ວັນທີ 23 ກໍລະກົດ 2024 ແຂວງຄຳມ່ວນ ໄດ້ຈັດກອງປະຊຸມ ປະເມີນຜົນການຈັດຕັ້ງປະຕິບັດ ລັດຖະທຳມະນູນ ແຫ່ງ ສປປ ລາວ ສະບັບປີ 2015 ໂດຍການເປັນປະທານຂອງ ທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ມີທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ ແມ່ນການປະເມີນຜົນການຈັດຕັ້ງປະຕິບັດນິຕິກຳສູງສຸດຂອງລັດ ເຊິ່ງເປັນກົດໝາຍພື້ນຖານຂອງຊາດ, ລັດຖະທໍາມະນູນສະບັບທໍາອິດຂອງ ສປປ ລາວ ໄດ້ຖືກຮັບຮອງ ແລະ ປະກາດໃຊ້ຢ່າງເປັນທາງການໃນປີ 1991, ມາຮອດປັດຈຸ ບັນ ແມ່ນເປັນເວລາ 33 ປີ, ໃນໄລຍະຜ່ານມາກໍໄດ້ມີການປັບປຸງ 2 ຄັ້ງຄື: ການປັບ ປຸງປີ 2003 ແລະ ປີ 2015 ໄດ້ເປັນບ່ອນອີງແກ່ການສ້າງ ແລະ ປັບປຸງບັນດາກົດ ໝາຍ ເພື່ອເປັນເຄື່ອງມືຂອງລັດ ໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ ແລະ ສ້າງເງື່ອນໄຂພື້ນຖານໃຫ້ແກ່ການສ້າງລັດປະຊາທິປະໄຕ ປະ ຊາຊົນ ໃຫ້ເປັນລັດ ທີ່ປົກຄອງດ້ວຍກົດໝາຍດີຂຶ້ນເທື່ອລະກ້າວ. ຢ່າງໃດກໍຕາມ ຜ່ານການຈັດຕັ້ງປະຕິບັດຕົວຈິງ ຍັງມີບາງບົດບັນຍັດຂອງລັດຖະທຳມະນູນບໍ່ທັນສອດຄ່ອງກັບໜ້າທີ່ການເມືອງຂອງພັກ ແລະ ສະພາບການພັດທະນາເສດຖະກິດ-ສັງຄົມ ໃນໄລຍະປັດຈຸບັນ.
ສະນັ້ນ ກົມການເມືອງສູນກາງພັກ ໄດ້ອອກມະຕິ ສະບັບເລກທີ 15/ກມສພ, ລົງວັນທີ 22 ພຶດສະພາ 2024 ວ່າດ້ວຍການແຕ່ງຕັ້ງຄະນະກຳມະການລະດັບຊາດ ເພື່ອຄົ້ນຄວ້າ ແລະ ປັບປຸງລັດຖະທຳມະນູນໃຫ້ທັນເວລາ ໂດຍໄດ້ວາງແຜນການປັບປຸງລັດຖະທຳມະນູນ ແຕ່ນີ້ຮອດກາງປີ 2025 ແລະ ຄາດວ່າຈະຖືກຮັບຮອງໃນທ້າຍປີ 2025 ພ້ອມທັງແຕ່ງຕັ້ງກອງເລຂາ ແລະ ອະນຸກຳມະການຕ່າງໆ ເພື່ອຈັດຕັ້ງປະຕິ ບັດໃຫ້ສຳ ເລັດຕາມລະດັບຄາດໝາຍທີ່ວາງໄວ້.
ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການສະເໜີບົດປະເມີນການຈັດຕັ້ງປະຕິ ບັດລັດຖະທຳມະນູນ ສະບັບປີ 2015 ແລະ ຕາງໜ້າແຕ່ລະຂົງເຂດວຽກງານຕ່າງໆ ກໍໄດ້ປະກອບຄໍາຄິດເຫັນ ເພື່ອແນໃສ່ເຮັດໃຫ້ການປັບປຸງລັດຖະທຳທະນູນສະບັບໃໝ່ ມີເນື້ອໃນຄົບຖ້ວນ, ສົມບູນ, ຖືກຕ້ອງ ແລະ ສອດຄ່ອງກັບໜ້າທີ່ການເມືອງໃນໄລຍະໃໝ່.
ຂ່າວ-ພາບ: ກອງຄຳ
