ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີທຳລາຍອາວຸດລ່າເນື້ອ ແລະ ວັດຖຸຕ້ອງຫ້າມ ຈັດຂຶ້ນໃນວັນທີ 22 ກັນຍາ 2023 ທີ່ກອງພັນປ້ອງກັນເຄື່ອນທີ່ ກອງບັນຊາການປ້ອງກັນຄວາມສະຫງົບແຂວງຄຳມ່ວນ ໂດຍມີ ທ່ານ ວັນໄຊ ພອງສະ ຫວັນ ເຈົ້າແຂວງຄຳມ່ວນ, ປະທານຄະນະກຳມະການ ປກຊ-ປກສ ແຂວງ, ທ່ານ ທິບພະຈັນ ໂພໄຊ ຫົວໜ້າກອງບັນຊາການປ້ອງກັນຄວາມສະຫງົບແຂວງຄຳມ່ວນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ຄຳສິງ ນົນທະສອນ ຮອງຫົວໜ້າກອງບັນຊາການ ປກສ ແຂວງ ໄດ້ລາຍງານການເຄື່ອນໄຫວເກັບກູ້, ທ້ອນໂຮມອາວຸດເສິກ, ອາວຸດລ່າເນື້ອ, ວັດຖຸຕ້ອງຫ້າມ ແລະ ເປົ້າໝາຍການທຳລາຍ ເຊິ່ງສອງກອງບັນຊາການປ້ອງກັນຊາດ- ປ້ອງກັນຄວາມສະຫງົບແຂວງ ໄດ້ປະ ສານສົມທົບກັນ ເພື່ອເຄື່ອນໄຫວເກັບກູ້, ທ້ອນໂຮມອາວຸດເສິກ, ອາວຸດລ່າເນື້ອ ແລະ ວັດຖຸຕ້ອງຫ້າມທຸກຊະນິດ ທີ່ເປັນອັນຕະລາຍໃນໄລຍະຜ່ານມາ ທີ່ເປັນບັນ ຫາປະກົດການຫຍໍ້ທໍ້ໃນສັງຄົມ ກ່ຽວກັບການນຳໃຊ້ອາວຸດປືນ, ອາວຸດລ່າເນື້ອຢ່າງຊະຊາຍ ໂດຍບໍ່ຄຳນຶງເຖິງກົດໝາຍ ແລະ ລະບຽບການ ເຊິ່ງໄດ້ສ້າງຄວາມເສຍໃຫ້ໃຫ້ແກ່ຊີວິດ ແລະ ຊັບສິນຂອງພົນລະ ເມືອງ ເປັນຕົ້ນ ການນຳໃຊ້ອາວຸດປືນ ໃນການນາບຂູ່, ປຸ້ນຈີ້ຊີງຊັບ, ຂ້າເຈົ້າເອົາຂອງ, ຄາດຕະກຳ ເຊິ່ງປະກົດການດັ່ງກ່າວໄດ້ສົ່ງຜົນກະທົບ ແລະ ມີຜົນເສຍ ຫາຍຢ່າງໃຫຍ່ຫລວງຕໍ່ສັງຄົມ.
ຜ່ານການເຄື່ອນໄຫວຈັດຕັ້ງປະຕິບັດໃນໄລຍະຜ່ານມາ ແມ່ນສາມາດກອບກູ້, ທ້ອນໂຮມອາວຸດ ແລະ ວັດຖຸຕ້ອງຫ້າມໄດ້ຫລາຍລາຍການ ເຊິ່ງປະກອບມີ: ອາວຸດປືນ ລວມມີ 194 ກະບອກ. ໃນນີ້, ອາວຸດເສິກຍາວ 85 ກະບອກ, ອາວຸດເສິກສັ້ນ 109 ກະບອກ, ອາວຸດລ່າເນື້ອ 2.593 ກະບອກ, ເລົາປືນ 387 ເລົາ, ວັດຖຸຕ້ອງຫ້າມ ປະເພດ ໝໍ້ຊ໋ອດໄຟຟ້າ 67 ເຄື່ອງ, ຈັກສະຕິນ 20 ເຄື່ອງ. ເຊິ່ງເປົ້າໝາຍການທຳລາຍໃນພິທີຄັ້ງນີ້ ປະກອບມີ: ອາວຸດລ່າເນື້ອ 2.593 ກະບອກ, ເລົາປືນ 387 ເລົາ, ໝໍ້ຊ໋ອດໄຟຟ້າ 67 ເຄື່ອງ ແລະ ຈັກສະຕິນ 20 ເຄື່ອງ. ສ່ວນອາວຸດເສິກຈໍານວນໜຶ່ງແມ່ນໄດ້ເກັບຮັກສາໄວ້ ແລະ ມອບຕໍ່ໃຫ້ກະຊວງທີ່ກ່ຽວຂ້ອງຄຸ້ມຄອງ.
ຂ່າວ: ກອງຄຳ