ຄະນະຜູ້ແທນ ສປປ ລາວ ສຳເລັດການເຂົ້າຮ່ວມກອງປະຊຸມລະດັບສູງ ສຳລັບພາກພື້ນອາຊີ ແລະ ເອີຣົບ

ໃນວັນທີ 22-23 ສິງຫາ 2023 ທີ່ ສໍານັກງານຄະນະກໍາມາທິກາເສດຖະກິດ-ສັງຄົມ ສະຫະປະຊາຊາດ ປະຈໍາພາກພື້ນອາຊີ- ປາຊິຟິກ (UNESCAP), ບາງກອກ, ປະເທດໄທ, ຄະນະຜູ້ແທນ ສປປ ລາວ ທີ່ປະກອບດ້ວຍ ກະຊວງການຕ່າງປະເທດ ແລະ ກະຊວງໂຍທາທິການ ແລະ ຂົນສົ່ງ ໄດ້ເຂົ້າຮ່ວມກອງປະຊຸມລະດັບສູງ ສຳລັບພາກພື້ນ ອາຊີ ແລະ ເອີຣົບ ເພື່ອທົບທວນທ້າຍສະໄໝ ການຈັດຕັ້ງປະຕິບັດແຜນດໍາເນີນງານ ວຽນນາ (VPoA) ສໍາລັບປະເທດກໍາລັງພັດທະນາທີ່ບໍ່ມີຊາຍແດນຕິດທະເລ (LLDCs) ສົກປີ 2014-2024, ໂດຍສະເພາະຄວາມຄືບຫນ້າ, ຜົນສໍາເລັດ, ຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ ໃນການຈັດຕັ້ງປະຕິບັດ 6 ຂົງເຂດບູລິມະສິດ ຄື: (1) ນະໂຍບາຍພື້ນຖານ ກ່ຽວກັບ ຂົນສົ່ງຜ່ານແດນ; (2) ການພັດທະນາ ແລະ ບູລະນະຮັກສາພື້ນຖານໂຄງລ່າງ; (3) ການຄ້າສາກົນ ແລະ ການອໍານວຍຄວາມສະດວກດ້ານການຄ້າ; (4) ການເຊື່ອມໂຍງ ແລະ ຮ່ວມມືພາກພື້ນ; (5) ການຫັນປ່ຽນໂຄງສ້າງດ້ານເສດຖະກິດ; (6) ເຄື່ອງມືການຈັດຕັ້ງປະຕິບັດ ລວມເຖິງການແລກປ່ຽນບົດຮຽນ ແລະ ວິທີທາງທີ່ດີ ໃນການຮັບມືກັບຜົນກະທົບຈາກການລະບາດຂອງພະຍາດໂຄວິດ-19 ແລະ ບັນດາວິກິດການອື່ນໆ ທີ່ພວມເກີດຂຶ້ນໃນປັດຈຸບັນ.

ໃນຕອນເຊົ້າຂອງວັນທີ 22 ສິງຫາ 2023, ທ່ານ ນາງ ຣາບັບ ຟາຕີມາ (Rabab Fatima), ຮອງເລຂາທິການໃຫຍ່ ອົງການ ສປຊ ທັງເປັນ ຜູ້ຕາງໜ້າຂັ້ນສູງ ສປຊ ທີ່ຮັບຜິດຊອບປະເທດດ້ອຍພັດທະນາ, ປະເທດກໍາລັງພັດທະນາທີ່ບໍ່ມີຊາຍແດນຕິດທະເລ ແລະ ປະເທດເກາະດອນນ້ອຍກໍາລັງພັດທະນາ ໄດ້ກ່າວເປີດກອງປະຊຸມ, ເຊິ່ງໃນນັ້ນ ທ່ານໄດ້ສະແດງຄວາມເປັນຫ່ວງຕໍ່ກັບສະພາບວິກິດການໃນທົ່ວໂລກ ແລະ ຜົນກະທົບຮອບດ້ານ ທີ່ບັນດາປະເທດ LLDCs ຕ້ອງປະເຊີນໃນໄລຍະຜ່ານມາ ແລະ ຍ້ອນມີຄວາມບອບບາງກວ່າປະເທດອື່ນ ຈຶ່ງເຮັດໃຫ້ປະເທດເຫລົ່ານີ້ ຍິ່ງຕ້ອງພົບກັບສະພາບຫຍຸ້ງຍາກອີກຫຼາຍເທົ່າ. ສະນັ້ນ, ຈຶ່ງມີຄວາມຈໍາເປັນຢ່າງຍິ່ງ ທີ່ບັນດາປະເທດທາງຜ່ານ, ຄູ່ຮ່ວມພັດທະນາ ແລະ ພາກສ່ວນທີ່ກ່ຽວຂ້ອງ ຕ້ອງເພີ່ມທະວີການຮ່ວມມືສະໜັບສະໜູນປະເທດເຫຼົ່ານີ້ ໂດຍສະເພາະໃນວຽກງານເຊື່ອມໂຍງເຊື່ອມຈອດ, ການອໍານວຍຄວາມສະດວກດ້ານການຄ້າ ແລະ ການຂົນສົ່ງ ກໍຄື ການຮັບມືບັນຫາການປ່ຽນແປງດິນຟ້າອາກາດ ແລະ ການສະໜອງທຶນເພື່ອການພັດທະນາ.

ໃນໂອກາດດັ່ງກ່າວ, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີ ກະຊວງການຕ່າງປະເທດ, ຫົວໜ້າຄະນະຜູ້ແທນ ສປປ ລາວ ທີ່ໄດ້ຮັບກຽດຖືກແຕ່ງຕັ້ງເປັນໜຶ່ງໃນສອງຮອງປະທານກອງປະຊຸມໃນຄັ້ງນີ້ ກໍໄດ້ກ່າວປາໄສໃນພາກສົນທະນາລະດັບສູງ ພາຍໃຕ້ຫົວຂໍ້ “ສະພາບການຈັດຕັ້ງປະຕິບັດແຜນດຳເນີນງານ ວຽນນາ ແລະ ການຊຸກຍູ້ການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ ຢູ່ປະເທດ LLDCs ໃຫ້ສໍາເລັດຜົນ: ບົດຮຽນທີ່ຖອດຖອນໄດ້ ແລະ ຟື້ນຟູໃຫ້ດີຂຶ້ນ”, ເຊິ່ງໃນນັ້ນ ທ່ານ ໄດ້ເວົ້າເຖິງຜົນສໍາເລັດ ແລະ ສິ່ງທ້າທາຍ ໃນການຈັດຕັ້ງປະຕິບັດແຜນດໍາເນີນງານວຽນນາ ໃນລະດັບປະເທດ ໂດຍຜ່ານການເຊື່ອມສານເຂົ້າໃນ ແຜນພັດທະນາເສດຖະກິດ-ສັງຄົມແຫ່ງຊາດ ກໍຄື ແຜນພັດທະນາຂອງຂະແໜງການທີ່ກ່ຽວຂ້ອງ ໂດຍສະເພາະຜົນສໍາເລັດໃນການພັດທະນາພື້ນຖານໂຄງລ່າງ ເຊັ່ນ: ການສ້າງທາງດ່ວນ, ຂົວມິດຕະພາບ ລວມເຖິງ ເສັ້ນທາງລົດໄຟລາວ-ຈີນ ແນໃສ່ສ້າງຄວາມເຂັ້ມແຂງໃຫ້ແກ່ ລະບົບການຂົນສົ່ງພາຍໃນ ແລະ ລະຫວ່າງປະເທດ ກໍຄືການອໍານວຍຄວາມສະດວກທາງດ້ານການຄ້າ ແລະ ການຂົນສົ່ງ ເພື່ອກ້າວໄປສູ່ການບັນລຸເປົ້າໝາຍທີ່ຈະຫັນປ່ຽນ ສປປ ລາວ ຈາກປະເທດທີ່ບໍ່ມີຊາຍແດນຕິດທະເລ ໃຫ້ກາຍເປັນປະເທດເຊື່ອມໂຍງເຊື່ອມຈອດໃນລະດັບພາກພື້ນ. ພ້ອມກັນນັ້ນ, ກໍໄດ້ມີຂໍ້ສະເໜີແນະ ສໍາລັບການສ້າງແຜນດໍາເນີນງານສະບັບໃໝ່ທີ່ຈະຮັບຮອງໃນປີ 2024 ໃຫ້ມີລັກສະນະຮອບດ້ານ ແລະ ສາມາດຈັດຕັ້ງປະຕິບັດໂດຍທຸກປະເທດ ໂດຍສືບຕໍ່ສຸມໃສ່ຂົງເຂດບຸລິມະສິດທີ່ກ່ຽວຂ້ອງກັບການພັດທະນາພື້ນຖານໂຄງລ່າງ, ການເຊື່ອມໂຍງ ແລະ ອໍານວຍຄວາມສະດວກດ້ານການຄ້າ ແລະ ການຂົນສົ່ງ, ການເຊື່ອມຈອດດ້ານດິຕິຕອນ, ການເຫັນປ່ຽນດ້ານພະລັງງານ ເປັນຕົ້ນ. ພ້ອມນັ້ນ, ຄະນະຜູ້ແທນ ສປປ ລາວ ກໍໄດ້ຮັບໜ້າທີ່ເປັນຜູ້ນໍາພາດໍາເນີນກອງປະຊຸມ ພາກສົນທະນາທີ 1 ກ່ຽວກັບການສົ່ງເສີມການຮ່ວມມື ເພື່ອການຂົນສົ່ງຜ່ານແດນ ແລະ ການອໍານວຍຄວາມສະດວກດ້ານການຄ້າເພື່ອສ້າງຂີດຄວາມສາມາດໃນການແຂ່ງຂັນຂອງປະເທດ LLDCs.

