ວັນທີ 25 ພຶດສະພາ 2021 ນີ້, ຄະນະໜ່ວຍປະສານງານ ແລະ ແກ້ໄຂບັນຫາຢາເສບຕິດ ຕາມຊາຍແດນ ລາວ-ໄທ (ແຂວງວຽງຈັນ, ແຂວງໄຊຍະບູລີ, ໄດ້ເປັນເຈົ້າພາບຮ່ວມກັບຄະໜ່ວຍປະສານງານປະຈຳພື້ນທີ່ຊາຍແດນ ໄທ-ລາວ, ຈັງຫວັດເລີຍ ຈັດກອງປະຊຸມທາງໄກ ຜ່ານວີດີໂອ ເທເລຄອນເຟີເຣັນ (Video Tele Conference), ຂຶ້ນເປັນຄັ້ງທີ່ III ປະຈໍາປີ 2021, ເຊິ່ງຝ່າຍແຂວງວຽງຈັນ ນໍາໂດຍ ທ່ານ ພັນເອກ ບຸນຕຽງ ອິນທະວົງ, ຫົວໜ້າຄະນະໜ່ວຍປະສານງານປະຈໍາຊາຍແດນ ລາວ-ໄທ, ແຂວງວຽງຈັນ-ຈັງວັດເລີຍ, ຝ່າຍແຂວງໄຊຍະບູລີ ນຳໂດຍ ທ່ານ ພົນຈັດຕະວາ ກູດ ພົມມາ ຫົວໜ້າກອງບັນຊາການທະຫານແຂວງໄຊຍະບູລີ, ພ້ອມທັງເປັນຫົວໜ້າ ຄະນະຊຸດປະສານງານປະຈຳຊາຍແດນ ລາວ-ໄທ ແຂວງໄຊຍະບູລີ-ຈັງວັດເລີຍ, ແລະ ຕາງໜ້າຝ່າຍໄທ ນໍາໂດຍທ່ານ ພັນຕໍາຫຼວດເອກ ວະສັນ ເກສະຣັກ ຮອງຜູ້ບັງຄັບການຕໍາຫຼວດພູທອນ ຈັງຫວັດເລີຍ, ຄະນະຊຸດປະສານງານປະຈໍາຊາຍແດນ ໄທ-ລາວ (ແຂວງວຽງຈັນ, ແຂວງໄຊຍະບູລີ), ໂດຍມີພາກສ່ວນກ່ຽວຂ້ອງ ແຕ່ລະຝ່າຍເຂົ້າຮ່ວມ. ກອງປະຊຸມຄັ້ງນີ້ໄດ້ ມີການທົບທວນຄືນ ຜົນຂອງການຈັດຕັ້ງປະຕິບັດວຽກງານໃນໄລຍະຜ່ານມາ, ນັບຕັ້ງແຕ່ໄດ້ປຶກສາຫາລືຮ່ວມກັນ ຄັ້ງທີ 01, ຄັ້ງທີ 02 ຕົ້ນປີ 2021, ທັງເປັນການແລກປ່ຽນຄວາມຄິດເຫັນ ຖອດຖອນບົດຮຽນເຊິ່ງກັນ ແລະ ກັນ ໃນການແກ້ໄຂບັນຫາຢາເສບຕິດຮ່ວມກັນລະຫວ່າງ ແຂວງວຽງຈັນ, ແຂວງໄຊຍະບູລີ ແລະ ຈັງຫວັດເລີຍ. ຜ່ານມາເຫັນວ່າທັງສອງຝ່າຍໄດ້ເອົາໃຈໃສ່ຢ່າງຕັ້ງໜ້າ, ຕ່າງຝ່າຍລ້ວນແຕ່ໃຫ້ຄວາມໄວ້ວາງໃຈ ແລະ ໃຫ້ການຮ່ວມມືຊ່ວຍເຫຼືອກັນຕະຫຼອດມາ ຈຶ່ງສາມາດສະກັດກັ້ນ, ແກ້ໄຂ ຈັບກຸມຜູ້ຄ້າ-ຂາຍຢາເສບຕິດໄດ້ຢ່າງຕໍ່ເນື່ອງ ເຮັດໃຫ້ບໍລິເວນຊາຍແດນເປັນລະບຽບຮຽບຮ້ອຍດີ. ກອງປະຊຸມຄະນະໜ່ວຍປະສານງານເພື່ອແກ້ໄຂ ບັນຫາຢາເສບຕິດຕາມຊາຍແດນ ລາວ-ໄທ ຄັ້ງນີ້ ໄດ້ມີການປະຊຸມຜ່ານລະບົບ ວີດີໂອ ເທເລ ຄອນເຟີເຣັນ ຍ້ອນສະພາບການແຜ່ລະບາດຂອງພະຍາດ Covid 19 ຢູ່ພາຍໃນ, ພາກພື້ນ ແລະ ສາກົນ ທີ່ກຳລັງເພີ່ມຂຶ້ນຢ່າງຕໍ່ເນື່ອງ ແຕ່ແນວໃດກໍຕາມເຖິງວ່າຈະບໍ່ໄດ້ ສໍາຜັດກັບຕົວຈິງຄືຜ່ານມາ ແຕ່ກອງປະຊຸມກໍໄດ້ດໍາເນີນໄປດ້ວຍບັນຍາ ກາດອັນອົບອຸ່ນ ເຮັດໃຫ້ການປຶກສາຫາລືຄັ້ງນີ້ ເປັນເອກະພາບໄດ້ຫຼາຍເນື້ອໃນຫຼາຍບັນຫາ ເຕັມໄປດ້ວຍ ຄວາມເຂົ້າອົກ-ເຂົ້າໃຈເຊິ່ງກັນ ແລະ ກັນ, ແຕ່ຕົ້ນຕະຫຼອດປາຍ ຈຶ່ງເຮັດໃຫ້ກອງປະຊຸມມີຜົນ ສໍາເລັດຕາມລະດັບຄາດໝາຍທີ່ວາງໄວ້.
ໂດຍ: ສາຍຄໍາ ພອນມະນີ.
Loading...