ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຄະນະໂຄສະນາອົບຮົມສູນກາງພັກ ລົງຕິດຕາມຊຸກຍູ້ການສ້າງຂະບວນການສ້າງຜົນງານຕ້ອນຮັບກອງປະຊຸມໃຫຍ່ຄັ້ງທີ 11 ຂອງພັກຢູ່ແຂວງຫລວງນໍ້າທາ

ວັນທີ 15 ແລະ16 ກໍລະກົດ 2020, ທ່ານ ຄຳເຈນ ວົງໂພສີ ກຳມະການສູນກາງພັກ,ຮອງຫົວຫນ້າຄະນະໂຄສະນາອົບຮົມສູນກາງພັກ ຫົວຫນ້າຫນ່ວຍງານໂຄສະນາອະນຸກຳມະການໂຄສະນາແລະຂະບວນການກອງປະຊຸມໃຫຍ່ຄັ້ງທີ 11 ຂອງພັກ ພ້ອມດ້ວຍຄະນະໄດ້ເຄື່ອນໄຫວຢ້ຽມຢາມແລະເຮັດວຽກຢູ່ແຂວງຫລວງນ້ຳທາ ເພື່ອຕິດຕາມຊຸກຍູ້ການສ້າງຂະບວນການດ້ານຕ່າງໆເພື່ອເປັນຜົນງານຕ້ອນຮັບກອງປະຊຸມໃຫຍ່ຄັ້ງທີ 11 ຂອງພັກ, ການສ້າງຂະບວນການກະກຽມກອງປະຊຸມໃຫຍ່ຄັ້ງທີ 8 ຂອງອົງຄະນະພັກແຂວງຫລວງນ້ໍາທາ, ພ້ອມທັງເປັນການປຸກລະດົມຊຸກຍູ້ແນວຄິດຈິດໃຈຂອງພະນັກງານ, ທະຫານ-ຕຳຫລວດ ແລະປະຊາຊົນຊາວແຂວງຫລວງນ້ຳທາເຂົ້າໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ 10 ຂອງພັກໄລຍະທ້າຍສະໄຫມແລະມະຕິກອງປະຊຸມໃຫຍ່ຄັ້ງທີ 7 ຂອງອົງຄະນະພັກແຂວງເຂົ້າສູ່ຊີວິດຕົວຈິງ.

ທ່ານ ພົມມະສຸກ ວິໄລກຸນ ຫົວຫນ້າຫ້ອງວ່າການແຂວງຫລວງນ້ຳທາພ້ອມດ້ວຍຄະນະໄດ້ຕ້ອນຮັບທ່ານ ຄຳເຈນ ວົງໂພສີ ພ້ອມດ້ວຍຄະນະແລະໄດ້ລາຍງານໃຫ້ຮູ້ວ່າ: ປີ 2019 ຜ່ານມາຫລວງນ້ຳທາເປັນແຂວງທີ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພແລະເປັນລະບຽບຮຽບຮ້ອຍໂດຍພື້ນຖານ,ເສດຖະກິດຂະຫຍາຍຕົວຢ່າງຕໍ່ເນື່ອງ ແລະຖືກທິດໃນລະດັບ 8,83 ສ່ວນຮ້ອຍຕໍ່ປີ, ລວມຍອດຜະລິດຕະພັນພາຍໃນ ຫລື ຈີດີພີ ປະຕິບັດໄດ້ 2.876ຕື້ກວ່າກີບ ເທົ່າກັບຫລາຍກວ່າ 96 ສ່ວນຮ້ອຍຂອງແຜນການປີ, ສະເລ່ຍລາຍຮັບຕໍ່ຫົວຄົນໄດ້ 1.731 ໂດລາສະຫະລັດທຽບໃສ່ແຜນການປະຕິບັດໄດ້ຫລາຍກວ່າ 92 ສ່ວນຮ້ອຍ. ທົ່ວແຂວງມີເນື້ອທີ່ປູກເຂົ້າລວມທັງຫມົດ 18.188ເຮັກຕາ ເນື້ອທີ່ເກັບກ່ຽວຕົວຈິງປະຕິບັດໄດ້ 13.180 ເຮັກຕາ, ຜົນຜະລິດປະຕິບັດໄດ້ 43.000ກວ່າໂຕນ ການຜະລິດກະສິກໍາເປັນສິນຄ້າຂອງປະຊາຊົນບັນດາເຜົ່າໄດ້ຂະຫຍາຍຕົວ ເຊັ່ນ: ສາລີ, ອ້ອຍ, ມັນຕົ້ນ, ຫມາກໂມ, ຫມາກອຶ, ຫມາກນ້ຳມັນ, ໄມ້ໃຫ້ຫມາກແລະພືດລົ້ມລຸກອື່ນໆ. ສ່ວນການລ້ຽງສັດປະເພດຕ່າງໆໄດ້ຮັບການຊຸກຍູ້ສົ່ງເສີມເຊັ່ນ: ງົວ,ຄວາຍ,ແບ້,ຫມູ,ປາແລະສັດປີກ ສາມາດສະຫນອງຊີ້ນປາຮັບໃຊ້ສັງຄົມໄດ້ 4.158 ໂຕນຕໍ່ປີແລະເກັບກູ້ຢາງພາລາໄດ້ 35.000ໂຕນ.

