ກອງປະຊຸມທາງໄກລັດຖະມົນຕີສະພາປະຊາຄົມວັດທະນະທໍາ-ສັງຄົມອາຊຽນ ຄັ້ງທີ 24 ໂດຍການເປັນປະທານຂອງທ່ານດ່າວ ງອກ ຢຸງ ລັດຖະມົນຕີກະຊວງແຮງງານ, ນັກຮົບເສຍອົງຄະ ແລະສັງຄົມ ແຫ່ງ ສສ ຫວຽດນາມ ຈັດຂຶ້ນຕອນບ່າຍວັນທີ 6 ພະຈິກ 2020. ໂດຍມີທ່ານດາໂຕະ ລິມ ຢອກຮອຍ ເລຂາທິການໃຫ່ຍອາຊຽນ ແລະບັນດາລັດຖະມົນຕີວັດທະນະທໍາ-ສັງຄົມອາຊຽນ ຈາກ 10 ປະເທດສະມາຊິກອາຊຽນເຂົ້າຮ່ວມ.
ທ່ານສະຫວັນຄອນ ຣາຊມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະທ່ອງທ່ຽວ ຫົວໜ້າຄະນະຜູ້ແທນລາວ ທີ່ເຂົ້າຮ່ວມກອງປະຊຸມຄັ້ງນີ້ມີຄໍາເຫັນວ່າ: ຂ້າພະເຈົ້າຮັບຊາບ ແລະຕີລາຄາສູງຕໍ່ບົດລາຍງານ ຂອງກອງປະຊຸມເຈົ້າໜ້າທີ່ອາວຸໂສວັດທະນະທໍາ-ສັງຄົມອາຊຽນຄັ້ງທີ 29 ຕະຫລອດທັງຄວາມພະຍາຍາມ ແລະການປະກອບສ່ວນຢ່າງຕັ້ງໜ້າໃນການຈັດຕັ້ງ ປະຕິບັດບັນດາກິດຈະກໍາ ແລະໂຄງການຕ່າງໆ ເພື່ອໃຫ້ບັນລຸໄດ້ຄວາມໝາຍໝັ້ນວິໄສທັດປະຊາຄົມອາຊຽນ 2025 ແລະແຜນແມ່ບົດວັດທະນະທໍາ-ສັງຄົມອາຊຽນ 2025 . ສປປ ລາວ ເຫັນດີສະໜັບສະໜູນບັນດາເອກະສານສໍາຄັນຕ່າງໆ ພາຍໃຕ້ການເປັນປະທານອາຊຽນຂອງ ສສ ຫວຽດນາມ ເພື່ອສະເໜີໃຫ້ຜູ້ນໍາອາຊຽນພິຈາລະນາ ຮັບຮອງ ແລະຮັບຊາບ ທີ່ກອງປະຊຸມ ສຸດຍອດອາຊຽນຄັ້ງທີ 37.
ທ່ານສະຫວັນຄອນ ຣາຊມຸນຕີ ໄດ້ສະແດງຄວາມເສົ້າເສຍໃຈ ແລະເຫັນໃຈຢ່າງສຸດຊຶ້ງ ມາຍັງລັດຖະບານ ແລະປະຊາຊົນບັນດາປະເທດອາຊຽນທີ່ໄດ້ສູນເສຍຊີວິດ ແລະໄດ້ຮັບຜົນກະທົບຈາກພະຍາດອັກເສບປອດ COVID-19. ມາຮອດປະຈຸບັນນີ້ ຢູ່ ສປປ ລາວ ມີຈໍານວນຜູ້ຕິດເຊື້ອທັງໝົດ ທີ່ໄດ້ຮັບລາຍງານ ມີພຽງ 24ກໍລະນີເທົ່ານັ້ນ. ເຊິ່ງປະຈຸບັນນີ້ຜູ້ປ່ວຍຕິດເຊື້ອຄົນສຸດທ້າຍ ພວມໄດ້ຮັບການປິ່ນປົວ ແລະເບິ່ງແຍງຢ່າງໃກ້ຊິດ, ຕໍ່ວຽກງານສະກັດກັ້ນການລະບາດຂອງພະຍາດ COVID-19 ລັດຖະບານລາວ ໄດ້ຮັບຮອງເອົາປຶ້ມຄູ່ມືທີ່ຄອບຄຸມເອົາຫລາຍມາດຕະການຮັບມື ເພື່ອໃຫ້ສອດຄ່ອງກັບມາດຕະການປ້ອງກັນ, ຄວບຄຸມ ແລະຫລັກການປິ່ນປົວ ລວມທັງໃຫ້ການສະໜັບສະໜູນເຊິ່ງກັນແລະກັນໃນເວລາຫຍຸ້ງຍາກນີ້.
