ການນຳແຂວງອຸດົມໄຊ ນຳໂດຍ ສະຫາຍ ບຸນຄົງ ຫຼ້າຈຽມພອນ ກຳມະການສຳຮອງສູນກາງ ເລຂາພັກແຂວງ ເຈົ້າແຂວງໆອຸດົມໄຊ ພ້ອມດ້ວຍຄະນະ ໄດ້ຕ້ອນຮັບການເຂົ້າພົບປະຢ້ຽມຢາມຂອງຄະນະຜູ້ແທນ ສະພາປະຊາຊົນ ແຂວງດຽນບຽນ ສສ ຫວຽດນາມ ນຳໂດຍ ສະຫາຍ ວໍ ວັນ ເຟື່ອງ ຄະນະປະຈຳພັກແຂວງ ປະທານສະພາປະຊາຊົນ ແຂວງດຽນບຽນ ພ້ອມດ້ວຍຄະນະ ໃນວັນທີ 7 ສິງຫາຜ່ານມາ ທີ່ແຂວງອຸດົມໄຊ.
ໃນໂອກາດນີ້ ສະຫາຍ ບຸນຄົງ ຫຼ້າຈຽມພອນ ກໍໄດ້ກ່າວສະແດງຄວາມຍິນດີຕ້ອນຮັບ, ຊົມເຊີຍ ແລະ ລາຍງານສະພາບການປະຕິບັດແຜນພັດທະນາເສດຖະກິດ ຂອງແຂວງອຸດົມໄຊ ໃຫ້ກັບ ຄະນະຜູ້ແທນສະພາປະຊາຊົນແຂວງດຽນບຽນ ໄດ້ຮັບຮູ້ບາງດ້ານ ເປັນຕົ້ນແມ່ນ ທ່າແຮງໃນການພັດທະນາເສດຖະກິດ-ສັງຄົມ, ການທ່ອງທ່ຽວ, ວຽກງານການຮ່ວມມືລະຫວ່າງສອງແຂວງໃນໄລຍະຜ່ານມາ.
ພ້ອມດຽວກັນນີ້ ສະຫາຍ ບຸນຄົງ ຫຼ້າຈຽມພອນ ໄດ້ເນັ້ນໃຫ້ສະພາປະຊາຊົນແຂວງອຸດົມໄຊ ແລະ ດຽນບຽນ ສສ ຫວຽດນາມ ຈົ່ງເພີ່ມທະວີຄວາມສາມັກຄີ, ແລກປ່ຽນບົດຮຽນດ້ານຕ່າງໆ ເຊິ່ງກັນ ແລະ ກັນ ເພື່ອເຮັດໃຫ້ການຮ່ວມມື ກ້າວເຂົ້າສູ່ລວງເລິກ.
