ກອງປະຊຸມ ໄດ້ຈັດຂຶ້ນໃນຕອນບ່າຍຂອງວັນທີ 11 ພຶຶດສະພາ 2021 ທີ່ສະໂມສອນຫ້ອງວ່າການເມືອງລະຄອນເພັງ ໂດຍພາຍໃຕ້ການເປັນປະທານຂອງທ່ານ ທອງດິ ຈັນທະວົງ ກຳມະການພັກແຂວງ ເລຂາພັກເຈົ້າເມືອງລະຄອນເພັງ ແຂວງສາລະວັນ ມີບັນດາທ່ານໃນຄະນະສະເພາະກິດຂັ້ນເມືອງເຂົ້າຮ່ວມ
ກອງປະຊຸມໄດ້ຮັບຟັງບົດລາຍງານ ການຈັດຕັ້ງປະຕິບັດວຽກງານປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຢູ່ເມືອງລະຄອນເພັງຈາກ ທ່ານ ໄຊຊະນະ ສີສະຫັວດ ກຳມະການພັກເມືອງຮອງເຈົ້າເມືອງ ລະຄອນເພັງ ປະທານຄະນະສະເພາະກິດໂຄວິດ19 ຂັ້ນເມືອງ ເຊິ່ງເລີ່ມແຕ່ກາງເດືອນເມສາ 2021 ເປັນຕົ້ນມາ ໄດ້ໂຄສະນາສຶກສາອົບຮົົົົມໃຫ້ພໍ່ແມ່ປະຊາຊົນຮັບຮູ້ເຖິງໄພອັນຕະລາຍຂອງພະຍາດໂຄວິດ19, ຈັດຕັ້ງໜ່ວຍໂຄສະນາເຄື່ອນທີ່ລົງເຜີຍແຜ່ນິຕິກຳ, ຄຳສັ່ງ ແລະ ຂໍ້ຫ້າມຕ່າງໆຢ່າງເລິກເຊິ່ງ ແລະ ທົ່ວເຖິງທຸກທ້ອງຖິ່ນ, ໄດ້ປິດຊົ່ວຄາວການເຂົ້າ-ອອກ 3 ບ້ານທີ່ພົວພັນກັບຜູ້ຕິດເຊື້ອກໍລະນີທີ 54 ຂອງ ສປປລາວ ແລະ ໄດ້ເກັບຕົວຢ່າງຜູ້ສຳຜັດໄກ້ຊິດເພື່ອໄປກວດຊອກເຊື້ອເຊິ່ງຜົນກວດຫຼາຍຄັ້ງເປັນລົບເຊິ່ງປັດຈຸບັນໄດ້ຍົກເລີກການລັອກດາວ 3 ບ້ານ ແລ້ວ ແລະ ອະນຸຍາດໃຫ້ຜູ້ຖືກຈຳກັດບໍລິເວນທັງໝົດອອກຈາກຈຸດກັກກັນໄປສືບຕໍ່ຈຳກັດບໍລິເວນຢູ່ເຮືອນຂອງໃຜລາວ, ໄດ້ລັອກດາວເມືອງລະຄອນເພັງ ພ້ອມທັງຕັ້ງຈຸດກວດກາກັ່ນກອງຄົນເຂົ້າ-ອອກເມືອງ 6 ຈຸດຄື: – ເສັ້ນທາງພູຖ້ຳພວງ-ປາກຕະພານ ( ຈຸດທາງແວ່ນາແລນ) – ຈຸດສີ່ແຍກນາທົມ ( ເສັ້ນທາງໂນນສະຫວ່າງ) – ຈຸດສ້າງຕະຫຼຸງ( ເສັ້ນທາງຄອນສາຍ- ບ້ານທ່າຄັນຊຸມຊົວ) – ຈຸດບ້ານພູຖ້ຳພວງ ( ຊາຍແດນເມືອງສອງຄອນ) – ຈຸດຊາຍແດນເມືອງລະຄອນເພັງ-ເມືອງຄົງເຊໂດນ – ຈຸດຊາຍແດນເມືອງລະຄອນເພັງ- ເມືອງວາປີ – ໄດ້ຈັດຕັ້ງທີມງານເຄື່ອນໄຫວລາດຕະເວນຕາມເສັ້ນທາງລຽບຊາຍແດນແມ່ນ້ຳຂອງຈຳນວນ 2 ຈຸດ ເພື່ອເຄື່ອນໄຫວປ້ອງກັນການລັກລອບຂ້າມລອຍທີ່ບໍ່ຖືກກົດໝາຍ ແລະ ໄດ້ປິດການເຂົ້າອອກບ້ານທົ່ວເມືອງ ສ່ວນການສັກວັກຊີນປ້ອງກັນພະຍາດໂຄວິດ19ໃຫ້ແກ່ກຸ່ມສ່ຽງເຂັມທີ 1 ໄດ້1,594 ຄົນ ແລະ ເຂັມທີ 2 ໄດ້ 1,046 ຄົນ. ຜ່ານການປະເມີນສະຖານະການຂອງຄະນະສະເພາະກິດຂັ້ນເມືອງເຫັນວ່າ: 1. ສືບຕໍ່ປິດເມືອງ (ລອັກດາວ) ອອກໄປອີກ 14 ວັນ. 2. ສືບຕໍ່ປິດ( ລັອກດາວ) ບ້ານລຽບຕາມຊາຍແດນແມ່ນ້ຳຂອງ ແລະ ຈຸດຈຸດກວດກາ, ຄັດກອງຄົນເຂົ້າ-ອອກ ແລະ ເວນຍາມ 24 ຊົ້ວໂມງ. 3. ເນື່ອງຈາກເປັນລະດູຫັນເຂົ້າສູ່ການຜະລິດເຫັນດີ ປົດລັອກ( ເປີດບ້ານລຽບຕາມຊາຍແດນເຊບັ້ງນວນ ແລະ ບ້ານລຽບຕາມທາງເລກທີ 13) ແຕ່ກໍລະນີການເດີນທາງໄປທ້ອງຖິ່ນອື່ນຕ້ອງຂໍໜັງສືຢັ້ງຢືນຈາກບ້ານ ແລະ ຄະນະສະເພາະກິດ. 4. ສືບຕໍ່ຕັ້ງຈຸດກວດກາ, ຄັດກອງພາຫະນະ ແລະ ການເຂົ້າ – ອອກ ຂອງປະຊາຊົນໃນ 3 ຈຸດຄື: ຊາຍແດນລະຄອນເພັງ – ເມືອງ ສອງຄອນ, ລະຄອນເພັງ – ວາປີ ແລະ ລະຄອນເພັງ – ຄົງເຊໂດນ. 5. ເຫັນດີເປີດຕະຫຼາດວັນນັດ( ຂາຍສະເພາະພືດຜັກກະສິກຳ ແລະ ອາຫານ) ແລະ ບໍ່ອະນຸຍາດໃຫ້ຊາວຄ້າ-ຂາຍຕ່າງເມືອງຕ່າງແຂວງເຂົ້າມາຂາຍຊົ່ວຄາວ. 6. ຜ່ອນຜັນເວລາໃນການອອກໄປທຳມາຫາກິນ- ໄປຜະລິດກະສິກຳຂອງປະຊາຊົນອອກເປັນ 6:00 ເຊົ້າ – 18:00 ແລງ.
Loading...