ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ການນໍາ ແຂວງຈໍາປາສັກ ລົງຕິດຕາມການກັກກັນໂຕຂອງ ແຮງງານທີ່ມາແຕ່ປະເທດໄກ້ຄຽງຢູ່ທີ່ຈຸດ  ມສ​ ເກົ່າເກິງ ເມືອງໂພນທອງ

ຕອນບ່າຍ ວັນທີ 1 ເມສາ 2020, ທ່ານ ວັນນະໄຊ ຊາດຕະກຸນ ຫົວໜ້າພະແນກສາທາລະນະສຸກແຂວງຈຳປາສັກ ຮ່ວມກັບ ທ່ານ ສຸພາບ ທຳມະຮັກສາ ເຈົ້າເມືອງໆໂພນທອງ ໄດ້ເຄື່ອນໄຫວຢ້ຽມຢາມສູນກັກກັນແຮງງານລາວ ທີ່ກັບມາຈາກປະເທດເພື່ອນບ້ານ ຢູ່ຈຸດໂຮງຮຽນ ມສ ເກົ່າເກີ່ງ ເມືອງໂພນທອງ ພ້ອມທັງນຳພາທີມງານແພດໝໍເຄື່ອນໄຫວພົ່ນຢາປ້ອງເຊື້ອພະຍາດໂຄວິດ 19 ເພື່ອໃຫ້ທຸກຄົນມີຄວາມປອດໄພຈາກພະຍາດດັ່ງກ່າວ.

ທ່ານ​ ສຸພາບ​ ທໍາມະຮັກສາ​ ເຈົ້າເມືອງໆໂພນທອງ​ ໃຫ້ສໍາພາດວ່າ: ໃນໄລຍະທີ່ມີການລະບາດຂອງພະຍາດໂຄວິດ 19, ຢູ່ເມືອງໂພນທອງ ມີແຮງງານລາວ​ທີ່ກັບມາຈາກປະເທດເພື່ອນບ້ານທັງໝົດ 1.500 ຄົນ ເຊິ່ງ​ອົງການປົກຄອງເມືອງ ສົມທົບກັບອໍານາດການປົກຄອງບ້ານ ແລະ ກຸ່ມບ້ານ ນຳໄປກັກກັນໄວ້ຢູ່ຕາມໂຮງຮຽນ ຫລາຍແຫ່ງ ໃນ 9 ກຸ່ມບ້ານທົ່ວເມືອງ.​ ຈາກນັ້ນ ໄດ້ແບ່ງຄວາມຮັບຜິດຊອບໃຫ້ການນຳເມືອງແຕ່ລະສະຫາຍ ຮ່ວມກັບເຈົ້າໜ້າທີ່ສາທາລະນະສຸກ ລົງເຄື່ອນໄຫວຕິດຕາມກວດກາສຸຂະພາບ ແລະ ຊີວິດການເປັນຢູ່ຂອງຜູ້ທີ່ຖືກກັກກັນໃນແຕ່ລະຈຸດ ໃຫ້ມີຄວາມສະດວກສະບາຍ ພ້ອມທັງໂຄສະນາເຜີຍແຜ່ຄວາມຮູ້ ກ່ຽວກັບການປ້ອງກັນ ແລະໄພອັນຕະລາຍຮ້າຍແຮງຂອງພະຍາດໂຄວິດ 19 ໃຫ້ຜູ້ທີ່ຖືກກັກກັນ ໄດ້ຮັບຮູ້ເຂົ້າໃຈ ແລະ ພ້ອມກັນຈັດຕັ້ງປະຕິບັດຕາມຄຳສັ່ງຂອງຄະນະພັກ-ຂັ້ນເທິງ ແລະ ຄຳແນະນໍາຂອງແພດໝໍ ຢ່າງເຄັ່ງຄັດ.

ໂອກາດດຽວກັນນີ້ ການນໍາເມືອງໄດ້ມອບໝາຍໃຫ້ການຈັດຕັ້ງບ້ານ ແລະ ກຸ່ມບ້ານ ເອົາໃຈໃສ່​ຕິດຕາມກວດກາ ພວກກ່ຽວຢ່າງປົກກະຕິ ​.ສຳລັບສູນກັກກັນໂຮງຮຽນ ມສ ເກົ່າເກີ່ງ​ ເມືອງໂພນທອງ​ ມີຜູ້ຖືກກັກກັນ ທັງໝົດ​ 97 ຄົນ,​ ບາງຄົນກັກກັນມາໄດ້ 10​ວັນແລ້ວ, ປະຊົນບ້ານຫ້ວຍເພັກ ໃຫ້ສຳພາດວ່າ: ພາຍຫຼັງທີ່ກັບຈາກປະເທດເພື່ອນບ້ານ ເມື່ອເຂົ້າມາຮອດດິນແດນລາວ ເຊິ່ງເປັນບ້ານເກີດເມືອງນອນຂອງຕົນແລ້ວກໍ່ໄດ້ເອົາໃຈໃສ່ປະຕິບັດຕາມທິດຊີ້ນຳຂອງຂັ້ນເທິງ ແລະ ອຳນາດການປົກຄອງເມືອງແນະນໍາຢ່າງເຄັ່ງຄັດ ແລະ ມາຢູ່ສູນກັກກັນທີ່ອໍານາດການປົກຄອງເມືອງກະກຽມໄວ້ໃຫ້ ເຫັນວ່າພັກ-ລັດ ກໍ່ຄືອຳນາດການປົກຄອງເມືອງ ໄດ້ເອົາໃຈໃສ່ດູແລເບິ່ງເປັນຢ່າງດີ , ມີຄວາມສະດວກສະບາຍ,​ ແຕ່ລະວັນ ທີມງານຊ່ຽວຊານແພດໝໍຈາກແຂວງ ແລະ ເມືອງ​ ໄດ້ລົງມາຕິດຕາມກວດກາສຸຂະພາບໃຫ້ຜູ້ທີ່ຖືກກັກກັນຢ່າງສະໝໍ່າສະເໝີ ເຊິ່ງໄດ້ສ້າງຄວາມອົບອຸ່ນ,​ ຄວາມດີໃຈ ໃຫ້ແກ່ຜູ້ຖືກກັກກັນ.

ນອກຈາກນີ້ ຫົວໜ້າພະແນກສາທາລະນະສຸກແຂວງຈຳປາສັກ ແລະຄະນະ ຍັງໄດ້ໄປຕິດຕາມເບິ່ງສູນປິ່ນປົວພະຍາດໂຄວິດ19 ທີ່ທິມງານແພດໝໍຂອງແຂວງໄດ້ກຽມໄວ້ແລ້ວ ໂດຍກໍານົດເອົາໂຮງໝໍເມືອງເປັນສູນກັກກັນປິ່ນປົວ ມີທັງໝົດ 3 ຫ້ອງ , 28ຕຽງ ເພື່ອກຽມຮອງຮັບຜູ້ທີ່ຕິດພະຍາດໂຄວິດ19.

 

ໂດຍ: ປະພິດ