ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 15 ແຂວງຈຳປາສັກໄຂກອງປະຊຸມປະຈຳປີ 2019

ກອງປະຊຸມປະຈຳປີ 2019 ຂອງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 15 ແຂວງຈຳປາສັກໄດ້ໄຂຂຶ້ນຢ່າງເປັນທາງການໃນຕອນບ່າຍຂອງວັນທີ 6 ມັງກອນ 2020 ຢູ່ທີ່ສະພາປະຊາຊົນແຂວງ ໂດຍພາຍໃຕ້ການເປັນປະທານຂອງ ທ່ານ ເມກສະຫວັນ ພົມພິທັກ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 15 ປະທານສະພາປະຊາຊົນແຂວງຈຳປາສັກ, ເຂົ້າຮ່ວມມີຮອງປະທານ, ຄະນະສະມາຊິກສະພາແຫ່ງຊາດປະຈຳເຂດ ຕະຫຼອດຮອດສະມາ ຊິກສະພາປະຊາຊົນແຂວງ ແລະ ພະນັກງານຂະແໜງການກ່ຽວຂ້ອງເຂົ້າຮ່ວມ.
ທ່ານ ເມກສະຫັວນ ພົມພິທັກ ປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 15 ປະທານສະພາປະຊາຊົນແຂວງໄດ້ກ່າວຄຳເຫັນຕໍ່ກອງປະຊຸມວ່າ: ກອງປະຊຸມປະຈຳປີ 2019 ຂອງຄະນະສະມາຊິກສະພາແຫ່ງຊາດເຂດເລືອກຕັ້ງທີ 15 ຄັ້ງນີ້ມີຄວາມສຳຄັນຫຼາຍເນື່ອງຈາກເປັນການສະຫຼຸບຕິລາຄາວຽກງານການເຄື່ອນໄຫວຂອງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 15 ໃນໄລຍະ 1 ປີ 2019 ທີ່ຜ່ານມາ ແລະ ກໍານົດທິດທາງແຜນການປີ 2020, ພ້ອມນີ້ຍັງໄດ້ຜ່ານບົດລາຍງານການຕິດຕາມກວດກາໂຮງງານເຄືອແຫມຢູ່ເມືອງປະທຸມພອນ, ຜ່ານບົດລາຍງານຕິດຕາມກວດກາການແກ້ໄຂຄຳຮ້ອງທຸກຂອງປະຊາຊົນ, ຄົ້ນຄ້ວາພິຈາລະນາ ແລະ ຮັບຮອງເອົາບັນຫາສຳຄັນອື່ນໆ ລວມທັງປຶກສາຫາລືສ້າງເງື່ອນໄຂກະກຽມໃຫ້ແກ່ການເປີດກອງປະຊຸມສະໄໝສາມັນເທຶ່ອທີ VIII ຂອງສະພາປະຊາຊົນແຂວງຊຸດທີ 1 ທີ່ຈະໄຂຂຶ້ນໃນວັນທີ 7~9 ມັງກອນ 2020 ອີກດ້ວຍ.


ຂ່າວ;ພາບ: ເກດສະໜາ