ຄຳມ່ວນ ຈັດພິທີປູກຕົ້ນໄມ້ ເນື່ອງໃນໂອກາດວັນປູກຕົ້ນໄມ້ແຫ່ງຊາດ

ວັນທີ 1 ມີຖຸນາ 2024 ທີ່ເດີ່ນໂຮງຮຽນປະຖົມບ້ານຊຽງຫວາງທົ່ງ ເມືອງໜອງບົກ ແຂວງຄຳມ່ວນໄດ້ຈັດພິທີປູກຕົ້ນໄມ້ ເນື່ອງໃນໂອກາດວັນປູກຕົ້ນໄມ້ແຫ່ງຊາດ, ວັນເດັກນ້ອຍສາກົນ, ວັນສິ່ງແວດລ້ອມໂລກ ໂດຍການເປັນກຽດເຂົ້າຮ່ວມມີທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ.

ທ່ານ ເດດສັກດາ ມະນີຄຳ ຫົວໜ້າພະແນກກະສິກຳ ແລະ ປ່າໄມ້ແຂວງຄຳມ່ວນໄດ້ລາຍງານວ່າ: ອົງການປົກຄອງທ້ອງຖິ່ນທົ່ວແຂວງກະກຽມແຜນ ການ ແລະ ຂະບວນການປູກໄມ້ຢູ່ທ້ອງຖິ່ນຕົນເອງໃຫ້ເປັນຂະບວນຟົດຟື້ນ, ໂດຍມີແຜນການຄາດໝາຍສູ້ຊົນໃນປີ 2024 ຄື: ເກັບແກ່ນຕາມແຜນການໃຫ້ໄດ້ 647 ກິໂລ, ປະຕິບັດໄດ້ 997 ກິໂລ,ທຽບໃສ່ແຜນການເທົ່າກັບ 154.1%; ກ້າເບ້ຍຕາມແຜນການໃຫ້ໄດ້ 551,000 ເບ້ຍ, ປະຕິບັດໄດ້ 993,601 ເບ້ຍ, ທຽບໃສ່ແຜນການເທົ່າກັບ 180.3% ແລະ ການປູກໄມ້ຕາມແຜນການໃຫ້ໄດ້ 805 ເຮັກຕາ.

ການສ້າງຂະບວນການປູກຕົ້ນໄມ້ ເນື່ອງໃນວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2024, ທົ່ວແຂວງ ມີແຜນການຈັດພິທີສ້າງຂະບວນການປູກຕົ້ນໄມ້ທັງໝົດ 8.30 ເຮັກຕາ, ເບ້ຍໄມ້ 3,686 ກວ່າເບ້ຍ, ປະກອບດ້ວຍ (ໄມ້ອຸດສາຫະກໍາ, ໄມ້ໃຫ້ໝາກ, ໄມ້ປະດັບ ແລະ ຊະນິດອື່ນໆ). ພ້ອມນີ້ຢູ່ແຕ່ລະເມືອງມີແຜນ ການເພື່ອດໍາເນີນການສ້າງຂະບວນການປູກຕົ້ນໄມ້ ເນື່ອງໃນວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2024 ເພື່ອໃຫ້ເປັນຂະບວນການຢ່າງຟົດຟື້ນ.

ສະເພາະນື້ອທີ່ປູກຕົ້ນໄມ້ໃນສະຖານທີ່ແຫ່ງນີ້ມີປະມານ 2.5 ເຮັກຕາ, ມີຈຳນວນເບ້ຍໄມ້ທີ່ຈະປູກ 566 ເບ້ຍ,ປະກອບດ້ວຍ (ໄມ້ປະດັບ ແລະ ໄມ້ໃຫ້ໝາກ) ປູກຢູ່ເຂດບ້ານຊຽງຫວາງທົ່ງ, ເມືອງໜອງບົກ.

ຂ່າວ: ຄຳມ່ວນ)