ຫລາຍອາທິດຜ່ານມາ ສປປ ລາວ ໄດ້ປະເຊີນກັບພະຍຸໃຕ້ຝຸ່ນທີ່ບໍ່ຄາດຄິດ, ເຊິ່ງເຮັດໃຫ້ບັນດາແຂວງຢູ່ພາກກາງ ແລະພາກໃຕ້ ຖືກຜົນກະທົບຈາກພາວະນໍ້າຖ້ວມ, ກໍ່ໃຫ້ເກີດຄວາມເສຍຫາຍຢ່າງຫລວງຫລາຍຕໍ່ພື້ນຖານໂຄງລ່າງ, ຜົນຜະລິດກະສິກໍາ ແລະຊີວິດການເປັນຢູ່ຂອງປະຊາຊົນພວກເຮົາ. ເຖິງຢ່າງໃດກໍຕາມ, ຄະນະກໍາມະການຄວບຄຸມໄພພິບັດຂັ້ນສູນກາງຂອງ ສປປ ລາວ ກໍໄດ້ເອົາໃຈໃສ່ຕິດຕາມຢ່າງໃກ້ຊິດຕິດແທດຈາກການແຈ້ງເຕືອນຂອງສູນສະໜອງການຊ່ວຍເຫລືອດ້ານມະນຸດສະທໍາອາຊຽນ, ຫລື AHA Center ແລະສູນແຫ່ລງຂໍ້ມູນທາງການອື່ນໆ, ພ້ອມທັງໄດ້ປະສານງານ ແລະເຮັດວຽກຮ່ວມກັບບັນດາປະເທດສະມາຊິກອາຊຽນອື່ນໆ ເພື່ອແຈ້ງສະພາບການປ່ຽນແປງປະຈຸບັນຂອງພະຍຸໃຕ້ຝຸ່ນຕ່າງໆ ເພື່ອຮັບປະກັນດ້ານມາດຕະການຮັບມື ແລະຕອບໂຕ້ຢ່າງມີປະສິດທິພາບ ແລະທັນການ.
ນັບຕັ້ງແຕ່ກອງປະຊຸມລັດຖະມົນຕີສະພາປະຊາຄົມວັດທະນະທໍາ-ສັງຄົມອາຊຽນ ຄັ້ງທີ 23 ສປປ ລາວ ກໍໄດ້ໃຫ້ການສະໜັບສະໜູນ ແລະປະຕິບັດຕາມທິດທາງຍຸດທະສາດ ແລະຈຸດຢືນຂອງອາຊຽນ. ເອົາໃຈໃສ່ຍົກສູງຄວາມໝາຍໝັ້ນການພົວພັນຮ່ວມມື ກັບບັນດາປະເທດສະມາຊິກອາຊຽນ, ບັນດາປະເທທດຄູ່ຮ່ວມເຈລະຈາອາຊຽນ ແລະປະເທດຄູ່ຮ່ວມພັດທະນາອື່ນໆ. ລັດຖະບານ ແຫ່ງ ສປປ ລາວ ຍັງສືບຕໍ່ເອົາໃຈໃສ່ປະກອບສ່ວນເປັນເຈົ້າການ ໃນການຈັດຕັ້ງປະຕິບັດ ແລະເຂົ້າຮ່ວມບັນດາກິດຈະກໍາຂອງອາຊຽນ ແລະບັນດາຂໍ້ລິເລີ່ມຕ່າງໆຮ່ວມກັບບັນດາຄູ່ຮ່ວມອື່ນໆ ໃນຂົງເຂດການຮ່ວມມືພາຍໃຕ້ເສົາຄໍ້າວັດທະນະທໍາ-ສັງຄົມອາຊຽນ ເວົ້າສະເພາະໃນໄລຍະທີ່ພວມປະສົບກັບການລະບາດຂອງພະຍາດ COVID-19 ເຊິ່ງສະແດງອອກ ໃນການຈັດຕັ້ງການປະເມີນຜົນກາງສະໄໝ ການຈັດຕັ້ງປະຕິບັດແຜນແມ່ບົດ ວັດທະນະທໍາ-ສັງຄົມອາຊຽນ 2025 ລະດັບຊາດໃຫ້ສໍາເລັດຕາມຄາດໝາຍ ເຊິ່ງໄດ້ດໍາເນີນໄປດ້ວຍດີ ແລະໄດ້ຮັບການຮ່ວມມືຈາກບັນດາກະຊວງຢ່າງຕັ້ງໜ້າ ແລະຄາດວ່າບົດລາຍງານການປະເມີນຜົນກາງສະໄໝການຈັດຕັ້ງປະຕິບັດແຜນແມ່ບົດວັດທະນະທໍາ-ສັງຄົມອາຊຽນ 2025 ລະດັບພາກພື້ນ ຈະຮັບຊາບໂດຍຜູ້ນໍາອາຊຽນ ທີກອງປະຊຸມສຸດຍອດອາຊຽນ ຄັ້ງທີ 37 ໃນເດືອນພະຈິກ 2020 ນີ້.
– ກອງປະຊຸມເຈົ້າໜ້າທີ່ອາວຸໂສຊາວໜຸ່ມອາຊຽນຄັ້ງທີ 10 ແລະກອງປະຊຸມປິ່ນອ້ອມຮ່ວມກັບ
ບັນດາປະເທດຄູເຈລະຈາອາຊຽນ ພາຍໃຕ້ການເປັນປະທານຂອງ ສປປ ລາວ ໄດ້ຈັດຂຶ້ນໃນວັນທີ 22 ຕຸລາ 2020.
ກອງປະຊຸມຄະນະວິຊາການກ່ຽວກັບວຽກງານໃນຂະແໜງການແກ້ໄຂບັນຫາລະເບີດບໍ່ທັນແຕກ ໄດ້ຈັດຂຶ້ນຢູ່ນະຄອນຫລວງວຽງຈັນ ໃນວັນທີ 18 ສິງຫາ 2020 ເຊິ່ງເປັນກິດຈະກໍາໜຶ່ງໃນການສົ່ງເສີມແຜນແມ່ບົດອາຊຽນປີ 2025; ການເຊື່ອມສານຂອງສິດທິຄົນພິການ ແລະສົນທິສັນຍາສາກົນ ວ່າດ້ວຍສິດທິຂອງຄົນພິການ.

ໃນວັນທີ 15 ຕຸລາ 2020 ສປປ ລາວ ໄດ້ຈັດກອງປະຊຸມທາງໄກເຄືອຂ່າຍປະສານງານຄວາມປອດໄພໃນການເຮັດວຽກ ແລະສຸຂະພາບແຮງງານອາຊຽນຄັ້ງທີ 21.
ກ່ຽວກັບທິດທາງໃນຕໍ່ໜ້າ ເພື່ອເພີ່ມທະວີ ແລະຮັດແໜ້ນການຮ່ວມມື ທ່ານສະຫວັນຄອນ ຣາຊມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະທ່ອງທ່ຽວ ໄດ້ສະເໜີຕໍ່ກອງປະຊຸມວ່າ: ພວກເຮົາເລັ່ງເຫັນຄວາມໝາຍຄວາມສໍາຄັນ ໃນການເພີ່ມທະວີການຮ່ວມມືພາຍໃນອາຊຽນໃຫ້ຫລາຍຂຶ້ນ ເພື່ອສ້າງປະຊາຄົມອາຊຽນທີ່ເຂັ້ມແຂງ ແລະຕອບໂຕ້ຕໍ່ສະພາບການ.
