ເນື່ອງໃນໂອກາດ ມາເຂົ້າຮ່ວມກອງປະຊຸມ ສະຫຼຸບຕີລາຄາການນຳພາ-ຊີ້ນຳ ຂອງຄະນະຮັບຜິດຊອບ ຊີ້ນຳການພັດທະນາເຂດຈຸດສຸມໃຈກາງ ຢູ່ແຂວງໄຊສົມບູນ ທີ່ໄດ້ສຳເລັດລົງ ໃນວັນທີ 15 ທັນວາ 2020. ທ່ານ ພັນຄຳ ວິພາວັນ, ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ, ຫົວໜ້າຄະນະຊີ້ນຳພັດທະນາເຂດຈຸດສຸມໃຈກາງ ພ້ອມດ້ວຍຄະນະ ໄດ້ ຂຶ້ນໄປທ່ຽວຊົມຈອມພູເບ້ຍ ໃນຕອນເຊົ້າຂອງວັນທີ 16 ທັນວາ 2020, ໂດຍມີ ພົນຕີ ຄຳລຽງ ອຸທະໄກສອນ, ເລຂາພັກແຂວງ, ເຈົ້າແຂວງໄຊສົມບູນ ພ້ອມດ້ວຍຄະນະພັກ-ຄະນະນຳ ແຂວງ ແລະ ທຸກພາກສ່ວນພາຍໃນແຂວງ ເຂົ້າຮ່ວມຂະບວນການ ຢ່າງຫຼວງຫຼາຍ.
ສຳລັບການຂຶ້ນໄປທ່ຽວຊົມຈອມພູເບ້ຍ ຂອງຄະນະຮັບຜິດຊອບຊີ້ນຳ ການພັດທະນາເຂດຈຸດສຸມໃຈກາງ ຄັ້ງນີ້ ຜູ້ເຂົ້າຮ່ວມຂະບວນການ ໄດ້ຊົມທິວທັດທຳມະຊາດທີ່ສວຍງາມ ຂອງພູ້ເບ້ຍ ທີ່ໄດ້ກຳນົດໄວ້ຕາມຈຸດຕ່າງໆ ດ້ວຍຄວາມປະທັບໃຈ ທີ່ສຳຄັນຂະບວນການໄດ້ຂຶ້ນເຖິງເປົ້າໝາຍສູງສຸດ ກໍຄືຈອມພູເບ້ຍ ຊຶ່ງເປັນຈອມພູທີ່ມີຄວາມສູງອັນດັບໜຶ່ງ ຂອງ ສປປ ລາວ ໂດຍມີຄວາມສູງໃນລະດັບ 2,820 ແມັດ ຈາກລະດັບໜ້ານໍ້າທະເລ ຊຶ່ງໄດ້ຮັບຂະໜານນາມວ່າ: ຫຼັງຄາຂອງປະເທດລາວ. ພ້ອມນີ້ ພູເບ້ຍ ຍັງຖືກອ້ອມຮອບໄປດ້ວຍຕົ້ນໄມ້ທີ່ຖືກຫຸ້ມຫໍ່ດ້ວຍຂົນ ທີ່ມີຄວາມສວຍງາມເປັນພິເສດ ແລະ ອັດສະຈັນ ເມື່ອໄດ້ເຫັນ. ນອກນີ້ ຈຸດເດັ່ນທີ່ສຳຄັນຂອງພູເບ້ຍ ກໍຄືຕົ້ນດອກກຸຫຼາບລ້ານປີ ທີ່ເກີດແຊມຊອນເທິງຈອມພູ ຢ່າງສວຍງາມຕາມທຳມະຊາດ ໂດຍມີມ່ານໝອກປົກຄຸມຕະຫຼອດເວລາ ເຮັດໃຫ້ບັນຍາກາດໂດຍຮອບມີຄວາມອະລັງການ ແລະ ໜາວເຢັນຕະຫຼອດປີ. ຄຽງຄູ່ກັນນີ້ ຍັງເປັນການສົ່ງເສີມວຽກງານການທ່ອງທ່ຽວ ຂອງແຂວງໄຊສົມບູນ ໃຫ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ທັງປະກອບສ່ວນທີ່ສຳຄັນ ເຂົ້າໃນການພັດທະນາເສດຖະກິດ-ສັງຄົມ ຂອງແຂວງ ຕາມ 5 ທ່າແຮງ ທີ່ວາງໄວ້ໃຫ້ປະກົດຜົນເປັນຈິງ. ທັງສະແດງໃຫ້ເຫັນເຖິງຄວາມມີສະຖຽນລະພາບ ທາງດ້ານການເມືອງ ຢ່າງໜັກແໜ້ນ ທີ່ສາມາດນຳພາຂະບວນການຂຶ້ນພິຊິດຈອມພູເບ້ຍ ໄດ້ຢ່າງສະດວກສະບາຍ ແລະ ຮັບປະກັນຄວາມປອດໄພຮ້ອຍສ່ວນຮ້ອຍ. ການຂຶ້ນທ່ຽວຊົມຈອມພູເບ້ຍ ຢູ່ແຂວງໄຊສົມບູນ ເທື່ອນີ້ ເຕັມໄປດ້ວຍບັນຍາກາດເບີກບານມ່ວນຊື່ນ ແລະ ຄວາມປະທັບໃຈ ຈາກຜູ້ທີ່ໄດ້ມາສຳຜັດຕົວຈິງ ເມື່ອກັບຄືນແລ້ວ ກໍຢາກກັບມາທ່ຽວຊົມພູເບ້ຍ ແຫ່ງນີ້ ອີກເທື່ອໃໝ່.
ຂ່າວ: ຈິນລະວອນ ວໍລະສົມບູນ
Loading...