ຄະນະໂຄສະນາອົບຮົມສູນກາງພັກສະຫຼຸບວຽກງານກວດກາ ປະຈຳປີ 2023 ແລະ ວາງທິດທາງແຜນການ ປະຈຳປີ 2024.
ຄະນະໂຄສະນາອົບຮົມສູນກາງພັກຈັດກອງປະຊຸມສະຫຼຸບວຽກງານກວດກາ ປະຈຳປີ 2023 ແລະ ວາງທິດທາງແຜນການ ປະຈຳປີ 2024 ພ້ອມທັງ ເຜີຍແຜ່ເນື້ອໃນ ກອງປະຊຸມວຽກງານກວດກາທົ່ວປະເທດ ປະຈໍາປີ 2024 ໃນຕອນເຊົ້າ ວັນທີ23 ພຶດສະພາ 2024 ຢູ່ຫ້ອງປະຊຸມໃຫຍ່ຄະນະໂຄສະນາອົບຮົມສູນກາງພັກ ນະຄອນຫລວງວຽງຈັນ, ພາຍໃຕ້ການເປັນປະທານຮ່ວມຂອງ ທ່ານ ຄຳພັນ ເຜີຍຍະວົງ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ທ່ານ ນາງ ວິໄລວອນ ພັນທະວົງ ຮອງຫົວຫນ້າຄະນະໂຄສະນາອົບຮົມສູນກາງພັກ ແລະ ທ່ານ ສຸກຄໍາເພັດ ເຮືອງບຸດສີ ຮອງປະທານຄະນະກວດກາສູນກາງພັກ. ມີບັນດາຄະນະພັກ, ຫົວຫນ້າກົມຮອງກົມ, ພ້ອມດ້ວຍພະນັກງານສະມາຊິກພັກ, ພະນັກງານລັດຖະກອນອ້ອມຂ້າງຄະນະໂຄສະນາອົບຮົມສູນກາງພັກເຂົ້າຮ່ວມ.
ທ່ານ ນາງ ອຳພອນ ເຮືອງຄຳ ຮອງຫົວໜ້າກົມໂຄສະນາອົບຮົມສູນກາງ ໄດ້ຂື້ນຜ່ານບົດສະຫຼຸບຕີລາຄາ ການເຄື່ອນໄຫວວຽກງານກວດກາປະຈຳປີ 2023 ແລະ ທິດທາງແຜນການປະຈຳປີ 2024, ບົດສະຫຼຸບຕີລາຄາວຽກງານກວດກາຂອງຄະນະກວດກາສູນກາງພັກ ປະຈຳປີ 2023 ໂດຍຍກໃຫ້ເຫັນຄະນະໂຄສະນາອົບຮົມສູນກາງພັກ ແມ່ນອົງຄະນະພັກໜຶ່ງປະກອບມີ 10 ໜ່ວຍພັກປະຈຳການ ໃນນັ້ນ, ມີ 1 ໜ່ວຍພັກບຳນານ; ຄະນະໂຄສະນາອົບຮົມສູນກາງພັກ ມີສະມາຊິກພັກທັງໝົດ 233 ສະຫາຍ, ຍິງ 103 ສະຫາຍ, ຄະນະພັກ ຄະນະໂຄສະນາອົບຮົມສູນກາງພັກ ໄດ້ເອົາໃຈໃສ່ນໍາພາ-ຊີ້ນໍາ ຢ່າງໃກ້ຊິດ ຕໍ່ກັບວຽກງານການຈັດຕັ້ງປະຕິບັດຄຳສັ່ງຂອງກົມການເມືອງສູນກາງພັກ ວ່າດ້ວຍການຂະຫຍາຍພັກໃຫ້ໄດ້ຕາມມາດຖານ ແລະ ມີຄຸນນະພາບຖືກຕ້ອງຕາມກົດລະບຽບຂອງພັກ, ປີ 2023 ສາມາດຂະຫຍາຍໄດ້ 31 ສະຫາຍ, ຍິງ 14 ສະຫາຍ, ຜ່ານການຮຽນກົດລະບຽບພັກ 9ສະຫາຍ, ໃນປີ 2023 ພາຍໃນຄະນະໂຄສະນາອົບຮົມສູນກາງພັກ ແມ່ນບໍ່ມີການປະຕິບັດລະບຽບວິໄນຕໍ່ການຈັດຕັ້ງພັກ, ຄະນະພັກ ແລະ ສະມາຊິກພັກ, ພະນັກງານ-ລັດຖະກອນ.
ໃນຕອນທ້າຍກອງປະຊຸມ ໄດ້ຮັບຟັງການໂອ້ລົມເພື່ອເປັນທິດທາງໃນການຈັດຕັ້ງປະຕິບັດວຽກງານກວດກາຢູ່ພາຍໃນຄະນະໂຄສະນາອົບຮົມສູນກາງພັກ ໃຫໄດ້ຮັບປະສິດທິພາບ ແລະ ປະສິດທິຜົນ ໃນຕໍ່ໜ້າ ຈາກທ່ານ ຄຳພັນ ເຜີຍຍະວົງ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ທັງເປັນປະທານສະພາທິດສະດີສູນກາງພັກ ຕື່ມອີກ.