ພວກເຮົາຄວນສຶກສາຄົ້ນຄວ້າຄວາມເປັນໄປໄດ້ຢ່າງແທດເໝາະ ເພື່ອຂົນຂວາຍການຮ່ວມມື ລະຫວ່າງບັນດາປະເທດສະມາຊິກອາຊຽນດ້ວຍກັນ ກໍຄືບັນດາປະເທດຄູ່ເຈລະຈາອາຊຽນ ແລະ ພາກສ່ວນອື່ນໆ ບົນພື້ນຖານຕ່າງຝ່າຍຕ່າງມີຜົນປະໂຫຍດ ໃນການລິເລີ່ມບັນດານະວັດຕະກຳ ແລະ ຮູບການສື່ສານທາງໄກແບບໃໝ່ ລວມທັງການຈັດກິດຈະກຳຮ່ວມ ແລະ ຮ່ວມມືກັນດ້ານຕ່າງໆ ໃນໄລຍະຂ້າມຜ່ານການລະບາດຂອງພະຍາດໂຄວິດ-19.
ສິ່ງສໍາຄັນອາຊຽນຈໍາເປັນຕ້ອງຮ່ວມມືກັນສືບຕໍ່ຊຸກຍູ້ການແລກປ່ຽນບົດຮຽນປະສົບການທີ່ດີ ແລະ ຂໍ້ມູນຂ່າວສານຢ່າງເປີດກວ້າງ, ເປີດເຜີຍ, ໂປ່ງໃສ ແລະ ທັງທ່ວງທັນຕໍ່ກັບສະພາບການ, ທັງນີ້ກໍ່ເພື່ອສືບຕໍ່ສຶກສາ ແລະ ແນະນຳໃຫ້ປະຊາຊົນຮັບຮູ້ ແລະ ເຂົ້າໃຈເຖິງການດຳລົງຊີວິດ ແລະ ປັບຕົວໃຫ້ສອດຄ່ອງກັບເງື່ອນໄຂ ວິຖີການດຳລົງຊີວິດແບບໃໝ່ ດ້ວຍຄວາມເອົາໃຈໃສ່.
ຕໍ່ກັບແຜນການຟື້ນຟູຫຼັງການແຜ່ລະບາດໃນຕໍ່ໜ້າ ເພື່ອຫຼຸດຜ່ອນຜົນກະທົບຈາກCOVID-19 ທີ່ສົ່ງຜົນຕໍ່ການດຳລົງຊີວິດປົກກະຕິຂອງປະຊາຊົນ ແລະ ເສດຖະກິດຂອງຊາດ ພວກເຮົາຄວນເອົາໃຈໃສ່ສົ່ງເສີມການທ່ອງທ່ຽວວັດທະນະທຳຢູ່ພາຍໃນປະເທດ ລວມທັງຊຸກຍູ້ໃຫ້ປະຊາຊົນຂອງພວກເຮົາທ່ອງທ່ຽວພາຍໃນປະເທດໃຫ້ຫຼາຍຂື້ນ.
ຕອນທ້າຍ ທ່ານສະຫວັນຄອນ ຣາຊມຸນຕີ ໄດ້ສະແດງຄວາມຍ້ອງຍໍຊົມເຊີຍ ທ່ານ ດ່າວ ງອກ ຢຸງ ທີ່ໄດ້ເປັນປະທານນຳພາກອງປະຊຸມໃນເທື່ອນີ້ຢ່າງມີຜົນສຳເລັດ ແລະອວຍພອນໃຫ້ກອງປະຊຸມນີ້ຈົ່ງປະສົບຜົນສຳເລັດອັນຈົບງາມ ແລະ ເຕັມໄປດ້ວຍບັນຍາກາດແຫ່ງການຮ່ວມມືທີ່ດີຂອງອາຊຽນ.

Loading...