ວັນທີ່ 11 ກັນຍາ 2021 ນີ້ ຄະນະສະ ເພາະກິດ ເພື່ອປ້ອງກັນ ຄວບຄຸມ ສະກັດກັ້ນ ແລະແກ້ໄຂ ການລະບາດຂອງພະຍາດໂຄວິດ 19 ຂັ້ນແຂວງຫຼວງພະບາງ ໄດ້ຈັດກອງປະຊຸມປຶກສາຫາລື ວຽກງານສຸກເສີນ ເພື່ອຕອບໂຕ້ການແຜ່ລະບາດຂອງພະຍາດໂຄວິດ 19 ໂດຍເປັນປະທານຂອງ ທ່ານ ບຸນເລື່ອມ ມະນີວົງ ຮອງເຈົ້າແຂວງຫລວງພະບາງ ຫົວໜ້າຄະນະສະເພາະກິດຂັ້ນແຂວງ ມີຄະນະສະເພາະກິດຂັ້ນແຂວງ ເຂົ້າຮ່ວມ.
ວາລະກອງປະຊຸມ ທ່ານ ບຸນເລື່ອມ ມະນີວົງ ໄດ້ມີຄຳເຫັນເນັ້ນໃຫ້ຄະນະສະເພາະກິດຂັ້ນແຂວງ ສຸມໃສ່ຄົ້ນຄວ້າທີມແພດ ແລະເຈົ້າໜ້າທີ່ ເຂົ້າປ່ຽນປະຈຳການຢູ່ສູນກັດກັນ, ການວາງແຜນຂະຫຍາຍໂຮງໝໍພາກສະໜາມ ເພື່ອສະດວກໃນການປີ່ນປົວຜູ້ຕິດເຊື້ອ, ການຄົ້ນຄວ້າກ່ຽວກັບການເພີ່ມມາດຕະການເຂັ້ມງວດ ຕໍ່ການເດີນທາງເຂົ້າມາຫຼວງພະບາງ ແລະຫ້າມບຸກຄົນພາຍໃນແຂວງ ເດີນທາງໄປຕ່າງແຂວງ-ຕ່າງເມືອງ ຫາກບໍ່ມີຄວາມຈຳ ເປັນ, ພ້ອມນີ້ ທ່ານໄດ້ເນັ້ນໃຫ້ຄະນະນຳຂອງພະແນກແຮງງານ ແລະ ສະຫວັດດີການ-ສັງຄົມແຂວງ ຮີບຮ້ອນປືກສາຫາລືກັບຄະນະສະເພາະກິດບັນດາແຂວງ ກ່ຽວກັບການຮັບເອົາແຮງງານ ຈາກຕ່າງແຂວງ ແລະຕ່າງປະເທດເຂົ້າມາພາຍໃນແຂວງ ເນື່ອງຈາກປະຈຸບັນແຂວງຫຼວງພະບາງ ມີຄວາມຫຍຸ້ງຍາກຫຼາຍ ກ່ຽວກັບການນຳໃຊ້ສູນຈຳກັດບໍລິເວນ ເຊີ່ງອາດ ຈະມີຜູ້ຕິດເຊື້ອເພີ່ມຂື້ນເປັນຈຳນວນ ຫຼາຍ.
ສຳລັບຂໍ້ມູນຫຼ້າສຸດ ໃນວັນທີ່ 11 ກັນຍາ 2021 ແຂວງຫຼວງພະບາງ ມີຜູ້ຕິດເຊື້ອພະຍາດໂຄວິດ 19 ໃນຊຸມຊົນ ເພີ່ມອີກ 34 ຄົນ ໃນນັ້ນ ເປັນພະນັກງານປະຈຳສູນສອງຄົນ ຄື: ແພດ 1 ຄົນ ເປັນເພດຍີງ ທີ່ປະຈຳຢູ່ສູນສະໜາມບີນເກົ່າ ແລະໄດ້ຍ້າຍບ່ອນປະຈຳການມາຢູ່ສູນ ໂຮງຮຽນສ້າງແພດຊັ້ນກາງເກົ່າ ບ້ານທາດຫຼວງ ແລະອີກ 1 ຄົນ ເປັນເພດຊາຍ ພະນັກ ງານຕໍ່າຫຼວດ ປະຈຳຢູ່ສູນກັກກັນ (ສູນບຳລຸງຄູຫວຍມາວ), ນອກນັ້ນ ແມ່ນການຕິດເຊື້ອໃນຊຸມຊົນ ຈາກແຮງງານນຳເຂົ້າຕ່າງແຂວງ ທີ່ໄດ້ເຂົ້າກັກກັນຢູ່ສູນ ປະຈຸ ບັນຜູ້ຕິດເຊື້ອ ໄດ້ເຂົ້າຮັບການປີ່ນປົວ- ແຍກປ່ຽວ ຢູ່ໂຮງໝໍ ແຂວງ ແລະສະ ຖານທີ່ປີ່ນປົວທີ່ກຳນົດ.
ຂ່າວ: ອາພຸດເດດ ບຸບຜາ
