ໃນວັນທີ 26 ກໍລະກົດ 2024 ນີ້ ສະຫາຍ ວັນທອງ ກອງມະນີ ກຳມະການສູນກາງພັກ, ເລຂາພັກແຂວງ ເຈົ້າແຂວງອັດຕະປື ພ້ອມຄະນະການນຳຂັ້ນສູງຂອງແຂວງ ເຂົ້າຮ່ວມພິທີວາງພວງ ມາລາ ແລະ ຂຽນປຶ້ມໄວ້ອາໄລ ໃຫ້ແກ່ການຈາກໄປຂອງສະຫາຍ ຫງວຽນ ຝູ ຈ້ອງ ອະດີດເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ທີ່ສະຖານກົງສູນໃຫຍ່ ສສ.ຫວຽດນາມ ປະຈໍາພາກໃຕ້ລາວນະຄອນປາກເຊ ເຊິ່ງມີເນື້ອ ໃນ ໃນປື້ມໄວ້ອາໄລວ່າ: ອາໄລຢ່າງສຸດຊຶ້ງ ຕໍ່ການຈາກໄປຂອງສະຫາຍ ຫງວຽນ ຝູ ຈ້ອງ ຜູ້ນຳທີ່ແສນເຄົາລົບຮັກ ຂອງພັກ- ລັດ ແລະ ປະຊາຊົນ ຫວຽດນາມ, ເປັນເພື່ອນມິດທີ່ສະໜິດແໜ້ນ ຂອງພັກ-ລັດ ແລະ ປະຊາຊົນລາວ ຄະນະບໍລິຫານງານພັກແຂວງ, ອົງການປົກຄອງແຂວງ, ແນວລາວສ້າງຊາດ ແລະ ປະຊາຊົນ ແຂວງອຫດຕະປື ຂໍສະແດງຄວາມເສົ້າສະຫລົດໃຈອັນສຸດຊຶ້ງ ແລະ ຂໍແບ່ງເບົາຄວາມທຸກໂສກ ມານະໂອກາດນີ້ດ້ວຍ.
ການຈາກໄປຂອງ ສະຫາຍ ຫງວຽນ ຝູ ຈ້ອງ ເປັນການສູນເສຍອັນໃຫຍ່ຫຼວງຂອງພັກ, ລັດ ແລະ ປະຊາຊົນຫວຽດນາມ ກໍຄືຂອງພັກ, ລັດ ແລະ ປະຊາຊົນລາວບັນດາເຜົ່າ; ເປັນການສູນເສຍຜູ້ນໍາປະຕິວັດທີ່ໂດດເດັ່ນ, ອົງອາດກ້າແກ່ນ, ຜູ້ສືບທອດທີ່ຈົງຮັກພັກດີຢ່າງເລິກເຊິ່ງຕໍ່ລັດທິມາກ-ເລນິນ ແລະ ແນວຄິດ ໂຮ່ ຈີມິງ, ນັກທິດສະດີທີ່ມີວິໄສທັດວິທະຍາສາດກວ້າງໄກ ເຊິ່ງຕະຫຼອດຊີວິດແຫ່ງການເຄື່ອນໄຫວປະຕິວັດຂອງສະຫາຍ ໄດ້ມີຄຸນງາມຄວາມດີອັນດີເລີດຕໍ່ປະເທດຊາດ ແລະ ປະຊາຊົນຫວຽດ ນາມຢ່າງໃຫຍ່ຫຼວງ.
ໃນເວລາແຫ່ງຄວາມໂສກເສົ້າເສຍດາຍນີ້ ຄະນະພັກ-ອົງການປົກຄອງແຂວງອັດຕະປື ຂໍແບ່ງເບົາຄວາມທຸກໂສກເສຍໃຈ, ຄວາມ ອາໄລອາວອນຢ່າງສຸດຊຶ້ງ ຮ່ວມກັບຄະນະພັກ, ລັດຖະບານ, ແນວ ໂຮມປະເທດຊາດ, ຄອບຄົວ, ລູກຫຼານຍາດພີ່ນ້ອງ ແລະ ເພື່ອນມິດສະຫາຍ ກໍຄືປະຊາຊົນຫວຽດນາມ ດ້ວຍຄວາມຈິງໃຈມານະທີ່ນີ້ດ້ວຍ. ຂໍໃຫ້ດວງວິນຍານຂອງສະຫາຍ ຫງວຽນ ຝູ ຈ້ອງ ຈົ່ງໄປສູ່ສຸຂະຕິດ້ວຍເຖີ້ນ.
ຂ່າວ-ພາບ: ວິໄລສັກ ແກ້ວຫຼວງໂຄດ.
