ຕອບສະໜອງຕາມການເຊື້ອເຊີນ ຂອງປະທານກຸ່ມມິດຕະພາບສະມາຊິກ ລັດຖະສະພາ ໄທ-ລາວ, ທ່ານ ສຸບັນ ສະວະບຸດ ປະທານກຳມາທິການວຽກງານສະມາຊິກສະພາແຫ່ງຊາດ, ປະທານຄະນະມິດຕະພາບລັດຖະສະພາ ລາວ-ໄທ ພ້ອມຄະນະ ໄດ້ຢ້ຽມຢາມ ແລະ ເຮັດວຽກ ຢູ່ຣາຊະອານາຈັກໄທ, ລະຫວ່າງວັນທີ 24-27 ກໍລະກົດ 2024 ເພື່ອສືບຕໍ່ປະກອບສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ຖານບ້ານໃກ້ເຮືອນຄຽງທີ່ມີແຕ່ດົນນານ ບົນພື້ນຖານການເປັນຄູ່ຮ່ວມຍຸດທະສາດ ລະຫວ່າງ ສອງປະເທດ ລາວ-ໄທ ກໍຄື ລະຫວ່າງ ສອງອົງການນິຕິບັນຍັດ ໃຫ້ນັບມື້ນັບຈະເລີນງອກງາມຂຶ້ນ.
ໃນໄລຍະຢ້ຽມຢາມ, ຢູ່ທີ່ສໍານັກງານລັດຖະສະພາໄທ ໄດ້ພົບປະສອງຝ່າຍ ລະຫວ່າງ ຄະນະຜູ້ແທນລາວນຳໂດຍ ທ່ານ ສຸບັນ ສະວະບຸດ ປະທານຄະນະມິດຕະພາບລັດຖະສະພາ ລາວ- ໄທ ແລະ ຄະນະຜູ້ແທນໄທ ນໍາໂດຍ ທ່ານ ນິຄົມ ບຸນວິເສດ ສະມາຊິກສະພາຜູ້ແທນຣາຊະດອນ, ຮອງປະທານກຸ່ມມິດຕະພາບສະມາຊິກລັດຖະສະພາ ໄທ-ລາວ ເປັນຫົວໜ້າຄະນະ. ການພົບປະຄັ້ງນີ້, ສອງຝ່າຍຮ່ວມກັນຕີລາຄາຄືນສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ຣາຊະອານາຈັກໄທ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງຕະຫລອດມາ ຈົນໄດ້ຍົກລະດັບການພົວພັນຂຶ້ນເປັນ ຄູ່ຮ່ວມຍຸດທະສາດ ເພື່ອຄວາມຈະເລີນເຕີບໂຕ ແລະ ການພັດທະນາແບບຍືນຍົງ, ມີການແລກປ່ຽນການຢ້ຽມຢາມ ລະຫວ່າງ ການນໍາຂັ້ນສູງຂອງສອງປະເທດ ຢ່າງເປັນປົກກະຕິ, ມີການຮ່ວມມືທາງດ້ານເສດຖະກິດ, ການຄ້າ-ການລົງທຶນ, ພະລັງງານ, ການພັດທະນາຊັບພະຍາກອນມະນຸດ, ສາທາລະນະສຸກ, ການທ່ອງທ່ຽວ, ການພັດທະນາພື້ນຖານໂຄງລ່າງ ໂດຍສະເພາະແມ່ນ ການເຊື່ອມຕໍ່ດ້ວຍການສ້າງຂົວຂ້າມແມ່ນໍ້າຂອງຫລາຍແຫ່ງ ແລະ ການພັດທະນາເສັ້ນທາງຄົມມະນາຄົມທາງບົກ ຈາກຝັ່ງໄທ ມາສູ່ຝັ່ງລາວ ເພື່ອເຊື່ອມຕໍ່ໃສ່ເສັ້ນ ທາງລົດໄຟລາວ-ຈີນ ອັນເປັນທ່າແຮງສຳຄັນ ໃນການຮ່ວມມື ລະຫວ່າງສອງປະເທດພວກເຮົາ.
ນອກນີ້, ຍັງໄດ້ສະໜັບສະໜູນ ແລະ ຊ່ວຍເຫລືອ ເຊິ່ງກັນ ແລະກັນ ໃນການຮັບມືກັບໄພພິບັດທາງທໍາມະຊາດ, ການແຜ່ລະບາດຂອງພະຍາດ ໂຄວິດ-19 ແລະ ການພົວພັນຮ່ວມມືໃນເວທີພາກພື້ນ ແລະສາກົນ. ພ້ອມນີ້, ສອງຝ່າຍ ຍັງໄດ້ຮ່ວມກັນທົບທວນຄືນ ການພົວພັນຮ່ວມມື ລະຫວ່າງ ສອງອົງການນິຕິບັນຍັດ ກໍຄື ລະຫວ່າງ ສອງຄະນະມິດຕະພາບລັດຖະສະພາ ລາວ-ໄທ, ໄທ- ລາວ ໃນໄລຍະຜ່ານມາ ເຫັນວ່າໄດ້ຮັບການເສີມ ຂະຫຍາຍຢ່າງຕັ້ງໜ້າ ໂດຍໄດ້ສະແດງອອກ ມີການແລກປ່ຽນການຢ້ຽມຢາມ ຂອງຄະນະຜູ້ແທນລະດັບສູງ, ກຳມາທິການ, ຄະນະເລຂາທິການ, ຄະນະມິດຕະພາບລັດຖະສະພາ ແລະ ຂັ້ນຕ່າງໆ, ມີການແລກປ່ຽນຂໍ້ມູນ-ຂ່າວສານກ່ຽວກັບການຈັດຕັ້ງປະຕິບັດພາລະບົດບາດນິຕິບັນຍັດ, ການຮ່ວມມື ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ, ພິເສດ ສອງຝ່າຍໄດ້ຕີລາຄາການຮ່ວມມືລະຫວ່າງສອງຄະນະມິດຕະພາບ ລາວ-ໄທ, ໄທ-ລາວ ຜ່ານມາ.