ສ່ວນວຽກງານກໍ່ສ້າງຮາກຖານການເມືອງ, ພັດທະນາຊົນນະບົດແລະລຶບລ້າງຄວາມທຸກຍາກໃຫ້ປະຊາຊົນບັນດາເຜົ່າ ໄດ້ຮັບການຈັດຕັ້ງປະຕິບັດຕາມ4ເນື້ອໃນ 4ຄາດຫມາຍຂອງກົມການເມືອງສູນກາງພັກວາງອອກ. ປະຈຸບັນທົ່ວແຂວງມີບ້ານພົ້ນທຸກ 283 ບ້ານ ກວມ 79,83ສ່ວນຮ້ອຍຂອງຈຳນວນບ້ານທັງຫມົດໃນທົ່ວແຂວງ.ການກໍ່ສ້າງພື້ນຖານໂຄງລ່າງໄດ້ຮັບການປັບປຸງແລະກໍ່ສ້າງ ມາຮອດປະຈຸບັນບ້ານທີມີເສັ້ນທາງລົດເຂົ້າເຖິງກວມ 100ສ່ວນຮ້ອຍ ຂອງຈຳນວນບ້ານໃນທົ່ວແຂວງ.ດ້ານວັດທະນາທຳ-ສັງຄົມ ອັດຕາການເຂົ້າຮຽນສຸດທິຂອງເດັກໃນເກນອາຍຸ 6-10ປີ ບັນລຸ 97,2ສ່ວນຮ້ອຍ ພ້ອມທັງສຳເລັດການປະກາດຈົບຊັ້ນມັດທະຍົມຕອນຕົ້ນບຳລຸງໃນທົ່ວແຂວງ,ເອົາໃຈໃສ່ສັກຢາປ້ອງກັນພະຍາດໃຫ້ແມ່ຍິງແລະເດັກນ້ອຍໃນກຸ່ມເປົ້າຫມາຍບັນລຸ 89 ສ່ວນຮ້ອຍ ເຮັດໃຫ້ອັດຕາການເສຍຊີວິດຂອງແມ່ແລະເດັກຫລຸດລົງ . ວັດທະນາທຳອັນດີງາມຂອງຊາດແລະຂອງເຜົ່າໄດ້ຮັບການປົກປັກຮັກສາແລະເສີມຂະຫຍາຍ, ສ່ວນຂົງເຂດການເມືອງ,ພັກ-ພະນັກງານໄດ້ຮັບການປັບປຸງດີຂຶ້ນ,ການພົວພັນຮ່ວມມືກັບຕ່າງປະເທດໄດ້ຮັບການຈັດຕັ້ງປະຕິບັດຕາມແນວທາງການຕ່າງປະເທດຂອງພັກ.

ນອກຈາກເຄື່ອນໄຫວຢ້ຽມຢາມແລະຊຸກຍູ້ວຽກງານຂະບວນການຢູ່ເມືອງຫລວງນ້ຳທາແລ້ວ ທ່ານ ຄຳເຈນ ວົງໂພສີ ພ້ອມດ້ວຍຄະນະຍັງໄດ້ລົງຕິດຕາມຊຸກຍູ້ຂະບວນການຢູ່ເມືອງສິງຕື່ມອີກ.