ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຄະນະຜູ້ແທນ ຂອງ ພັກກອມມູນິດຈີນ ນຳໂດຍ ສະຫາຍ ຈ້າວ ຊື້ທົງ ຜູ້ຊ່ວຍຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ພ້ອມດ້ວຍຄະນະ ໄດ້ເດີນທາງ​ມາ​ຢ້ຽມ​ຢາມ ແລະ ​ເຮັດ​ວຽກຢູ່ ສ​ປ​ປ ລາວ ແຕ່​ວັ​ນ​ທີ 9-12 ພຶດສະພາ 2024.
ໃນຕອນບ່າຍວັນທີ 10 ພຶດສະພາ ຜ່ານມາ, ສະຫາຍ ຈ້າວຊືທົງ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ບຸນທອງ ຈິດມະນີ ກໍາມະການກົມການເມືອງ ຜູ້ປະຈໍາການ ຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ, ໃນໂອກາດດັ່ງກ່າວ ສະຫາຍ ບຸນທອງ ຈິດມະນີ ໄດ້ສະແດງຄວາມຄວາມຍີນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມ-ເຮັດວຽກ ຢູ່ ສປປ ລາວ ຂອງ ສະຫາຍ ຈ້າວ ຊື້ທົງ ພ້ອມດ້ວຍຄະນະໃນຄັ້ງນີ້, ໂດຍສະເພາະແມ່ນ ການພົບປະເຮັດວຽກກັບພາກສ່ວນທີ່ກ່ຽວຂ້ອງຂອງລາວ ເພື່ອຮ່ວມກັນຕີລາຄາຄືນ ການຈັດຕັ້ງປະຕິບັດ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳ ລາວ-ຈີນ ໃນໄລຍະຜ່ານມາ ແລະ ກໍານົດທິດທາງໃນການຊຸກຍູ້ ການຈັດຕັ້ງປະຕິບັດແຜນແມ່ບົດສະບັບໃໝ່ (ປີ 2024-2028) ໃຫ້ມີຄຸນນະພາບສູງ, ມາດຕະຖານສູງ ແລະ ຄຸນນະພາບສູງກວ່າເກົ່າ; ໄດ້ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສອງພັກ ລາວ-ຈີນ ໃນໄລຍະຜ່ານມາ, ກໍຄືການປະສານສົມທົບກັນ ລະຫວ່າງ 2 ຄະນະພົວພັນຕ່າງປະເທດສູນກາງພັັກ ລາວ-ຈີນ ທີ່ໄດ້ປະກອບສ່ວນສຳຄັນ ໃນການຈັດຕັ້ງປະຕິບັດແຜນແມ່ບົດ, ແຜນການຮ່ວມມື ລະຫວ່າງ ສອງພັກ ແລະ ການຈັດຕັ້ງຜັນຂະຫຍາຍບັນດາເນື້ອໃນຈິດໃຈ ທີ່ການນຳສອງພັກ, ສອງລັດ ລາວ-ຈີນ ໄດ້ຕົກລົງເປັນເອກະພາບກັນ ໃຫ້ປະກົດຜົນເປັນຈິງ. ສະຫາຍ ບຸນທອງ ຈິດມະນີ ຍັງໄດ້ມີຄໍາເຫັນຊີ້ນໍາໃຫ້ 2 ຄະນະພົວພັນຕ່າງປະເທດສູນກາງພັັກ ລາວ-ຈີນ ສືບຕໍ່ປະສານສົມທົບກັນ ໃນການເປັນເສນາທິການດ້ານການຕ່າງປະເທດໃຫ້ແກ່ 2 ສູນກາງພັກ ລາວ-ຈີນ ກໍຄື ການຊຸກຍູ້ຈັດຕັ້ງປະຕິບັດ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ໃຫ້ເກີດດອກອອກຜົນໃນລະດັບສູງກວ່າເກົ່າ ແລະ ຕາງໜ້າ ພັກ-ລັດ ລາວ ສະແດງຄວາມຂອບໃຈ ພັກ-ລັດ ຈີນ ທີ່ໄດ້ໃຫ້ການຊ່ວຍເຫຼືອອຸປະກອນ ແລະ ພາຫະນະ ໃນການເປັນປະທານອາຊຽນ 2024 ຂອງ ສປປ ລາວ.
