ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງຄຳມ່ວນ ຮ່ວມກັບພະແນກກະສິກໍາ ແລະ ປ່າໄມ້ແຂວງ ຈັດກິດຈະກໍາຂີ່ລົດຖີບເພື່ອສຸຂະພາບ ເນື່ອງໃນວັນປູກຕົ້ນໄມ້ແຫ່ງຊາດ ຄົບຮອບ 44 ປີ ແລະ ວັນສິ່ງແວດລ້ອມໂລກ ຄົບຮອບ 51 ໃນວັນທີ 5 ມິຖຸນາ 2024 ທີ່ເດີ່ນພະແນກກະສິກໍາ ແລະ ປ່າໄມ້ ແຂວງຄໍາມ່ວນ ໂດຍການເຂົ້າຮ່ວມຂອງທ່ານ ວັນໄຊ ພອງສະຫວັນ ເຈົ້າແຂວງໆຄໍາມ່ວນ ພ້ອມດ້ວຍພະແນກການອ້ອມຂ້າງແຂວງ, ຜູ້ປະກອບການທຸລະກິດ, ບໍລິສັດທັງພາຍໃນ ແລະ ຕ່າງປະເທດ, ນັກຂີ່ລົດຖີບຈາກສະມາຄົມຂີ່ລົດຖີບ ແລະ ຜູ້ທີ່ຮັກໃນການຂີ່ລົດຖີບ ພາຍໃນແຂວງຄໍາມ່ວນ ເຂົ້າຮ່ວມເປັນຈໍານວນຫລາຍ.
ທ່ານ ຄໍາໝັ້ນ ສໍປະເສີດ ຫົວໜ້າຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງຄຳມ່ວນ ໄດ້ກ່າວວ່າ: ການຈັດກິດຈະກຳຄັ້ງນີ້ ເພື່ອສົ່ງເສີມການປົກປັກຮັກສາ, ປູກຈິດສຳນຶກ ພ້ອມທັງປຸກລະດົມທົ່ວສັງຄົມ ໃຫ້ເຫັນຄວາມສຳຄັນຂອງການມີສິ່ງແວດລ້ອມ ຂຽວ, ສະອາດ, ງາມຕາ ປາສະຈາກມົນລະພິດ. ພ້ອມທັງຮຽກຮ້ອງໃຫ້ທຸກພາກສ່ວນໃນສັງຄົມ ຈົ່ງຮ່ວມແຮງຮ່ວມໃຈກັນ ປົກປັກຮັກສາສິ່ງແວດລ້ອມ ໂດຍຫັນປ່ຽນພຶດຕິກຳ ແລະ ຈິນຕະນາການ ຈາກການພັດທະນາເສດຖະກິດ-ສັງຄົມ ທີ່ທຳລາຍສິ່ງແວດລ້ອມ ມາເປັນການພັດທະນາທີ່ເປັນມິດຕໍ່ສິ່ງແວດລ້ອມ ເພື່ອໃຫ້ມີຄວາມຍືນຍົງ ແລະ ຍາວນານ ພ້ອມນີ້, ກໍເພື່ອຄຸນນະພາບຊີວິດຂອງປະຊາຊົນ, ສ້າງເມືອງໃຫ້ມີຄວາມສະອາດງາມຕາ ຕາມທິດ ສີຂຽວຍືນຍົງ.
ກິດຈະກໍາໃນຄັ້ງນີ້, ໄດ້ຮັບການອຸປະຖຳຈາກບັນດາບໍລິສັດຫ້າງຮ້ານຕ່າງໆ ເພື່ອຊຸກຍູ້ວັນດັ່ງກ່າວ ເປັນຕົ້ນ ບໍລິສັດ ໄຟຟ້ານໍ້າເທີນ 2 ຈໍາກັດ, ບໍລິສັດ ຄໍາມ່ວນຊີມັງ ຈໍາກັດ, ບໍລິສັດ ລາວຄາຍຢວນ ຈໍາກັດ ຕາງໜ້າຮັບໂດຍທ່ານ ຄໍາໝັ້ນ ສໍປະເສີດ ຫົວໜ້າຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ.
ຂ່າວ-ພາບ: ແດງສະຫວັດ ແສນພານິດ