ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເລີ່ມແຕ່ເວລາ 5 ໂມງ 30 ນາທີຂອງຕອນເຊົ້າວັນທີ 10 ກຸມພາ 2024 ອໍານາດການປົກຄອງແຂວງຄໍາມ່ວນຮ່ວມກັບກອງບັນຊາການທະຫານແຂວງໄດ້ຈັດກິດຈະກໍາຂີ່ລົດຖີບເພື່ອສຸຂະພາບ ແລະ ເປັນການສ້າງຂະບວນການເພື່ອຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວຄົບຮອບ 75 ປີ ແລະ ວັນສ້າງຕັ້ງກອງບັນຊາການທະຫານແຂວງຄໍາມ່ວນຄົບຮອບ 65 ປີຂຶ້ນຢ່າງເປັນທາງການຢູ່ທີ່ເດີ່ນກອງບັນຊາການທະຫານແຂວງ ໂດຍການໃຫ້ກຽດເຂົ້າຮ່ວມຂອງທ່ານ ວັນໄຊ ພອງສະຫວັນ ກໍາມະການສູນກາງພັກ ເລຂາພັກແຂວງ ເຈົ້າແຂວງຄໍາມ່ວນ.
ພົນຈັດຕະວາ ສົມແຄນ ອັບປະສອນມີຄໍາເຫັນວ່າ : ການຈັດກິດຈະກໍາຂີ່ລົດຖີບເພື່ອສຸຂະພາບໃນຄັ້ງນີ້ ແມ່ນກິດຈະກໍາໜຶ່ງທີ່ມີຄວາມສໍາຄັນ ເພາະວ່ານອກຈາກເປັນການສ້າງຂະບວນການແລ້ວຍັງເປັນການສ່ອງແສງໃຫ້ເຫັນເຖິງການເຕົ້າໂຮມຄວາມສາມັກຄີ,ມີຄວາມເອກອ້າງທະນົງໃຈຕໍ່ຜົນງານທີ່ກອງທັບ ແລະ ປະຊາຊົນຍາດມາໄດ້ , ທັງເປັນການປຸກລະດົມໃຫ້ກໍາລັງໃຈແກ່ກໍາລັງປະກອບອາວຸດທີ່ຈະສືບຕໍ່ພາລະກິດປະຕິບັດສອງໜ້າທີ່ຍຸດທະສາດຂອງພັກເວົ້າລວມ , ທັງເປັນຂະບວນການຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວເຊິ່ງເປັນປີຄົບຮອບໃຫຍ່ອີກວາລະໜຶ່ງ .
ເວລາ 7 ໂມງເຊົ້າແມ່ນໄດ້ເລີ້ມປ່ອຍຂະບວນຂີ່ລົດຖີບອອກ ຈາກກອງບັນຊາການທະຫານແຂວງໄປຫາວົງວຽນຫຼັກສອງ – ລ້ຽວຂວາໄປທາງຫ້ອງວ່າການແຂວງໄປຮອດສີ່ແຍກໄຟແດງຮ້ານອາຫານທ່າແຂກໃໝ່ – ລ້ຽວຊ້າຍໄປຮອດສີ່ແຍກໄຟແດງພະແນກສຶກສາທິການ ແລະ ກິລາແຂວງແລ້ວມຸ້ງໜ້າໄປຮອດວັດພຣະທາດສີໂຄດຕະບອງ . ຫຼັງຈາກນັ້ນລ້ຽວກັບຄືນມາຕາມເສັ້ນທາງບ້ານເກົ້າລ້ຽວ – ຈອມແຈ້ງຜ່ານຮ້ານອາຫານ ເວສຕາຈົນຮອດຫໍໄຫວ້ມູນເຊື້ອ 21 ມີນາ ແລ້ວລ້ຽວຂວາມຸ້ງໜ້າມາຕາມຖະໜົນກຸວໍລະວົງຜ່ານວົງວຽນຫຼັກສອງ ແລ້ວເຂົ້າສູ່ຈຸດປ່ອຍລົດຄື : ກອງບັນຊາການທະຫານແຂວງເປັນອັນສໍາເລັດກິດຈະກໍາຂີ່ລົດຖີບໃນຄັ້ງນີ້ .