ໃນວັນທີ 27 ຕຸລາ 2022, ທີ່ອົງການກາແດງແຫ່ງຊາດລາວ, ຄະນະຜູ້ແທນສະພາກາແດງຫວຽດນາມ ນຳໂດຍ ທ່ານ ນາງ ບຸ໋ຍທິຮວາ ເລຂາຄະນະພັກ, ປະທານຄະນະບໍລິຫານງານສູນກາງສະພາກາແດງຫວຽດນາມ ໄດ້ເດີນທາງຢ້ຽມຍາມແລະພົບປະຄະນະຜູ້ແທນອົງການກາແດງແຫ່ງຊາດລາວຢ່າງເປັນທາງການ ໂດຍການຮ້ອນຮັບອັນອົບອຸ່ນຂອງ ຮສຈ ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວພ້ອມຄະນະ. ໂອກາດນີ້ ທັງສອງຝ່າຍໄດ້ຈັດກອງປະຊຸມຮ່ມມືແລະພົບປະແລກປ່ຽນເພື່ອຖອດຖອນບົດຮຽນ ແລະທົບທວນຄືນຜົນການຈັດຕັ້ງປະຕິບັດວຽກງານໃນໄລະຍະຜ່ານມາ ແລະທິດທາງແຜນການໃນຕໍ່ໜ້າ.
ຮສຈ ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ ໄດ້ລາຍງານບາງຜົນສຳເລັດໃນວຽກງານດ້ານມະນຸດສະທຳຢູ່ລາວໃນປີນີ້ ໂດຍສະເພາະການປະກອບສ່ວນສຳຄັນໃນວຽກງານສະກັດກັ້ນການລະບາດຂອງພະຍາດໂຄວິດ19, ການຊ່ວຍເຫຼືອບັນເທົາທຸກໃຫ້ຜູ້ປະສົບໄພນ້ຳຖ້ວມ, ການປຸກລະດົມຂົນຂວາຍໃຫ້ປະຊາຊົນບໍລິຈາກເລືອດ, ການຊອກຫາແຫຼ່ງທຶນ. ວຽກງານປະຖົມພະຍາບານ-ອາສາສະໝັກ, ການກູ້ໄພແລະລົດແພດບໍລິການສຸກເສີນ, ການພົວພັນຮ່ມມືກັບສາກົນແລະວຽກງານອື່ນໆ.
ປະທານອົງການກາແດງແຫ່ງຊາດລາວຍັງໄດ້ຕີລາຄາສູງຕໍ່ການພົວພັນຮ່ວມມືລະຫວ່າງອົງການແດງແຫ່ງຊາດລາວ ແລະສະພາກາແດງຫວຽດນາມໃນໄລຍະຜ່ານມາຈົນເຖິງປັດຈຸບັນ ເປັນຕົ້ນ:ການແລກປ່ຽນຢ້ຽມຢາມຂອງຄະນະຜູ້ແທນສອງຝ່າຍ, ການເຝິກອົບຮົມ, ການພັດທະນາຊັບພະຍາກອນມະນຸດ, ການຮ່ວມືດ້ານການບໍລິການສັງຄົມແລະວຽກງານມະນຸດສະທຳ, ການແລກປ່ຽນຂໍ້ມູນຂ່າວສານຂອງສູນກາງແລະກາແດງແຂວງ ແລະກອງປະຊຸມແລກປ່ຽນລະດັບພາກພຶ້ນແລະສາກົນຕື່ມອີກ. ໂອກາດເດີນທາງມາຢ້ຽມຢາມຢາມອົງການກາແດງລາວຢ່າງເປັນທາງການໃນເທື່ອນີ້ ຄະນະຜູ້ແທນສະພາກາແດງຫວຽດນາມ ຍັງໄດ້ຮ່ວມລົງນາມໃນສັນຍາວ່າດ້ວຍການຮ່ວມມືວຽກງານມະນຸດສະທຳ ແລະພັດທະນາ ນັບແຕ່ປີ 2022-2027. ພ້ອມທັງໄດ້ມອບເຄື່ອງຊ່ວຍເຫຼືບັນເທົາທຸກ, ເຕົາປະຫຍັດ ແລະເຄື່ອງກອງນ້ຳພ້ອມເງິນສົດຈຳນວນໜື່ງໃຫ້ອົງການກາແດງແຫ່ງຊາດລາວ ເພື່ອນຳໄປຊ່ວຍເຫຼືອດ້ານມະນຸດສະທຳໃຫ້ປະຊາຊົນຜູ້ທຸກຍາກຂາດເຂີນຢູ່ເຂດຫ່າງໄກສອກຫຼີກຂອງລາວ.
