ໃນວັນທີ 25 ພຶດສະພາ 2021 ຄະນະຜູ້ ແທນພັກ ປປ ລາວ ນໍາໂດຍ ສະຫາຍ ສົມພອນ ສີຈະເລີນ ຮອງຫົວໜ້າຄະນະພົວ ພັນຕ່າງ ປະເທດສູນກາງພັກ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມພິເສດ ກ່ຽວກັບ ໂຄວິດ-19 ຄັ້ງທີ 2, ຊຶ່ງຮ່ວມກັນຈັດຂື້ນໂດຍ ກອງເລຂາອົງການຂອງບັນດາ ພັກການເມືອງໃນອາຊີ (ICAPP ໄອແຄັບ) ພາຍໃຕ້ 2 ຫົວຂໍ້ຕົ້ນຕໍຄື: (1) ການພັດທະນາການຕອບໂຕ້ພະຍາດລະບາດໂຄວິດ-19 ທີ່ມີປະສິດທິພາບຫຼາຍຂຶ້ນໃນ ລະດັບພາກພື້ນ ແລະ ສາກົນ; ແລະ (2) ການບັນລຸການຟື້ນຟູເສດຖະ ກິດຮອບດ້ານ ໃນສະພາບແວດລ້ອມຫຼັງ ໂຄວິດ-19. ເຂົ້າຮ່ວມໃນກອງປະຊຸມຄັ້ງນີ້ ມີຜູ້ແທນຈາກ 24 ພັກການເມືອງ ທີ່ມາຈາກ 19 ປະເທດໃນອາຊີ, ຜູ້ຕາງໜ້າຈາກອົງການອະນາໄມໂລກ (WHO), ທະນາຄານໂລກ, ສະຖາບັນວັກຊິນສາກົນ, ຄະນະກຳມະການເສດຖະກິດ ແລະ ສັງຄົມຂອງອົງການສະຫະປະຊາ ຊາດ ປະຈຳ ພາກພື້ນອາຊີ ແລະ ປາຊີຟິກ ແລະ ອົງການກອງປະຊຸມຖາວອນ ຂອງບັນດາພັກການເມືອງອາເມຣິກາລາຕິນ ແລະ ກາຣາອິບ (COPPPAL).
ໃນກອງປະຊຸມດັ່ງກ່າວ, ຫົວໜ້າຄະນະຜູ້ແທນພັກ ປປ ລາວ ໄດ້ປະກອບຄຳເຫັນ ໂດຍໄດ້ຍົກໃຫ້ເຫັນຄວາມພະຍາຍາມ ແລະ ຄວາມຮັບຜິດຊອບຮ່ວມກັນ ຂອງບັນດາປະເທດໃນພາກພື້ນອາຊີ ກໍຄື ທົ່ວໂລກ ໃນການສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ນັບແຕ່ມີການແຜ່ລະ ບາດຂອງ ພະຍາດດັ່ງກ່າວ, ເວົ້າສະເພາະແມ່ນການຕ້ານພະຍາດໂຄວິດ-19 ຢູ່ ສປປ ລາວ, ຊຶ່ງ ພັກ ແລະ ລັດຖະບານ ສປປ ລາວ ໄດ້ວາງ ແລະ ນໍາພາຈັດຕັ້ງປະຕິບັດນະໂຍບາຍ ແລະ ມາດຕະການຕ່າງໆ ແຕ່ຫົວທີ ໂດຍຖືຜົນປະໂຫຍດ ແລະ ຄວາມປອດໄພຂອງປະຊາຊົນເປັນກົກ; ນອກຈາກນີ້ ກໍໄດ້ຮັບການຮ່ວມມື ແລະ ຊ່ວຍເຫຼືອ ທັງທາງດ້ານວັດຖຸ ແລະ ຈິດໃຈ ຢ່າງທັນການຂອງບັນດາປະເທດເພື່ອນມິດ ອັນໄດ້ເຮັດໃຫ້ການປ້ອງກັນ ແລະ ສະກັດກັ້ນພະຍາດໂຄວິດ-19 ຢູ່ ສປປ ລາວ ໄດ້ຮັບຜົນສໍາເລັດເປັນກ້າວໆມາ; ໄດ້ຍົກໃຫ້ເຫັນຄວາມພະຍາ ຍາມຂອງພັກ ແລະ ລັດຖະບານລາວ ໃນການເລັ່ງລັດການສັກວັກຊິນໃຫ້ພົນລະເມືອງລາວ ໃຫ້ໄດ້ຢ່າງໜ້ອຍ 22% ໃນປີ 2021 ໂດຍຖືເປັນສ່ວນໜຶ່ງໃນຄວາມ ພະຍາ ຍາມຂອງສາກົນໃນການ ຮັບມືກັບໂຄວິດ-19; ການສືບຕໍ່ເຝົ້າລະວັງ, ຕິດຕາມ, ປະເມີນສະພາບການເປັນແຕ່ລະໄລຍະ ເພື່ອອອກມາດຕະການຢ່າງ ເໝາະສົມ ພ້ອມທັງເຜີຍແຜ່ໃຫ້ສັງຄົມໄດ້ ຮັບຊາບ ເພື່ອຈັດຕັ້ງປະຕິບັດ ຢ່າງເປັນເຈົ້າການ ໂດຍສົມທົບການຮ່ວມມືຢ່າງໃກ້ຊິດກັບສາກົນ, ໃນຂະນະດຽວກັນ ກໍສຸມໃສ່ແກ້ໄຂບັນດາຂໍ້ຫຍຸ້ງ ຍາກ ແລະ ສິ່ງທ້າ ທ້າຍຕ່າງໆຂອງປະເທດ, ສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະ ກິດ- ສັງຄົມແຫ່ງຊາດ 5 ປີ ຄັ້ງທີ IX ກໍຄືແຜນງານການຟື້ນຟູເສດຖະກິດ-ສັງຄົມ ພາຍ ຫຼັງການແຜ່ລະບາດຂອງພະຍາດໂຄວິດ-19 ຢ່າງຮອບດ້ານ ແລະ ເປັນລະບົບ; ສະແດງຄວາມໝາຍໝັ້ນໃນການສືບຕໍ່ຮ່ວມມືຢ່າງໃກ້ຊິດ ກັບບັນດາພັກການເມືອງໃນອາຊີ ໃນການປ້ອງກັນ,ຄວບຄຸມ ແລະ ຮັບມືກັບພະຍາດໂຄວິດ-19 ໃນໄລຍະການແຜ່ລະບາດ ແລະ ຫຼັງການແຜ່ລະບາດຂອງພະຍາດດັ່ງກ່າວ.
ບັນດາຜູ້ແທນທີ່ເຂົ້າ ຮ່ວມກອງປະຊຸມ ໄດ້ຮັບຮອງເອົາຖະແຫຼງການ, ຊຶ່ງໄດ້ເນັ້ນໜັກເຖິງບົດບາດສຳ ຄັນຂອງບັນດາພັກການເມືອງໃນອາຊີ ໃນການຊຸກຍູ້ໃຫ້ລັດຖະບານ ຂອງບັນດາປະເທດສະມາ ຊິກມີນະໂຍບາຍ ແລະ ມາດຕະ ການສະກັດກັ້ນ, ຄວບຄຸມ ແລະ ຮັບມືກັບການແຜ່ລະບາດຂອງ ພະຍາດໂຄວິດ-19, ລວມທັງ ການເປີດກວ້າງການສະ ໜອງບັນດາອຸປະກອນການ ແພດຢ່າງເທົ່າທຽມກັນ, ທົ່ວເຖິງ ຢູ່ທຸກປະເທດ ແລະ ສຳລັບທຸກຊັ້ນຄົນບົນຫຼັກການ ພວກເຮົາກ້າວໄປພ້ອມກັນ; ຮຽກຮ້ອງໃຫ້ລັດຖະ ບານ ແລະ ບັນດາພັກການເມືອງໃນອາຊີ ເຮັດວຽກຮ່ວມກັນໃນການວາງແຜນທີ່ມີປະສິດທິພາບ ແລະ ການສະໜອງທຶນທີ່ເໝາະສົມ ເພື່ອຟື້ນຟູເສດຖະກິດ-ສັງຄົມ ຂອງປະເທດຕົນ; ຢືນຢັນຄວາມ ໝາຍໝັ້ນໃນການສືບຕໍ່ຮ່ວມມື ຢ່າງແໜ້ນແຟ້ນ ລະຫວ່າງ ບັນດາພັກການເມືອງປະເທດສະມາຊິກໄອແຄັບ ເພື່ອເຊື່ອມສານແຜນປະຕິບັດ ງານພາກພື້ນ ແລະ ສາກົນ ກ່ຽວກັບ ການຕ້ານໂຄວິດ-19.
ຂ່າວ-ພາບ: ຄຕພ
Loading...