ວັນທີ 8 ກຸມພາ 2024 ນີ້, ພະແນກຖະແຫລງຂ່າວ, ວັດ ທະນະທຳ ແລະ ທ່ອງທ່ຽວ ນະ ຄອນຫລວງວຽງຈັນ (ຖວທ ນວ) ຈັດກິດຈະກຳເພື່ອສົ່ງເສີມການທ່ອງທ່ຽວ (ຄາຣາວານ) ເຂົ້າສູ່ງານບຸນກອງເຂົ້າຫອມສັງ ທອງ ຕິດພັນກັບຕະຫລາດນັດວາງສະແດງ-ຂາຍສິນຄ້າ ປະຈຳປີ 2024 ຂອງເມືອງສັງທອງ ໂດຍມີ ທ່ານ ນາງ ວຽງພອນ ແກ້ວຄູນສີ ຫົວໜ້າພະແນກ ຖວທ ນວ, ພ້ອມດ້ວຍຜູ້ຕາງໜ້າຈາກພະແນກການອ້ອມຂ້າງ ນວ, ອະດີດຫົວໜ້າພະແນກ ຖວທ ນວ, ບັນດາຫົວໜ່ວຍທຸລະກິດ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ຂະບວນຄາຣາວານຄັ້ງນີ້ ເລີ່ມຕົ້ນອອກເດີນທາງຈາກ ພະແນກ ຖວທ ນວ ໄປສະຖານທີ່ຈັດບຸນກອງເຂົ້າຫອມສັງທອງ ໃນນັ້ນ, ຂະບວນຄາຣາວານໄດ້ແວ່ຊົມ ສະຖານທີ່ທ່ອງທ່ຽວທີ່ວັດອ່າງປາບຶກ ບ້ານອ່າງໃຫຍ່ ເມືອງສີໂຄດຕະບອງ, ຈາກນັ້ນກໍໄດ້ເດີນ ທາງໄປທີ່ສະຖານທີ່ຈັດບຸນກອງເຂົ້າຫອມສັງທອງ ຢູ່ຫາດຊາຍຂາວ ບ້ານອ່າງນ້ອຍ ເມືອງສັງທອງ ເພື່ອເຂົ້າຮ່ວມພິທີເປີດງານຢ່າງເປັນທາງການ, ພ້ອມທັງຮັບຊົມງານຕະຫລາດນັດຂາຍສິນ ຄ້າ, ການແຂ່ງຂັນອາຫານພື້ນບ້ານ, ການສະແດງສິລະປະ-ວັນນະ ຄະດີ ແລະ ຮັບຊົມການປະກວດນາງສາວເຂົ້າ ຫອມສັງທອງ ຮອບທີ 1 ຈາກນັ້ນ ຂະບວນຄາຣາວານ ກໍໄດ້ອອກເດີນທາງກັບສູ່ນະຄອນຫລວງວຽງຈັນ.
ສຳລັບບຸນກອງເຂົ້າຫອມສັງທອງ ຕິດພັນກັບງານຕະຫລາດນັດວາງສະແດງ-ຂາຍສິນຄ້າ ປະຈຳປີ 2024 ຈັດຂຶ້ນແຕ່ວັນທີ 8-10 ກຸມພາ 2023 ເຊິ່ງແມ່ນຮີດຄອງປະເພນີອັນດີງາມຂອງຊາດ-ຂອງເຜົ່າ ເຊິ່ງແມ່ນມູນມໍລະດົກອັນລ້ຳຄ່າຂອງບັນພະບູລຸດຂອງຊາດລາວ ໄດ້ປະຕິບັດສືບທອດກັນມາຫລາຍຍຸກຫລາຍສະໄໝ ແລະ ຫລາຍເຊັ່ນຄົນ, ພໍຮອດເດືອນຍີ່ ປະຊາຊົນຊາວ ພຸດ ພາຍຫລັງສຳເລັດໃນການເກັບກູ້ຜົນຜະລິດລະດູຝົນ ໄດ້ພ້ອມກັນເຮັດບຸນກອງເຂົ້າ ເພື່ອເປັນການລ້ຽງເຈົ້າຖິ່ນເຈົ້າຖານ, ຜູ້ປົກປັກຮັກສາໄຮ່ນາຮົ້ວສວນ ຕາມຄວາມເຊື່ອຖື.
ໃນປີນີ້, ມີກອງເຂົ້າ 5 ກອງ ຄື: ກອງໃຫຍ່ 1 ກອງ ຄວາມກວ້າງ 5 ແມັດ, ສູງ 4,5 ແມັດ, ກອງໜ້ອຍ 4 ກອງ ຄວາມກວ້າງ 1,75 ແມັດ ສູງ 2 ແມັດ, ໃນນັ້ນ ຍັງມີວັດຖຸອຸປະກອນການຜະລິດຕ່າງໆ ເຊິ່ງເປັນເຄື່ອງມືການຜະລິດ ເປັນຫົວຄິດປະດິດສ້າງຂອງປະຊາຊົນລາວບັນດາເຜົ່າ ໃນໄລຍະຜ່ານມາ.
ຂ່າວ-ພາບ: ວຽງສະຫວັນ