ອົງການກາແດງແຫ່ງຊາດລາວ ແລະ ສະພາກາແດງຫວຽດນາມໄດ້ຮ່ວມລົງນາມສັນຍາວ່າດ້ວຍການພົວພັນຮ່ວມມືວຽກງານມະນຸດສະທຳ ແລະພັດທະນາ ນັບແຕ່ປີ 2022-2027 ພິທີຈັດຂຶ້ນໃນມື້ວານນີ້ ທີ່ອົງການແດງກາແຫ່ງຊາດລາວ ໂດຍການເປັນປະທານຮ່ວມລະຫວ່າງ ຮສຈ ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ ແລະ ທ່ານນາງ ບຸ໋ຍທິຮວາ ເລຂາຄະນະພັກ, ປະທານຄະນະບໍລິຫານງານສູນກາງສະພາກາແດງຫວຽດນາມ ມີຕຕາງນ້າຜູ້ແທນທັງສອງຝ່າຍເຂົ້າຮ່ວມເປັນສັກຂີພິຍານ.
ທ່ານ ນາງ ບຸ໋ຍທິຮວາ ປະທານຄະນະບໍລິຫານງານສູນກາງສະພາກາແດງຫວຽດນາມມີຄຳເຫັນວ່າ: ສະພາກາແດງຫວຽດນາມມີຄວາມຕັ້ງໃຈຈະຮ່ວມກັນຈັດຕັ້ງປະຕິບັດກິດຈະກຳ ແລະການຮ່ວມມືສອງຝ່າຍນັບແຕ່ນີ້ຮອດປີ 2027 ຕ້ອງມີການປ່ຽນແປງໃຫ້ທີ່ສອດຄ່ອງກັບທິດທາງແຜນການບັນເທົາທຸກສາກົນ, ເພື່ອນຳເອົາໝາກຜົນຕົວຈິງມາສູ່ສະພາກາແດງສາກົນເວົ້າລວມ, ເວົ້າສະເພາະຢູ່ຫວຽດນາມແລະລາວ ໂດຍສະເພາະບັນດາແຂວງທີ່ມີຊາຍແດນຕິດຈອດກັນ, ສະພາກາແດງແຂວງ-ນະຄອນ ທີ່ມີຄວາມອາດສາມາດລົງນາມໃນສັນຍາຮ່ວມກັນ ເພື່ອຈັດຕັ້ງປະຕິບັດວຽກງານບັນເທົາທຸກໃຫ້ແທດເໝາະກັບສະພາບຕົວຈິງຢູ່ບັນດາແຂວງຂອງຫວຽດນາມແລະລາວ.
ໂອກາດນີ້, ຮສຈ ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ ກ່າວວ່າ: ພາຍຫຼັງລົງນາມໃນສັນຍາສະບັບນີ້ ເອີ້ນວ່າ ສອງອົງການກາແດງແຫ່ງຊາດ ເພື່ອປະກອບສ່ວນເພີ່ມທະວີສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ນັບມື້ມີປະສິດທິພາບແລະແໜ້ນແຟ້ນຂຶ້ນເລື້ອຍໆ ໂດຍປະຕິບັດຕາມຄຳໝັ້ນສັນຍາສາກົນ, ໜ້າທີ່ຄວາມຮັບຜິດຊອບຂອງອົງການກາແດງລາວ ແລະສະພາກາແດງຫວຽດນາມ ໃນໄລຍະໃໝ່ໃຫ້ໄດ້ຮັບໝາກຜົນຢ່າງແທ້ຈິງ.
