ວັນທີ 7 ສິງຫານີ້, ທີ່ຫ້ອງວ່າການແຂວງບໍ່ແກ້ວ, ທ່ານ ຄໍາຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ ພ້ອມດ້ວຍຄະນະ ໄດ້ຕ້ອນຮັບ ທ່ານ ພົ.ທ ນັດທະພົງ ເພົາແກ້ວ ເຈົ້າກົມກິດຈະການທະຫານຊາຍແດນກອງບັນຊາການກອງທັບໄທ ພ້ອມດ້ວຍຄະນະ ມາຢ້ຽມຢາມ ແລະ ເຮັດວຽກຢູ່ແຂວງບໍ່ແກ້ວ.
ທ່ານ ຄໍາຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ ໄດ້ລາຍງານສະພາບ, ພິເສດຂອງແຂວງ ແລະ ການພົວພັນຮ່ວມມືລາວ-ໄທ ຜ່ານມາ ແຂວງບໍ່ແກ້ວ ແລະ ຈັງຫວັດຊຽງຣາຍ ໄດ້ຮັບການພົວພັນຮ່ວມມືຢ່າງໃກ້ຊິດ ໃນການປະສານງານ, ການສະ ໜອງຂໍ້ມູນຂ່າວສານແລກປ່ຽນບົດຮຽນດ້ານວິຊາການໂດຍສະ ເພາະແມ່ນດ້ານການຄ້າຊາຍແດນ ແລະ ແລກປ່ຽນຂໍ້ມູນສົ່ງເສີມການຄ້າ-ການລົງທຶນຂອງສອງຝ່າຍ; ຢູ່ຂັ້ນທ້ອງຖິ່ນ, ແຂວງ ແລະ ຈັງຫວັດ ໄດ້ມີການພົວພັນຮ່ວມມືບ້ານໃກ້ເຮືອນຄຽງ ຕາມກົນ ໄກພົວພັນຮ່ວມມືຂອງສອງຝ່າຍເປັນຕົ້ນ: ການແລກປ່ຽນ ພົບປະຢ້ຽມຢາມເຊິ່ງກັນ ແລະ ກັນ ລະຫວ່າງ ການນຳຂັ້ນແຂວງ- ຈັງຫວັດຂອງສອງຝ່າຍ; ການຮ່ວມມືປົກປັກຮັກສາຄວາມສະ ຫງົບ ແລະ ຄວາມເປັນລະບຽບຮຽບຕາມແນວຊາຍແດນ, ການ ຮ່ວມມືຕ້ານ,ສະກັດກັ້ນການຄ້າຂາຍຢາເສບຕິດ, ການລັກລອບເຂົ້າອອກ-ເມືອງ; ຂັ້ນເມືອງ-ອໍາເພີຄູ່ຂະໜານລຽບຕາມຊາຍແດນ ກໍໄດ້ມີກົນໄກການພົວພັນຮ່ວມມື ແລກປ່ຽນບົດຮຽນເຊິ່ງກັນ ແລະ ກັນເປັນຕົ້ນ ດ້ານວຽກງານສາທາລະນະສຸກ, ກິລາ-ສິລະປະ, ວັດທະນະທໍາ ເພື່ອສົ່ງເສີມການທ່ອງທ່ຽວຂອງເມືອງລຽບຕາມຊາຍແດນ, ການຮ່ວມມືສະກັດກັ້ນໄຟລາມປ່າ ແລະ ໝອກຄວັນ, ການອໍານວຍຄວາມສະດວກໃນການເດີນທາງເຂົ້າ-ອອກເມືອງ ຂອງປະຊາຊົນສອງຝ່າຍ ເຫັນວ່ານັບມື້ມີຄວາມຜູກພັນສະໜິດແໜ້ນ ແລະ ມີການຊ່ວຍເຫຼືອເພິ່ງພາອາໄສເຊິ່ງກັນ ແລະ ກັນ ຕາມກອບການຮ່ວມມືຂອງສອງລັດຖະບານ ແລະ ຂັ້ນທ້ອງຖິ່ນ. ທາງລັດຖະບານໄທ ໄດ້ໃຫ້ການຊ່ວຍເຫຼືອ ແກ່ແຂວງບໍ່ແກ້ວ ນັບຕັ້ງແຕ່ປີ 2021 ມາຮອດປັດຈຸບັນ ເປັນງົບປະມານ ຈຳນວນຫຼາຍ ເປັນຕົ້ນ ທຶນສົມທົບໃນການປັບປຸງ ກໍ່ສ້າງອາຄານ, ສະຖານທີ່ໂຮງຮຽນ, ໂຮງໝໍ, ວັດ ແລະ ອຸປະກອນຄອມພີວເຕີໃຫ້ສຳນັກ ງານອົງການ.
