ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ກວດພົບຜູ້ຕິດເຊື້ອພະຍາດໂຄວິດ-19 ເພີ່ມອີກ 1 ຄົນໃນວັນທີ 25 ມັງກອນ 2021, ເຊິ່ງເປັນແຮງງານລາວ, ເພດຍິງ ທີ່ເດີນທາງກັບຈາກປະເທດມາເລເຊຍ. ເຮັດໃຫ້ປະຈຸບັນຍອດຜູ້ຕິດເຊື້ອພະຍາດໂຄວິດ-19 ສະສົມເພີ່ມເປັນ 44 ຄົນ, ພ້ອມນີ້ຄະນະສະເພາະກິດຍັງໄດ້ຊີ້ແຈງກໍລະນີມີຂ່າວລືທີ່ວ່າ ມີແຮງງານລາວລັກເຂົ້າມາໃນປະເທດ ໂດຍບໍ່ຜ່ານຂັ້ນຕອນການກັກບໍລິເວນເປັນເວລາ 14 ມື້ທີ່ກຳນົດໄວ້ ແລ້ວຂີ່ລົດໂດຍສານທີ່ມີມວນຊົນໃກ້ຊິດ 100 ກວ່າຄົນ.
ຮສ. ດຣ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ, ຕ່າງໜ້າໃຫ້ຄະນະສະເພາະກິດທີ່ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຖະແຫຼງຂ່າວປະຈຳວັນທີ 25 ມັງກອນ 2021 ນີ້ວ່າ ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດໂຄວິດ-19 ໃນວັນທີ 24 ມັງກອນມີທັງໝົດ 356 ຄົນ, ໃນນັ້ນມີ 03 ຕົວຢ່າງ ຈາກບຸກຄົນທົ່ວໄປມີອາການ, 73 ຕົວຢ່າງ ຈາກບຸກຄົນທົ່ວໄປບໍ່ມີອາການ; ແຮງງານລາວກັບມາແຕ່ໄທ 32 ຕົວຢ່າງ, ແຮງງານຈີນ 199 ຕົວຢ່າງ ແລະ ແຮງງານໄທ 49 ຕົວຢ່າງ ເຊິ່ງຜົນກວດວິເຄາະທັງໝົດ ແມ່ນພົບຜູ້ຕິດເຊື້ອໃໝ່ຈຳນວນ 1 ຄົນ ເປັນແຮງງານລາວ ເພດຍິງ ອາຍຸ 29 ປີ, ກັບມາຈາກມາເລເຊຍ ສັງລວມການກວດວິເຄາະ ນັບແຕ່ເດືອນມັງກອນ 2020 ຮອດວັນທີ 24 ມັງກອນ 2021 ໄດ້ເກັບຕົວຢ່າງມາກວດທັງໝົດ 101,489 ຕົວຢ່າງ, ກວດຜົບເຊື້ອສະສົມ 44 ຄົນ.
ຮສ.ດຣ ພູທອນ ເມືອງປາກ ໄດ້ໃຫ້ຮູ້ຕື່ມກ່ຽວກັບການຕິດຕາມເຝົ້າລະວັງພະຍາດໂຄວິດ-19 ຢູ່ປະເທດເຮົາ ຮອດ 5 ໂມງແລງຂອງວັນທີ 24 ມັງກອນນີ້ ໄດ້ຕິດຕາມຜູ້ເດີນທາງຈາກຈຸດຜ່ານແດນຕ່າງໆທົ່ວປະເທດ ມີຜູ້ເດີນທາງເຂົ້າມາ ມີທັງໝົດ 2,366 ຄົນ ໃນຈຸດຜ່ານດ່ານລາວ-ໄທ 936 ຄົນ, ເປັນແຮງງານລາວກັບມາແຕ່ໄທ 61 ຄົນ, ຈຸດຜ່ານດ່ານລາວ-ຈີນ 31 ຄົນ, ຈຸດຜ່ານດ່ານລາວ-ຫວຽດນາມ 1,165 ຄົນ, ຈຸດຜ່ານດ່ານລາວ-ກຳປູເຈຍ 2 ຄົນ, ເດີນທາງຜ່ານສະໜາມບິນວັດສາກົນວັດໄຕ 226 ເປັນຄົນຈີນ 195 ຄົນ, ຄົນລາວ 56 ຄົນ, ຕ່າງປະເທດ 15 ຄົນ ທຸກຄົນແມ່ນໄດ້ແທກອຸນຫະພູມຮ່າງກາຍ ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດແລ້ວຈື່ງນຳສົ່ງໄປຫາສະຖານທີ່ຈຳກັດບໍລິເວນທີ່ກຳນົດໄວ້ຈົນກວ່າຈະຄົບກຳນົດ 14 ວັນ.
Loading...