ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 10 ພະຈິກ 2023 ນີ້, ກະຊວງປ້ອງກັນປະເທດລາວ ໄດ້ຈັດກອງປະຊຸມປຶກສາຫາລືສອງຝ່າຍກ່ຽວກັບວຽກງານການຮ່ວມມື ເກັບກູ້ລະເບີດບໍ່ທັນແຕກ ຮ່ວມກັບ ກະຊວງປ້ອງກັນປະເທດ ຣັດເຊຍ. ຝ່າຍລາວມີສະຫາຍ ພົນຕີ ສາຍໃຈ ກົມມະ ສິດ ຫົວໜ້າຫ້ອງວ່າການກະຊວງປ້ອງກັນປະເທດ, ຝ່າຍຣັດເຊຍມີ ສະຫາຍ ພັນເອກ ອາບຣາມົບ ເຊຣເກ ຫົວໜ້າວິຊາການໃຫຍ່ຂອງກົມຊ່າງແສງ ກຳລັງປະກອບອາວຸດແຫ່ງ ສ. ຣັດເຊຍ ພ້ອມດ້ວຍຄະນະ, ຕະຫຼອດຮອດພາກສ່ວນທີ່ກຽ່ວຂ້ອງທັງສອງຝ່າຍເຂົ້າຮ່ວມ.
ກອງປະຊຸມພົບປະທັງສອງຝ່າຍໄດ້ມີການປຶກສາຫາລືກັນຫຼາຍດ້ານ ໂດຍສະເພາະແມ່ນໄດ້ປຶກສາ ຫາລືກຽ່ວກັບການກະກຽມເປັນປະທານຮ່ວມໜ່ວຍງານຜູ້ຊ່ຽວຊານດ້ານເກັບກູ້ລະເບີດເພື່ອມະນຸດສະທຳ ໃນຂອບເຂດ ADMM pLus ກໍຄືກອງປະຊຸມລັດຖະມົນຕີປ້ອງກັນປະເທດອາຊຽນ-ບວກ ເພື່ອປຶກສາຫາລື ແລະ ເອກະພາບກຽ່ວກັບແຜນການຮ່ວມມືສອງກະຊວງປ້ອງກັນປະເທດ ລາວ-ຣັດເຊຍ ປະຈຳປີ 2024 ເຊິ່ງ ຄະນະຜູ້ແທນທັງສອງຝ່າຍໄດ້ຜັດປ່ຽນກັນແຈ້ງສະພາບວຽກງານທີ່ກ່ຽວຂ້ອງ ກັບໜ້າທີ່ຄວາມຮັບຜິດຊອບຂອງຕົນໃຫ້ກັນ ແລະ ກັນຊາບ ພ້ອມທັງໄດ້ຕີລາຄາສູງຕໍ່ມູນເຊື້ອອັນດີງາມ ແລະ ສາຍພົວພັນການຮ່ວມມືຂອງ ລາວ ແລະ ຣັດເຊຍ ທີ່ມີມາແຕ່ດົນນານແລ້ວນັ້ນນັບມື້ເພີ່ມທະວີຄວາມແໜ້ນແຟ້ນຂຶ້ນເລື້ອຍໆ ໃນນີ້, ກອງປະຊຸມກໍ່ມີການປຶກສາຫາຫາລືຮ່ວມກັນຫຼາຍບັນຫາທີ່ສຳຄັນ ທີ່ຕ່າງຝ່າຍຕ່າງມີຄວາມສົນໃຈ ໂດຍສະເພາະແມ່ນໄດ້ລົງເລິກປຶກສາຫາລືຮ່ວມກັນ ກ່ຽວກັບວຽກງານການຮ່ວມມືໃນໄລຍະຜ່ານມາ ແລະ ທິດທາງແຜນງານການຮ່ວມມືໃນຕໍ່ໜ້າກໍຄືວາລະການຮ່ວມມື ປີ 2023-2027 ໂດຍສະເພາະແມ່ນວຽກງານ ການຮ່ວມມືສອງຝ່າຍ ລາວ-ຣັດເຊຍ ກ່ຽວກັບວຽກງານເກັບກູ້ລະເບີດ ແລະ ການພົວພັນການຮ່ວມມືໃນກອບຂອງອາຊຽນ-ຣັດເຊຍ.
ໃນໂອກາດນີ້, ຝ່າຍ ສ. ຣັດເຊຍ ກໍມີຄວາມຍິນດີ ແລະ ພ້ອມທີ່ຈະຊ່ວຍເຫຼືອ ແລະ ຮ່ວມມືໃນຂົງເຂດວຽກງານທີ່ຝ່າຍລາວນຳສະເໜີ ເພື່ອຜົນປະໂຫຍດຂອງສອງຊາດ ຣັດເຊຍ-ລາວ ກໍຄືຂອງສອງກອງທັບ ຣັດເຊຍ-ລາວ ໃຫ້ໝັ້ນຄົງທະນົງແກ່ນ, ມີໝາກຜົນສຳເລັດຍິ່ງໆຂຶ້ນ ພ້ອມນັ້ນ ສະຫາຍ ພົນຕີ ສາຍໃຈ ກົມມະສິດ ຕາງໜ້າໃຫ້ຝ່າຍລາວກ່າວສະແດງຄວາມຂອບໃຈ ສະຫາຍ ຫົວໜ້າວິຊາການໃຫຍ່ ຂອງກົມຊ່າງແສງ ກຳລັງປະກອບອາວຸດແຫ່ງ ສ. ຣັດເຊຍ ພ້ອມດ້ວຍຄະນະທີ່ໄດ້ເດີນທາງມາເຮັດວຽກຢູ່ລາວ ພ້ອມທັງອວຍພອນໃຫ້ຄະນະຜູ້ແທນຈົ່ງມີຄວາມຜາສຸກ ແລະ ປະສົບຜົນ ສຳເລັດໃນການມາເຮັດວຽກຢູ່ລາວໃນຄັ້ງນີ້.
ໂດຍ: ສົມຄິດ ພູມມີຈິດ
May be an image of 8 people