ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 29 ມີນາ 2024 ຜ່ານມານີ້, ໃນທ່ານ ຢາງເວີຍຊູນ (YANG WEIQUN) ຮອງປະທານອົງການພັດທະນາການຮ່ວມມືສາກົນແຫ່ງຊາດຈີນ (CIDCA) ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ເຂດພັດທະນາກວມລວມໄຊເຊດຖາ, ໂດຍມີ ທ່ານ ສີສຸລາດ ລາດສະສີສິນ ຮອງຫົວໜ້າຫ້ອງການ ຄະນະກໍາມະການຮ່ວມມືລາວ-ຈີນ, ກະຊວງແຜນການແລະການລົງທຶນ ແລະ ທ່ານ ຊົງຈູ່ນ ຜູ້ອຳນວຍການບໍລິສັດ ຮ່ວມທຶນລາວ-ຈີນ ຈຳກັດ ເຂົ້າຮ່ວມໃນການຕ້ອນຮັບ.
ຈຸດປະສົງຂອງການຢ້ຽມຢາມ ແລະ ເຮັດວຽກຄັ້ງນີ້ ເພື່ອຊຸກຍູ້-ຕິດຕາມໂຄງການວິທະຍາໄລເຕັກນິກ-ວິຊາຊີບມິດຕະພາບລາວຈີນ ທີ່ຈະສ້າງຕັ້ງຂຶ້ນຢູ່ໃນເຂດພັດທະນາກວມລວມໄຊເຊດຖາ, ຊຶ່ງວິທະຍາໄລວິຊາຊີບດັ່ງກ່າວ ເປັນເປົ້າໝາຍໜຶ່ງໃນໂຄງການການຊ່ວຍເຫຼືອກໍ່ສ້າງໂຮງຮຽນ 10 ແຫ່ງ ທີ່ລັດຖະບານລາວ ໄດ້ສະເໜີຕໍ່ລັດຖະບານຈີນ. ໂຄງການນີ້ ປັດຈຸບັນຢູ່ໃນຂັ້ນຕອນການຂຽນບົດວິພາກເສດຖະກິດ-ເຕັກນິກ; ພາຍຫຼັງທີ່ສຳເລັດການກໍ່ສ້າງ ແລະ ເປີດນຳໃຊ້ວິທະຍາໄລນີ້ ຢ່າງເປັນທາງການແລ້ວຈະສາມາດຮອງຮັບນັກສຶກສາໄດ້ຫຼາຍກວ່າ 300 ຄົນຕໍ່ປີ ແລະ ຈະເປັນສະຖານທີ່ຝືກອົບຮົມວິຊາຊີບ ໃຫ້ແກ່ແຮງງານລາວໃນສາຂາວິຊາຊີບຕ່າງໆ​ ​​ເພື່ອ​ປະກອບສ່ວນ​ເຂົ້າ​ໃນການພັດທະນາ ເສດຖະກິດ -ສັງຄົມ ​ແລະ ຫັນເປັນອຸດສະຫາກຳ ທັນສະໄໝໃນອະນາຄົດ ແລະ ຈະເປັນສະຖານການສຶກສາວິຊາຊີບທີ່ສາມາດສ້າງບຸກຄະລາກອນ ທີ່ມີຄວາມຮູ້-ຄວາມສາມາດດ້ານເຕັກນິກ-ວິຊາຊີບ ເພື່ອຕອບສະໜອງໃຫ້ແກ່ບັນດາໂຄງການລົງທຶນໃນເຂດພັດທະນາກວມລວມໄຊເຊດຖາ ກໍ່ຄືບັນດາໂຮງງານອຸດສາຫະກຳໃນຂອບເຂດທົ່ວປະເທດ.
ເຂດພັດທະນາກວມລວມໄຊເຊດຖາ ແມ່ນໂຄງການຮ່ວມທຶນລະຫວ່າງ ອົງການປົກຄອງນະຄອນຫຼວງວຽງຈັນ (ຕາງໜ້າລັດຖະບານລາວ) ແລະ ບໍລິສັດລົງທຶນຕ່າງປະເທດແຂວງຢຸນນານ (ຕາງໜ້າລັດຖະບານຈີນ), ໂດຍມີເປົ້າໝາຍເພື່ອພັດທະນາແບບກວມລວມຄົບວົງຈອນ ທີ່ປະກອບດ້ວຍເຂດອຸດສາຫະກຳທັນສະໄໝ, ເຂດການຄ້າ, ການບໍລິການ, ເຂດການຂົນສົ່ງ ແລະ ເຂດຕົວເມືອງໃໝ່ ຂອງນະຄອນຫຼວງວຽງຈັນ. ມາເຖິງປັດຈຸບັນ ມີວິສາຫະກິດ ເຂົ້າມາລົງທຶນທັງພາຍໃນ ແລະ ຕ່າງປະເທດ ຈໍານວນ 142 ບໍລິ ສັດ, ມີມູນການລົງທຶນຕົວຈິງພາຍໃນເຂດທັງໝົດ 2,4 ຕື້ກວ່າໂດລາສະຫະລັດ, ມີແຮງງານ 7.828 ຄົນ ແລະ ໃນຕໍ່ໜ້າຈະມີຄວາມຕ້ອງການແຮງງານຫຼາຍກວ່າ 1500-2000 ຄົນຕໍ່ປີ. ວິສາຫະກິດທີ່ເຂົ້າມາເຊັ່ນ: ບໍລິສັດ ໂຮຢາລາວ ຈໍາກັດ ຈາກປະເທດຢີປຸ່ນ ເປັນໂຮງງານຜະລິດເລນແວ່ນຕາ ແລະ ແຜນຮາດດິດເພື່ອສົ່ງອອກ, ບໍລິສັດ ຄວາມຫວັງໃໝ່ ຈຳກັດ ຈາກປະເທດສິງກະໂປ ຜະລິດຫົວອາຫານສັດຈໍາໜ່າຍພາຍໃນປະເທດ, ບໍລິສັດ ເປ້ເຕີເຄື່ອງນຸ່ງຫົ່ມ ຈຳກັດ ຜະລິດເຄື່ອງນຸ່ງຫົ່ມສົ່ງອອກຕ່າງປະເທດ, ບໍລິສັດ ຈົງຫລຸ້ນເຕັກໂນໂລຊີ ຈຳກັດຜູ້ດຽວ ຜະລິດແຜ່ນໂຊລ່າເຊວ ເພື່ອສົ່ງອອກໄປບັນດາປະເທດເອຣົບ ແລະ ອາເມລິກາ, ບໍລິສັດ ຟາມາກຣຸບ ຈຳກັດ ຜະລິດຕະພັນການແພດ ແລະ ບໍລິສັດອື່ນໆ.