ໃນໂອກາດເດີນທາງຢ້ຽມຢາມ ແລະ ເຮັດວຽກ ຢູ່ແຂວງ ອັດຕະປື ຄັ້ງນີ້ ບັນດາຄະນະທູດຕານຸທູດຕ່າງປະເທດ ຍັງໄດ້ໄປຢ້ຽມຢາມສະຖານທີ່ທ່ອງທ່ຽວ, ຢ້ຽມຊົມພື້ນຖານການຜະລິດກະສິກຳຂອງແຂວງ, ຢ້ຽມຊົມເຂື່ອນໄຟຟ້າ ແລະ ຈຸດທ່ອງທ່ຽວສຳຄັນຂອງແຂວງຕື່ມອີກ.
ຂ່າວ: ສິດຕິພອນ