ນອກຈາກ, ການຢ້ຽມຢາມ ແລະ ແລກປ່ຽນຂໍ້ມູນຂ່າສານແລ້ວ ຍັງມີການຮ່ວມມືກັນ ເພື່ອສົ່ງເສີມເຂົ້າໃນວຽກງານພັດທະນາຊົນນະບົດ, ແກ້ໄຂຄວາມທຸກຍາກຂອງປະຊາຊົນ ເຊິ່ງໄລຍະຜ່ານມາຄະນະມິດຕະພາບໄທ-ລາວ ໄດ້ນຳເອົາອຸປະກອນການຮຽນ, ເຄື່ອງນຸ່ງຫົ່ມ ແລະ ຄອມພິວເຕີ, ພ້ອມດ້ວຍເງິນສົດຈຳນວນໜຶ່ງ ມາມອບໃຫ້ໂຮງຮຽນສາມັນຊົນເຜົ່າແຂວງວຽງຈັນ ແລະ ອື່ນໆ.
ພາຍຫລັງພົບປະສອງຝ່າຍ, ຄະນະຜູ້ແທນສະພາແຫ່ງຊາດໄດ້ເຂົ້າຢ້ຽມຂໍ່ານັບ ທ່ານ ປະດິພັດ ສັນຕິພາດາ ຮອງປະທານລັດຖະສະພາ ແຫ່ງ ຣາຊະອານາຈັກໄທ ໂດຍທ່ານປະທານຄະນະມິດຕະພາບລັດຖະສະພາ ລາວ-ໄທ ພ້ອມທັງແຈ້ງໃຫ້ຊາບຜົນການພົບປະກັບ ກຸ່ມມິດຕະພາບສະມາຊິກລັດຖະສະພາ ໄທ-ລາວ ເຊິ່ງສອງຝ່າຍພ້ອມກັນຕີລາຄາຄືນການພົວພັນຮ່ວມມື ລະຫວ່າງ ສອງອົງການນິຕິບັນຍັດ ກໍຄື ສອງຄະນະມິດຕະພາບລັດຖະສະພາ ໃນໄລຍະຜ່ານມາ, ປຶກສາຫາລືທິດທາງການຮ່ວມມືໃນຕໍ່ໜ້າ ແລະ ຍັງໄດ້ປຶກສາຫາລື ທິດທາງແຜນການເພື່ອຊຸກຍູ້ໃຫ້ແກ່ການການພົວພັນຮ່ວມມື ລະຫວ່າງສອງລັດຖະບານ ເປັນຕົ້ນ ການຮ່ວມມືດ້ານເສດຖະກິດ-ສັງຄົມ, ພະລັງງານ, ແຮງງານ, ການພັດທະນາຊັບພະຍາກອນມະນຸດ, ການທ່ອງທ່ຽວ ແລະ ອື່ນໆ.
ນອກຈາກນີ້, ຄະນະຜູ້ແທນສະພາແຫ່ງຊາດລາວ ຍັງໄດ້ພົບປະ ແລະ ເຮັດວຽກຮ່ວມກັບ ຄະນະກຳມະການການເລືອກຕັ້ງ ແຫ່ງ ຣາຊະອານາຈັກໄທ ເພື່ອປຶກສາຫາລື ແລະ ແລກປ່ຽນບົດຮຽນກ່ຽວກັບບົດຮຽນ ແລະ ປະສົບການ ໃນການເລືອກຕັ້ງ ເພື່ອເປັນຂໍ້ມູນໃຫ້ແກ່ສະພາແຫ່ງຊາດລາວ ທີ່ຈະມີການເລືອກຕັ້ງ ໃນປີ 2026, ໄດ້ພົບປະກັບຜູ້ວ່າຣາຊະການ ຈັງຫວັດເພັດສະບູລີ ໃນໂອກາດທີ່ໄປຢ້ຽມຢາມ ແລະ ເຮັດວຽກ ຢູ່ ຈັງຫວັດເພັດສະບູລີ. ພ້ອທນີ້, ຍັງໄດ້ຢ້ຽມຊົມ ໂຄງການຊ່າງຫົວມັນ ຕາມພະຣາຊະດໍາຣິ, ໂຄງການສຶກສາວິໄຈ ແລະ ພັດທະນາສິ່ງແວດລ້ອມ ແຫລມຜັກເບ້ຍ ຕາມພະຣາຊະດຳຣິ ແລະ ຢ້ຽມຢາມພື້ນຖານທາງດ້ານເສດຖະກິດ ແລະ ທ່ອງທ່ຽວຈໍານວນໜຶ່ງ ຂອງຈັງຫວັດເພັດສະບູລີ ແລະ ຈັງຫວັດປະຈວບຄີລີຂັນ ຕື່ມອີກ.
ຂ່າວ-ພາບ: ສພຊ