ນອກຈາກນັ້ນ, ຫົວໜ້າຄະນະຜູ້ແທນ ສປປ ລາວ ກໍຖືໂອກາດນີ້ພົບປະສອງຝ່າຍກັບ ທ່ານ ນາງ ຣາບັບ ຟາຕີມາ, ຮອງເລຂາທິການໃຫຍ່ ອົງການ ສປຊ ເພື່ອປຶກສາຫາລືກ່ຽວກັບ ບັນດາວຽກງານ ແລະ ການຮ່ວມມືກັນໃນໄລຍະຕໍ່ໜ້າ ກໍຄື ຂະບວນການກະກຽມກອງປະຊຸມລະດັບສູງ ອົງການ ສປຊ ວ່າດ້ວຍ ປະເທດ LLDCs ຄັ້ງທີ 3 ທີ່ຈະຈັດຂຶ້ນໃນເດືອນມິຖຸນາ 2024 ທີ່ ປະເທດ ຣູວັນດາ ແລະ ການຫຼຸດພົ້ນອອກຈາກສະຖານະພາບປະເທດດ້ອຍພັດທະນາຢ່າງໂລ່ງລ່ຽນ ຂອງ ສປປ ລາວ ພາຍໃນປີ 2026. ພ້ອມນັ້ນ, ຄະນະຜູ້ແທນ ສປປ ລາວ ກໍໄດ້ພົບປະກັບ ຄະນະຜູ້ແທນ ອຸດເບັກກິດສະຖານ ເພື່ອປຶກສາຫາລືກ່ຽວກັບ ການເສີມຂະຫຍາຍການພົວພັນຮ່ວມມືລະຫວ່າງ ສອງ ກະຊວງການຕ່າງປະເທດ ກໍຄື ສອງປະເທດໃນຕໍ່ໜ້າ.

ໃນຕອນທ້າຍກອງປະຊຸມ ກໍໄດ້ມີການຮັບຮອງເອກະສານຜົນຂອງກອງປະຊຸມ ເຊິ່ງຈະເປັນພື້ນຖານທາງດ້ານເນື້ອໃນ ເພື່ອປະກອບສ່ວນເຂົ້າໃນຂະບວນການປຶກສາຫາລືໃນຕໍ່ໜ້າ ກໍຄື ການສ້າງແຜນດໍາເນີນງານສະບັບໃໝ່ໄລຍະທົດສະວັດຕໍ່ໜ້າ ສຳລັບປະເທດ LLDCs. ກຸ່ມປະເທດກຳລັງພັດທະນາທີ່ບໍ່ມີຊາຍແດນຕິດທະເລ ປະກອບດ້ວຍທັງຫມົດ 32 ປະເທດ ຈາກ ພາກພື້ນອາຊີ, ອາຟຣິກາ, ອາເມລິກາລາຕິນ ແລະ ເອີຣົບ.

ຂ່າວ;ພາບ: ກົມການຂ່າວ ກະຊວງການຕ່າງປະເທດ