ສະຫາຍ ຈ້າວ ຊື້ທົງ ໄດ້ສະແດງຄວາມຂອບໃຈຕໍ່ ສະຫາຍ ບຸນທອງ ຈິດມະນີ ທີ່ໃຫ້ກຽດຕ້ອນຮັບຄະນະ ແລະ ໄດ້ລາຍງານຜົນການພົບປະ-ເຮັດວຽກ ກັບພາກສ່ວນກ່ຽວຂ້ອງຂອງຝ່າຍລາວ ໃຫ້ຊາບ; ໄດ້ແຈ້ງສະພາບການທີ່ພົ້ນເດັ່ນຈຳນວນໜຶ່ງ ຂອງການພົວພັນຮ່ວມມືສອງຝ່າຍໃນໄລຍະຜ່ານມາ ແລະ ທິດທາງແຜນ ການໃນຕໍ່ໜ້າ ເພື່ອສືບຕໍ່ຈັດຕັ້ງປະຕິບັດບັນດາເນື້ອໃນຈິດໃຈທີ່ການນຳສອງພັກ, ສອງລັດ ໄດ້ຕົກລົງເປັນເອກະພາບກັນ ກໍຄື ການຈັດຕັ້ງປະຕິບັດ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ແລະ ແຜນການຮ່ວມມື ລະຫວ່າງ ສອງພັກໃນຕໍ່ ໜ້າໃຫ້ມີປະສິດທິຜົນກວ່າເກົ່າ.
ໃນໂອກາດມາຢ້ຽມຢາມ ສປປ ລາວ ຄັ້ງນີ້, ສະຫາຍ ຈ້າວຊື້ທົງ ພ້ອມດ້ວຍຄະນະ ຍັງໄດ້ເຂົ້າຢ້ຽມຂໍ່ານັບ ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ; ສະຫາຍ ທອງສະຫວັນ ພົມວິຫານ ກຳມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ; ພົບປະເຮັດວຽກກັບ ສະຫາຍ ວາລະໄຊ ເລັ່ງສະຫວັດ ຮອງຫົວໜ້າຄະນະພົວພັນຕ່າງປະເທດສູນກາງພັກ; ຈັດກອງປະຊຸມແລກປ່ຽນບົດຮຽນກັບ ພາກສ່ວນກ່ຽວຂ້ອງຂອງລາວ ແລະ ຢ້ຽມຢາມສຳນັກງານ ບໍລິສັດສາຍສົ່ງໄຟຟ້າແຫ່ງຊາດລາວ (EDL-T) ຢູ່ນະຄອນຫຼວງ ວຽງຈັນ. ພ້ອມນັ້ນ, ຄະນະຍັງໄດ້ຢ້ຽມຢາມພື້ນຖານການປະຕິວັດ ຢູ່ແຂວງຫົວພັນ, ຢ້ຽມຢາມຖໍ້າທູດຈີນ ຊຶ່ງເປັນສະຖານທີ່ສໍາຄັນ ທີ່ສະແດງເຖິງມູນເຊື້ອການພົວພັນ ລາວ-ຈີນ ໃນສະໄໝຕໍ່ສູ້ກູ້ຊາດ ແລະ ເຂົ້າຢ້ຽມຂໍ່ານັບ ສະຫາຍ ເພີດ ມາປັນຍາ ຮອງເລຂາພັກແຂວງ ຜູ້ປະຈໍາການ ຄະນະບໍລິຫານງານພັກແຂວງຫົວພັນ ໃນໂອກາດດັ່ງກ່າວ.