ຄະນະ​ສະ​ເພາະ​ກິດເພື່ອ​ປ້ອງ​ກັນ, ​ຄວບ​ຄຸມ ​ແລະ ​ແກ້​ໄຂ​ການລະບາດ​ຂອງ​ພະຍາດ​ໂຄ​ວິດ 19 ສືບຕໍ່​ເຝົ້າລະວັງ ແລະ ຕິດຕາມ​ຜູ້​ເດີນທາງ​ເຂົ້າອອກ​ຕາມ​ຈຸດ​ຜ່ານ​ແດນ​ຕ່າງໆຢ່າງ​ເຂັ້ມງວດ ​ເພື່ອ​ເກັບ​ຕົວຢ່າງ ​ແລະ ກວດ​ຫາ​ເຊື້ອພະຍາດ​ໂຄ​ວິດ 19 ສະ​ເພາະ​ວັນ​ທີ 16 ທັນວາ ​ໄດ້​ເກັບ​ຕົວຢ່າງ​ມາກ​ວດວິ​ເຄາະ​ທັງໝົດ 453 ຄົນ​ ​ໃນ​ນັ້ນ ມີ 05ຕົວຢ່າງ​ຈາກ​ບຸກຄົນ​ທົ່ວ​ໄປທີ່ມີ​ອາການ ​ແລະ 144 ຕົວຢ່າງຈາກ​ບຸກຄົນ​ທົ່ວ​ໄປ​ທີ່​ບໍ່ມີ​ອາການ 14 ຕົວຢ່າງ​ແຮງ​ງານ​ລາວ​ມາ​ແຕ່​ໄທ 207 ຕົວຢ່າງ​ແຮງ​ງານ​ຈີນ  43 ຕົວຢ່າງ​ແຮງ​ງານຫວຽດນາມ ​ຜົນ​ກວດ​ວິ​ເຄາະ​ທັງໝົດບໍ່ພົບ​ຜູ້​ຕິດ​ເຊື້ອ.

ດຣ ສີສະ​ຫັວດ ສຸດ​ທານີ​ລະ​ໄຊ ຮອງ​ຫົວໜ້າກົມ​ຄວບ​ຄຸມພະ​ຍາດຕິ​ດຕໍ່ ກະຊວງ​ສາທາລະນະ​ສຸກ​ຕາງໜ້າ​ໃຫ້​ຄະນະ​ສະ​ເພາະ​ກິດ​ເພື່ອ​ປ້ອງ​ກັນ, ​ຄວບ​ຄຸມ ​ແລະ ​ແກ້​ໄຂ​ການລະບາດ​ຂອງ​ພະຍາດ​ໂຄ​ວິດ 19 ຖະແຫຼງຂ່າວປະຈຳ​ວັນ​ທີ່​ກະຊວງ​ສາທາລະນະ​ສຸກ​ວ່າ ການລະບາດ​ຂອງ​ພະຍາດ​ໂຄ​ວິດ 19​ໃນ​ທົ່ວ​ໂລກ​ໄດ້​ຂະຫຍາຍ​ເປັນ​ວົງ​ກ້ວາງ​ແລະ ​ບໍ່ທັນ​ມີ​ທ່າ​ອ່ຽງຫຼຸດລົງ ການ​ລາຍ​ງານ​ຈຳນວນ​ຕົວ​ເລກ​ຜູ້​ຕິດ​ເຊື້ອ​ ແລະ ​ຜູ້​ເສຍ​ຊິວິດ​ຍັງ​ສູງ​ຂື້ນ​ເລື້ອຍໆ ເພື່ອ​​ສະກັດ​ກັ້ນການລະບາດພະຍາດ​ໂຄ​ວິດ 19 ພາຍ​ໃນ​ປະ​ເທດ​ເຮົາ​ຮຽກຮ້ອງ​ໃຫ້​ທຸກ​ພາກສ່ວນ​ໃນ​ສັງຄົມ​ຮ່ວມ​ໃຈ​ກັນ​ເປັນ​ເຈົ້າການ​ສືບຕໍ່ປະຕິບັດ​ແຈ້ງ​ການ​ຂອງ​ຫ້ອງ​ວ່າການ​ສຳນັກງານ​ນາຍົກລັດຖະມົນຕີສະບັບ​ເລກທີ 1291 ພ້ອມ​ທັງ​ແນະນຳ​ຂອງ​ຂະ​ແໜງການ​ທີ່​ກ່ຽວຂ້ອງ​ເອົາໃຈໃສ່ປະຕິບັດວຽກງານຂອງຕົນ ເພື່ອປ້ອງກັນພະຍາດໂຄວິດ-19 ໃຫ້ເຂັ້ມງວດທີ່ສຸດ.

ປະຈຸ​ບັນທົ່ວ​ໂລກ​ມີ​ຜູ້​ຕິດ​ເຊື້ອພະຍາດ​ໂຄ​ວິດ 19 ​ເຖິງ 74 ລ້ານກ່ວາ​ຄົນ ​ເສຍ​ຊິວິດ 1 ລ້ານ 6 ​ແສນ​ກ່ວາ​ຄົນ  ປິ່ນປົວ​ດີ 52 ລ້ານກ່ວາ​ຄົນ ​ໃນ​ນີ້ປະ​ເທດ​ທີ່​ມີ​ຜູ້​ຕິດ​ເຊື້ອຫຼາຍກ່ວາໝູ່​ແມ່ນ ສະຫະລັດອາ​ເມ​ລິ​ກາ ມີ​ຜູ້​ຕິດ​ເຊື້ອ 17 ລ້ານ 3​ແສນ​ກ່ວາ​ຄົນ ​ເສຍ​ຊິວິດ 3 ​ແສນ​ກ່ວາ​ຄົນ ສ່ວນ​ຢູ່​ຂົງ​ເຂດ​ອາຊີ​ແມ່ນ​ປະ​ເທດ​ອິນ​ເດຍ ມີ​ຜູ້​ຕິດ​ເຊື້ອ 9 ລ້ານ​ກ່ວາ​ຄົນ, ສຳລັບ​​ປະ​ເທດໃນ​ອາຊຽນມາ​ຮອດ​ວັນ​ທີ 17 ທັນວາມີ​ຜູ້​ຕິດ​ເຊື້ອພະຍາດ​ໂຄ​ວິດ 19 ​ເຖີງ 1 ລ້ານ 3 ​ແສນ​ກ່ວາ​ຄົນ ​ແລະ​ ເສຍ​ຊິວິດ 3ໝື່ນ​ກ່ວາ​ຄົນ.

Loading...