ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຄະນະໂຄສະນາອົບຮົມສູນກາງພັກຈັດພິທີເຜີຍແຜ່ເຊື່ອມຊຶມ ເອກະສານມູນເຊື້ອຂອງຊາດ

ຄະນະໂຄສະນາອົບຮົມສູນກາງພັກຈັດພິທີເຜີຍແຜ່ເຊື່ອມຊຶມ ເອກະສານມູນເຊື້ອວັນທີ 2 ທັນວາຄົບຮອບ 44ປີ , ວັນຄ້າຍວັນເກີດ ປະທານໄກສອນ ພົມວິຫານ ຄົບຮອບ 99 ປີ ແລະເອກະສານມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ9 ສະໄໝທີ10 ຂອງພັກ ໃນຕອນເຊົ້າວັນທີ 4 ທັນວາ 2019 ທີ່ຫ້ອງປະຊຸມໃຫ່ຍ ຄະນະໂຄສະນາອົບຮົມສູນກາງພັກ ນະຄອນຫລວງວຽງຈັນ, ໂດຍການເປັນປະທານຂອງທ່ານ ຄໍາເຈນ ວົງໂພສີ ກໍາມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ມີພະນັກງານ, ລັດຖະກອນພາຍໃນຄະນະໂຄສະນາອົບຮົມສູນກາງພັກເຂົ້າຮ່ວມ.

ທ່ານຄໍາເຈນ ວົງໂພສີ ປາຖະກະຖາກ່ຽວກັບມູນເຊື້ອວັນຊາດ ທີ 2 ທັນວາ ຄົບຮອບ 44ປີ ເພື່ອທົບທວນຄືນຄວາມຮັບຮູ້ ຄວາມເຂົ້າໃຈກ່ຽວກັບມູນເຊື້ອ ຄວາມເປັນມາ ແລະຄວາມສໍາຄັນຂອງວັນຊາດ ທີ 2 ທັນວາ ທັງເປັນການເອກອ້າງທະນົງໃຈຕໍ່ຜົນງານ ແລະໄຊຊະນະທີ່ຍາດມາໄດ້ຕະຫລອດໄລຍະ 44ປີຜ່ານມາ ເຊິ່ງແມ່ນວັນແຫ່ງໄຊຊະນະອັນຍິ່ງໃຫ່ຍໃນປະຫວັດສາດແຫ່ງການຕໍ່ສູ້ເປັນພັນໆປີຂອງຊາດລາວເຮົາ, ແມ່ນວັນທີ່ປະຊາຊົນລາວບັນດາເຜົ່າໄດ້ມີອິດສະຫລະພາບ ແລະໄດ້ເປັນເຈົ້າຂອງປະເທດຊາດຢ່າງແທ້ຈິງ ; ແມ່ນວັນທີ່ປະເທດລາວໄດ້ມີເອກະລາດຢ່າງສົມບູນ ແລະມີອະທິປະໄຕຢ່າງຄົບຖ້ວນ, ມີທີ່ຕັ້ງອັນສົມກຽດ ແລະມີຖານະເທົ່າທຽມກັບປະເທດອື່ນໆໃນເວທີປະຊາຄົມໂລກ.

ຈາກນັ້ນ ທ່ານ ຄໍາເຈນ ວົງໂພສີ ກໍາມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ປາຖະກະຖາກ່ຽວກັບ ວັນຄ້າຍວັນເກີດ ຂອງປະທານ ໄກສອນ ພົມວິຫານ ໄດ້ຍົກໃຫ້ເຫັນແນວຄິດ, ຄຸນສົມບັດທີ່ພົ້ນເດັ່ນ ແລະມີລັກສະນະພິເສດຂອງເພິ່ນ ໃນການຊີ້ນໍາການປະຕິວັດລາວຕັ້ງແຕ່ເລີ່ມຕົ້ນ ຈົນໄດ້ຮັບໄຊຊະນະຢ່າງສົມບູນ.

ຕໍ່ມາໄດ້ເຜີຍແຜ່ເຊື່ອມຊຶມ ມະຕິກອງປະຊຸມຄົບຄະນະ ບໍລິຫານງານສູນກາງພັກຄັ້ງທີ9 ສະໄໝທີ10 ໂດຍຍົກໃຫ້ເຫັນຜົນສໍາເລັດ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແຜນງົບປະມານ ແລະແຜນເງິນຕາ ປະຈໍາປີ 2020 ວຽກງານປ້ອງກັນຊາດ, ປ້ອງກັນຄວາມສະຫງົບ ແລະການຕ່າງປະເທດ, ວຽກງານແນວໂຮມ ແລະວຽກງານມະຫາຊົນຂອງພັກ, ການກະກຽມດໍາເນີນກອງປະຊຸມໃຫ່ຍ 3 ຂັ້ນຂອງພັກ ແລະບັນຫາສໍາຄັນອື່ນໆ.