ປະທານອົງການກາແດງແຫ່ງຊາດລາວ ກ່າວຕື່ມວ່າ: ໄລຍະຜ່ານມາ ການຈັດຕັ້ງປະຕິບັດວຽກງານຂອງສອງອົງການກາແດງ ໄດ້ສຸມໃສ່ສ້າງເງື່ອນໄຂພິເສດຈາກລັດຖະບານລາວ ແລະຫວຽດນາມ, ພ້ອມທັງໄດ້ຮັບການສະໜັບສະໜູນອຸ້ມຊູຈາກຄະນະກຳມະການກາແດງສາກົນ ແລະ ສະຫະພັນກາແດງແລະຊີກວົງເດືອນແດງສາກົນ. ສະພາກາແດງຫວຽດນາມຍາມໃດກໍໃຫ້ການຊ່ວຍເຫຼືອທີ່ມີຄຸນຄ່າໃນວຽກງານມະນຸດສະທຳພ້ອມທັງໄດ້ປະກອບສ່ວນຊ່ວຍພັດທະນາຊັບພະຍາກອນມະນຸດໃຫ້ອົງການກາແດງແຫ່ງຊາດລາວ ແລະບັນດາແຂວງທີ່ໄດ້ເຊັນສັນຍາຮ່ວມກັນ ໃຫ້ໄດ້ຮັບການເພີ່ມພູນຄູນສ້າງກາຍເປັນມໍລະດົກອັນລ້ຳຄ່າຂອງສອງຊາດ ບົນເສັ້ນທາງການນຳພາຄວາມຈະເລີນຮຸ່ງເຮືອງມາສູ່ປະຊາຊົນໄດ້ກິນອິ່ມນຸ່ງອຸ່ນ ແລະມີຄວາມຜາສຸກຍິ່ງໆຂຶ້ນ.
ສະພາກາແດງຫວຽດນາມ ຮ່ວມກັບບໍລິສັດທີ່ປຶກສາການລົງທຶນ ແລະການຄ້າອິນທຣາໂກ ຫວຽດນາມ ແລະບໍລິສັດຊີພີຫວຽດນາມ ມອບເຄື່ອງຊ່ວຍເຫຼືອດ້ານມະນຸດສະທຳ, ເຕົາປະຫຍັດ ແລະເຄື່ອງກອງນ້ຳ ໃຫ້ອົງການກາແດງແຫ່ງຊາດລາວ. ພິທີຈັດຂຶ້ນໃນຕອນເຊົ້າມື້ວານນີ້ ທີ່ອົງການກາແດງແຫ່ງຊາດລາວ ມອບໂດຍທ່ານນາງ ບຸ໋ຍທິຮວາ ປະທານຄະນະບໍລິຫານງານສູນກາງສະພາກາແດງຫວຽດນາມ ພ້ອມຄະນະ ແລະຮັບໂດຍ ຮສຈ ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ
ໂອກາດນີ້ ຮສຈ ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ ໄດ້ຕີລາຄາສູງຕໍ່ການຢ້ຽມຢາມຖາມຂ່າວແລະມອບເຄື່ອງຊ່ວຍເຫຼືອຈາກສະພາກາແດງຫວຽດນາມໃນຄັ້ງນີ້ ພ້ອມທັງຕາງໜ້າຄະນະນຳອົງການກາແດງແຫ່ງຊາດລາວ ກໍ່ຄືພະນັກງານແລະອາສາສະໝັກກາແດງລາວ ສະແດງຄວາມຮູ້ບຸນຄຸນແລະຂອບໃຈເປັນຢ່າງສູງ ຕໍ່ຄະນະນຳສະພາກາແດງຫວຽດນາມ ແລະຝາກຄວາມຮັກແພງແລະຄວາມຈິງໃຈເຖິງຄະນະນຳກາແດງຊາຍແດນທຸກແຂວງ ທີ່ໄດ້ໃຫ້ການຮ່ວມມືແລະສະໜັບສະໜູນລາວໃນໄລຍະຜ່ານມາ ແລະຫວັງຢ່າງຍິ່ງວ່າສາຍພົວພັນມິດຕະພາບ ແລະການຮ່ວມມືແບບພິເສດຂອງສອງອົງການກາແດງຈະສືບຕໍ່ຮ່ວມກັນໃນຕໍ່ໜ້າ ເພື່ອເຮັດໃຫ້ຊີວິດການເປັນຢູ່ຂອງປະຊາຊົນສອງຊາດລາວ-ຫວຽດນາມ ຢູ່ເຂດຫ່າງໄກສອກຫຼີກໄດ້ຮັບການພັດທະນາດີຂຶ້ນເທື່ອລະກ້າວ.
ການຊ່ວຍເຫຼືອດ້ານມະນຸດສະທຳໃຫ້ອົງການກາແດງແຫ່ງຊາດລາວໃນຄັ້ງນີ້ໂດຍການຮ່ວມມື ຈາກສະພາກາແດງຫວຽດນາມ, ບໍລິສັດທີ່ປຶກສາການລົງທຶນ ແລະການຄ້າອິນທຣາໂກ ຫວຽດນາມ ແລະ ບໍລິສັດຊີພີຫວຽດນາມ ລວມມູນຄ່າ 350 ລ້ານກີບ.
ຂ່າວ: ບຸນທະຖອມ ພານລີ
ພາບ: ພູເງິນ ບົວທອງ