ການມາຢ້ຽມຢາມ ແລະ ເຮັດວຽກ ຂອງຄະນະໃນຄັ້ງນີ້ ກໍຍັງຈະໄດ້ໃຫ້ການຊ່ວຍເຫຼືອອຸປະກອນເພື່ອມາຕິດຕັ້ງ ແລະ ການຝຶກອົບຮົມການນຳໃຊ້ງານລະບົບຕິດຕາມສະຖານະການໝອກຄວັນອີກດ້ວຍ (ບັນຫາໝອກຄວັນ ໃນໄລຍະຜ່ານມາ ໄດ້ກາຍເປັນສິ່ງທ້າທາຍ ອັນໜຶ່ງຕໍ່ການພັດທະນາ; ການທ່ອງທ່ຽວ ແລະ ຕໍ່ສຸຂະພາບຂອງປະຊາຊົນ, ຊຶ່ງເກີດຈາກຄວັນໂຮງຈັກໂຮງງານ, ພາຫະນະຂົນສົ່ງ,ຈາກການເຜົາປ່າເພື່ອທຳການຜະລິດ ແລະ ລ່າສັດ; ໄລຍະຜ່ານມາແຂວງບໍ່ແກ້ວກໍໄດ້ແຕ່ງຕັ້ງຄະນະຮັບຜິດຊອບວຽກດັ່ງກ່າວໂດຍຖືເອົາການໂຄສະນາປະຊາສຳພັນ ໃຫ້ຄວາມຮູ້ແກ່ຊຸມຊົນ, ປະຊາຊົນ ເປັນເຈົ້າການປົກປັກຮັກສາປ່າ ແລະ ສິ່ງແວດລ້ອມ; ຖ້າມີຄວາມຈຳເປັນຈູດປ່າເພື່ອທຳການຜະລິດ ໃນເຂດຊົນນະບົດ ກໍຕ້ອງສ້າງແລວກັນໄຟໄໝ້ລາມປ່າ; ພ້ອມນີ້ກໍໄດ້ເອົາໃຈໃສ່ເຝົ້າລະວັງຕິດຕາມ ຈຸດຮ້ອນໃນໄລຍະລະດູແລ້ງ ຖ້າເກີດມີໄຟໄໝ້ລາມປ່າ ກໍໄດ້ສັ່ງການ ລົງສົມທົບກັບເມືອງ ລົງແກ້ໄຂຢ່າງຮີບດ່ວນ ແລະ ເດັດຂາດ, ຮ່ວມມືກັບແຂວງ ແລະ ປະເທດໃກ້ຄຽງ (ໂດຍສະເພາະຣາຊະອານາຈັກໄທ), ແຕ່ກໍມີຄວາມຈຳກັດ ຖ້າທຸກບ້ານ, ທຸກເມືອງ, ທຸກແຂວງ ແລະ ທຸກປະເທດໃນໂລກ, ພາກພື້ນ ຫາກບໍ່ຮ່ວມກັນແກ້ໄຂຢ່າງຈິງຈັງ.
ຈາກນັ້ນຄະນະຜູ້ແທນທັງສອງຝ່າຍ ກໍໄດ້ສືບຕໍ່ເບິ່ງການຝຶກອົບຮົມການຕິດຕາມ, ແຈ້ງເຕືອນບັນຫາໄຟໄໝ້ລາມປ່າ ແລະ ໝອກຄວັນຢູ່ພະແນກຊັບພະຍາກອນທໍາມະຊາດ ແລະ ສິ່ງແວດ ລ້ອມແຂວງ ຊຶ່ງອຸປະກອນດັ່ງກ່າວແມ່ນໄດ້ຮັບການຊ່ວຍເຫຼືອລ້າຈາກກົມທະຫານຊາຍແດນ ຣາຊະອານາຈັກໄທ ມອບໃຫ້ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ຄວບຄຸມ, ຕິດຕາມ ແລະ ແຈ້ງເຕືອນ ໄຟໄໝ້ລາມປ່າ ແລະ ໝອກຄວັນ ໃຫ້ປະຊາຊົນໄດ້ຮັບຊາບ ແລະ ພ້ອມກັນສະກັດກັ້ນຊ່ວຍກັນ.
(ຂ່າວ: ຄໍາເພັງ ສີສະຫວ່າງ; ກວດແກ້: ນ.ຄໍາມ່ວນ ແກ້ວດວງຕາ)
